ຕອນຄ່ຳວັນທີ 15 ກຸມພາ, ທ່ານນາຍົກລັດຖະມົນຕີ ຫວຽດນາມ ຟ້າມມິນຈິງ ໄດ້ມີການໂອ້ລົມທາງໂທລະສັບກັບທ່ານ Albert Bourla, ປະທານ ທັງເປັນຫົວໜ້າຝ່າຍບໍລິຫານກຸ່ມບໍລິສັດ Pfizer. ນີ້ແມ່ນການແລກປ່ຽນຄັ້ງທີ 2 ລະຫວ່າງທ່ານນາຍົກລັດຖະມົນຕີ ກັບຫົວໜ້າກຸ່ມບໍລິສັດ Pfizer ນັບແຕ່ໂລກລະບາດໂຄວິດ-19 ແຜ່ລະບາດຄັ້ງທີ 4 ຢູ່ ຫວຽດນາມ.
ໃນການໂອ້ລົມທາງໂທລະສັບ, ທ່ານນາຍົກລັດຖະມົນຕີ ຟ້າມມິນຈິງ ໄດ້ຂອບໃຈ, ຕີລາຄາສູງເລື່ອງກຸ່ມບໍລິສັດ Pfizer ສະໜອງວັກຊິນກັນໂຄວິດ-19 ຈຳນວນ 51 ລ້ານໂດສ ໃຫ້ແກ່ ຫວຽດນາມ ໂດຍໄວ ແລະ ຄົບຖ້ວນ.
ເພື່ອແນໃສ່ປົກປ້ອງສຸຂະພາບຂອງເດັກ ແລະ ສືບຕໍ່ປະຕິບັດການເປີດປະຕູໂຮງຮຽນດ້ວຍຄວາມປອດໄພ ແລະ ມີປະສິດທິຜົນ, ທ່ານນາຍົກລັດຖະມົນຕີສະເໜີໃຫ້ທ່ານ Albert Bourla ເອົາໃຈໃສ່ຊຸກຍູ້ເລື່ອງສະໜອງວັກຊິນຈຳນວນ 22 ລ້ານໂດສ ທີ່ສັກໃຫ້ເດັກໃນເກນອາຍຸແຕ່ 5 – 12 ປີ ຢູ່ ຫວຽດນາມ ໃນຊຸມມື້ຈະມາເຖິງໂດຍໄວ; ພ້ອມທັງສະໜອງ, ຖ່າຍທອດເຕັກໂນໂລຊີຜະລິດຢາປິ່ນປົວຕ້ານໄວຣັດສາຍພັນໃໝ່.
ສ່ວນທ່ານ Albert Bourla, ປະທານ ທັງເປັນຫົວໜ້າຝ່າຍບໍລິຫານກຸ່ມບໍລິສັດ Pfizer ຢືນຢັນວ່າ, ຈະມານະພະຍາຍາມ ແລະ ເພີ່ມຄວາມໄວໃນການປະຕິບັດສັນຍາ, ສະໜອງວັກຊິນທີ່ສັກໃຫ້ແກ່ເດັກໃນເກນອາຍຸແຕ່ 5 ຫາຕ່ຳກວ່າ 12 ປີໃຫ້ ຫວຽດນາມ ໂດຍໄວ. ທ່ານ ກໍ່ໃຫ້ຮູ້ວ່າ, Pfizer ສາມາດຮ່ວມມືກັບ ຫວຽດນາມ ໃນການຖ່າຍທອດເຕັກໂນໂລຊີຜະລິດວັກຊິນປິ່ນປົວໂຄວິດ-19.
