ວັນທີ 8 ເມສາ, ຫວຽດນາມ ຢັ້ງຢືນມີຜູ້ຕິດເຊື້ອພະຍາດໂຄວິດ - 19 ລາຍໃໝ່ກວ່າ 39.300 ຄົນ ຢູ່ 62 ແຂວງ, ນະຄອນ, ຫຼຸດລົງກວ່າ 6.500 ຄົນ ເມື່ອທຽບໃສ່ວັນທີ 7 ເມສາ.

    

ຕາມຂ່າວກ່ຽວກັບໂລກລະບາດໂຄວິດ - 19 ໃນວັນທີ 8 ເມສາ ຂອງ ກະຊວງສາທາລະນະສຸກ ຫວຽດນາມ ໃຫ້ຮູ້ວ່າ ມີຜູ້ຕິດເຊື້ອພະຍາດໂຄວິດ - 19 ລາຍໃໝ່ກວ່າ 39.300 ຄົນ ຢູ່ 62 ແຂວງ, ນະຄອນ, ຫຼຸດລົງກວ່າ 6.500 ຄົນ ເມື່ອທຽບໃສ່ວັນທີ 7 ເມສາ. ໃນວັນດຽວກັນ, ມີຜູ້ຕິດເຊື້ອໄດ້ຮັບການປິ່ນປົວຫາຍດີແມ່ນ 60.609 ຄົນ.

    ກ່ຽວກັບສະພາບການສັກວັກຊິນກັນພະຍາດໂຄວິດ - 19 ຢູ່ ຫວຽດນາມ, ໄລ່ມາຮອດຕອນບ່າຍວັນທີ 8 ເມສາ, ອັດຕາການສັກວັກຊິນກັນ ພະຍາດໂຄວິດ-19 ສຳລັບຜູ້ມີອາຍຸ 18 ປີຂຶ້ນໄປບັນລຸ 100% ສຳລັບເຂັມທີ 1. 99,8% ສຳລັບເຂັມທີ 2, ສ່ວນເຂັມທີ 3 ປະມານ 50,4%. ສ່ວນຜູ້ມີອາຍຸແຕ່ 12 – 17 ປີແມ່ນ  ບັນລຸ 99,8% ສຳລັບເຂັມທີ 1 ແລະ 95,1% ສຳລັບເຂັມທີ 3.

        ປັດຈຸບັນ, ກະຊວງສາທາລະນະສຸກ ພ້ອມແລ້ວທີ່ຈະຜັນຂະຫຍາຍການສັກວັກຊິນກັນພະຍາດໂຄວິດ - 19 ໃຫ້ແກ່ເດັກມີອາຍຸແຕ່ 5 – 12 ປີ.