(ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ)
ເປັນທີ່ຈະແຈ້ງແລ້ວວ່າ, ບັນດາການຜັນແປທີ່ເຄັ່ງຕຶງຫວ່າງມໍ່ໆມານີ້ຢູ່ທະເລຕາເວັນອອກແມ່ນສາຍເຫດພາໄປເຖິງຄວາມສົນໃຈຂອງບັນດາປະເທດຢູ່ພາຍໃນ ແລະ ນອກພາກພື້ນ.
ໃນສະພາບການໂລກຂາດຄວາມສະຖຽນລະພາບນັບມື້ນັບເພີ່ມຂຶ້ນ, ໃນນັ້ນມີໂລກລະບາດໂຄວິດ-19, ຄວາມສ່ຽງທາງດ້ານເສດຖະກິດຖືກຊຸດໂຊມ, ການແກ່ງແຍ້ງລະຫວ່າງບັນດາປະເທດໃຫຍ່ຖືກເພີ່ມຂຶ້ນ… ນັ້ນ, AMM-53 ໄດ້ຢືນຢັນຄືນໃໝ່ຄຳໝັ້ນສັນຍາຮັກສາພາກພື້ນອາຊີຕາເວັນອອກສ່ຽງໃຕ້ ໃຫ້ມີສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ເປັນກາງ, ໃນນັ້ນຖືກົດໝາຍສາກົນເປັນສຳຄັນ.ທັດສະນະຢ່າງຈະແຈ້ງຈາກປະເທດປະທານອາຊຽນ 2020
ທີ່ກອງປະຊຸມ AMM-53, ດ້ວຍຖານະຕຳແໜ່ງເປັນປະທານອາຊຽນ 2020, ຫວຽດນາມ ໄດ້ແບ່ງປັນຢ່າງກົງໄປກົງມາກ່ຽວກັບບັນດາການຜັນແປທີ່ສັບສົນ, ເຫດການຮ້າຍແຮງທີ່ເກີດຂຶ້ນໃນໄລຍະຜ່ານມາຢູ່ທະເລຕາເວັນອອກ, ສະເໜີໃຫ້ອາຊຽນ ຈົ່ງຮັກສາຄວາມສາມັກຄີ ແລະ ຫຼັກໝັ້ນຫຼັກການ, ໃນນັ້ນຄວນສືບຕໍ່ຖືການປະຕິບັດຕາມກົດໝາຍສາກົນເປັນສຳຄັນ, ພິເສດແມ່ນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) 1982. ຫວຽດນາມ ຖືວ່າ, ບັນດາການເຄື່ອນໄຫວຫັນເປັນການທະຫານຢູ່ທະເລຕາເວັນອອກ ຫວ່າງມໍ່ໆມານີ້ແມ່ນໄປຝືນກັບບັນດາສິດຜົນປະໂຫຍດອັນຖືກຕ້ອງກັບກົດໝາຍຂອງບັນດາປະເທດຢູ່ເຂດແຄມທະເລ ກໍຄືກົດໝາຍສາກົນ, ພິເສດແມ່ນ UNCLOS 1982. ບັນດາການກະທຳດັ່ງກ່າວໄດ້ເຮັດໃຫ້ຄວາມໄວ້ເນື້ອເຊື່ອໃຈຖືກຫຼຸດລົງ, ເຮັດໃຫ້ຄວາມເຄັ່ງຕຶງຖືກເພີ່ມຂຶ້ນ, ນາບຂູ່ເຖິງສັນຕິພາບ, ຄວາມໝັ້ນຄົງ ແລະ ກົດໝາຍຢູ່ພາຍໃນພາກພື້ນ.
ທັດສະນະຂອງຫວຽດນາມ ແລະ ອາຊຽນ ໃນບັນຫານີ້ແມ່ນສະເໝີຕົ້ນສະເໝີປາຍ ແລະ ຈະແຈ້ງ, ນັ້ນແມ່ນເນັ້ນໜັກເຖິງຄວາມສຳຄັນຂອງການເພີ່ມທະວີຄວາມໄວ້ເນື້ອເຊື່ອໃຈລວມ ແລະ ຮຽກຮ້ອງໃຫ້ບັນດາຝ່າຍຈົ່ງອົດກັ້ນໃນບັນດາການເຄື່ອນໄຫວຂອງຕົນ, ແກ້ໄຂການຂັດແຍ້ງກັນໂດຍສັນຕິວິທີອີງຕາມກົດໝາຍສາກົນ, ລວມທັງ UNCLOS 1982 - ເຊິ່ງໄດ້ຮັບຖືວ່າແມ່ນພື້ນຖານເພື່ອກຳນົດສິດຜົນປະໂຫຍດອັນຖືກຕ້ອງກັບກົດໝາຍຂອງບັນດາປະເທດຢູ່ເຂດແຄມທະເລ ກໍຄືການຜັນຂະຫຍາຍບັນດາການເຄື່ອນໄຫວຢູ່ທະເລ. ອາຊຽນ ຈະມານະພະຍາຍາມເພື່ອປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງມີປະສິດທິຜົນ ແລະ ຄົບຖ້ວນ ແລະ ສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໃຫ້ສົມບູນແບບ ຢ່າງມີປະສິດທິຜົນ, ຮອບດ້ານ ແລະ ຖືກຕ້ອງຕາມກົດໝາຍສາກົນ, ໃນນັ້ນມີ UNCLOS 1982 ແລະ ຫວັງວ່າ ບັນດາການເຈລະຈາກ່ຽວກັບ COC ຈະໄດ້ຮັບການເຊື່ອມຕໍ່ຄືນໃໝ່ກັບຈີນ ໂດຍໄວ.
ບົນຈິດໃນນັ້ນ, ຫຼາຍປະເທດໄດ້ສະໜັບສະໜູນທັດສະນະຂອງຫວຽດນາມ, ມີບັນດາຖະແຫຼງການຢ່າງຈະແຈ້ງ, ສະແດງໃຫ້ເຫັນທັດສະນະຢ່າງຕັ້ງໜ້າເພື່ອແນໃສ່ແກ້ໄຂບັນດາການຜັນແປທີ່ເຄັ່ງຕຶງໃນພື້ນທີ່ຕົວຈິງຢູ່ທະເລຕາເວັນອອກ.
ບັນດາປະເທດສືບຕໍ່ເນັ້ນໜັກເຖິງຄວາມສຳຄັນຂອງເລື່ອງຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມເສລີໃນການເດີນທະເລ ແລະ ການບິນ, ບໍ່ຫັນເປັນການທະຫານ, ອົດກັ້ນບໍ່ໃຫ້ມີບັນດາການກະທຳເຮັດໃຫ້ສະພາບການສັບສົນຂຶ້ນຕື່ມ ຫຼື ເພີ່ມຄວາມເຄັ່ງຕຶງ, ແກ້ໄຂບັນດາການຂັດແຂ້ງກັນໂດຍສັນຕິວິທີໃຫ້ສອດຄ່ອງກັບກົດໝາຍສາກົນ, ລວມທັງ UNCLOS 1982, ສະໜັບສະໜູນການປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ 2020 (DOC) ແລະ ສ້າງ COC ຢູ່ທະເລຕາເວັນອອກຢ່າງມີປະສິດທິພາບ, ປະສິດທິຜົນ, ສອດຄ່ອງກັບກົດໝາຍສາກົນ, ໃນນັ້ນມີ UNCLOS 1982 ໃຫ້ສຳເລັດໂດຍໄວ.
ໃນຂະນະນັ້ນ, ບັນດາຄູ່ຮ່ວມມືຂອງອາຊຽນ ບໍ່ພຽງແຕ່ສະໜັບສະໜູນອາຊຽນ ໃນການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລ ແລະ ການບິນຢູ່ທະເລຕາເວັນອອກເທົ່ານັ້ນ, ຫາກຍັງສະແດງໃຫ້ເຫັນຄວາມມຸ່ງມາດປາດຖະໜາວ່າ ອາຊຽນ ຈະສວມບົດບາດເປັນເຈົ້າການ, ຕັ້ງໜ້າ ແລະ ເປັນໃຈກາງຢູ່ພາກພື້ນອິນເດຍ - ປາຊີຟິກ ກວ່າອີກດ້ວຍ.
ພາກພື້ນອາຊີຕາເວັນອອກສ່ຽງໃຕ້ ມີສະຖຽນລະພາບນອນໃນເປົ້າໝາຍຂອງທຸກໆປະເທດ
ອາດເວົ້າໄດ້ວ່າ, ເລື່ອງບັນດາປະເທດອາຊຽນ ແລະ ບັນດາຄູ່ຮ່ວມມືສະໜັບສະໜູນການເຈລະຈາ, ຮ່ວມມື ມຸ່ງໄປເຖິງການແກ້ໄຂຄວາມເຄັ່ງຕຶງຢູ່ທະເລຕາເວັນອອກ ຜ່ານບັນດາມາດຕະການໂດຍສັນຕິວິທີ, ເຄົາລົບກົດໝາຍສາກົນ ໃນນັ້ນມີ UNCLOS 1982 ແມ່ນທ່າອ່ຽງໃໝ່ທີ່ມີຄວາມຕັ້ງໜ້າຫຼາຍຢ່າງຢູ່ກອງປະຊຸມລັດຖະມົນຕີການຕ່າງປະເທດອາຊຽນ (AMM) ຄັ້ງທີ 53. ສິ່ງດັ່ງກ່າວເປັນການສະແດງໃຫ້ເຫັນບົດບາດພົ້ນເດັ່ນຂອງ ຫວຽດນາມ ປະເທດປະທານອາຊຽນ 2020 ໃນການປະສານສົບທົບແກ້ໄຂໜຶ່ງໃນບັນດາບັນຫາສຳຄັນທີ່ສຸດຢູ່ພາກພື້ນ, ແນໃສ່ມຸ່ງໄປເຖິງອະນາຄົດອັນດີງາມກວ່າ.
ຈິດໃຈກວມລວມຂອງກອງປະຊຸມແມ່ນ ບັນດາປະເທດລ້ວນແຕ່ສະແດງໃຫ້ເຫັນໜ້າທີ່ຄວາມຮັບຜິດຊອບລວມໃນການຮັບປະກັນຄວາມເປັນລະບຽບຮຽບຮ້ອຍຢູ່ພາກພື້ນ ອີງໃສ່ບົນຫຼັກການເສລີ ແລະ ເປີດເຜີຍ, ຄວາມເປັນລະບຽບຮຽບຮ້ອຍອີງໃສ່ວິໄສທັດຂອງອາຊຽນ ຢູ່ພາກພື້ນອິນເດຍ - ປາຊີຟິກ. ຮັບປະກັນ ອາຊີຕາເວັນອອກສ່ຽງໃຕ້ທີ່ມີສະຖຽນລະພາບນອນໃນເປົ້າໝາຍຂອງທຸກໆປະເທດຢູ່ພາຍໃນພາກພື້ນ ແລະ ນອກພາກພື້ນ. ບັນດາຄູ່ຮ່ວມມືຂອງອາຊຽນ ລ້ວນແຕ່ຢືນຢັນຈະຍົກອອກບັນດາການກະທຳຢ່າງລະອຽດເພື່ອໜູນຊ່ວຍອາຊຽນ ປະຕິບັດເປົ້າໝາຍຂອງຕົນ.
ໃນສະພາບການແກ່ງແຍ້ງລະຫວ່າງອາເມລິກາ - ຈີນ ພວມຫຍຸ້ງເຫຍືອງ ແລະ ຮອບດ້ານໃນທຸກຂົງເຂດກວ່າເວລາໃດໝົດ, ອາຊຽນ ພວມມານະພະຍາຍາມເພື່ອຮັກສາບົດບາດໃຈກາງຂອງຕົນ, ສ້າງພາກພື້ນໃຫ້ມີສັນຕິພາບ, ສະຖຽນລະພາບຢ່າງບໍ່ຢຸດຢັ້ງ.
(ແຫຼ່ງຄັດຈາກ VOV)
