ຂ່າວສານ

10 ເຫດການ ແລະ ບັນຫາພົ້ນເດັ່ນຂອງ ຫວຽດນາມ ໃນປີ 2021 ໂດຍ VNA ເປັນຜູ້ຄັດເລືອກ

26/12/2021

ຂໍສະເໜີ 10 ເຫດການ ແລະ ບັນຫາພົ້ນເດັ່ນຢູ່ ຫວຽດນາມ ໃນ ປີ 2021 ໂດຍ VNA ຄັດເລືອກ.

1. ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XIII ຂອງ ພັກກອມມູນິດ ຫວຽດນາມ ສຳເລັດຢ່າງຈົບງາມ: ດຳເນີນແຕ່ວັນທີ 25 ມັງກອນ ເຖິງວັນທີ 1 ກຸມພາ 2021 ຢູ່ນະຄອນຫຼວງ ຮ່າໂນ້ຍ, ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XIII ຂອງ ພັກກອມມູນິດ ຫວຽດນາມ ສຳເລັດຢ່າງຈົບງາມ, ສ້າງຂີດໝາຍກ່ຽວກັບກອງປະຊຸມໃຫຍ່ໜຶ່ງ “ສາມັກຄີ-ປະຊາທິປະໄຕ-ວິໄນ-ຫົວຄິດປະດິດ ສ້າງ-ພັດທະນາ”; ເພີ່ມທະວີການກໍ່ສ້າງ, ປັບປຸງພັກ ແລະ ລະບົບການເມືອງໃຫ້ປອດໃສ, ໝັ້ນຄົງເຂັ້ມແຂງ; ສ້າງເຈດຈໍານົງ ແລະ ຄວາມຕັດສິນໃຈພັດທະນາປະເທດຊາດ, ເສີມຂະຫຍາຍ ກໍາລັງແຮງມະຫາສາມັກຄີທົ່ວປວງຊົນທັງຊາດ; ຍູ້ແຮງ ການປ່ຽນແປງໃໝ່ຢ່າງຮອບດ້ານ, ຄົບຊຸດ; ສ້າງສາ ແລະ ປົກປັກຮັກສາປະເທດຊາດ ໄວ້ໃຫ້ໝັ້ນຄົງ, ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ; ສູ້ຊົນ ຮອດກາງສະຕະວັດ XXI, ຫວຽດນາມ ກາຍເປັນປະເທດພັດທະນາ ຕາມການກໍານົດທິດສັງຄົມນິຍົມເມື່ອປີ 2045.

2. ຜູ້ມີສິດເລືອກຕັ້ງທົ່ວປະເທດເກືອບ 70 ລ້ານຄົນ ໄປປ່ອນບັດເລືອກຕັ້ງ ສະມາຊິກ ສະພາແຫ່ງຊາດ ຊຸດທີ XV ແລະ ສະມາຊິກ ສະພາປະຊາຊົນ ທຸກຂັ້ນ: ວັນທີ 23 ພຶດສະພາ 2021, ຜູ້ມີສິດເລືອກຕັ້ງທົ່ວປະເທດ 99,6% ໄດ້ໄປປ່ອນບັດເລືອກຕັ້ງ ສະມາຊິກ ສະພາແຫ່ງຊາດ ຊຸດທີ XV 499 ສະຫາຍ; ສະມາຊິກ ສະພາປະຊາຊົນ ຂັ້ນແຂວງ 3.721 ສະຫາຍ, ສະມາຊິກ ສະພາປະຊາຊົນ ຂັ້ນເມືອງ 22.550 ສະຫາຍ ແລະ ສະມາຊິກ ສະພາປະຊາຊົນ ຂັ້ນຕາແສງ 239.788 ສະຫາຍ, ອາຍຸການ 2021-2026.

3. ຫັນປ່ຽນຍຸດທະສາດ ສະກັດກັ້ນ ແລະ ຕ້ານ ໂຄວິດ-19: ການແຜ່ລະບາດຂອງເຊື້ອ ໄວຣັດ SARS-CoV-2 ສາຍພັນໃໝ່ Delta ໄດ້ທຳລາຍບັນດາຜົນງານໃນການສະກັດກັ້ນ ແລະ ຕ້ານ ໂຄວິດ-19 ດ້ວຍກໍລະນີຕິດ ໄວຣັດ SARS-CoV-2 ສາຍພັນໃໝ່ ແລະ ເສຍຊີວິດເພີ່ມສູງຂຶ້ນ ຢູ່ຫຼາຍທ້ອງຖິ່ນໃນທ່ົວປະເທດ, ພິເສດແມ່ນບັນດາແຂວງ, ນະຄອນພາກໃຕ້. ພັກ ແລະ ລັດ ໄດ້ຫັນປ່ຽນຍຸດທະສາດ ສະກັດກັ້ນ ແລະ ຕ້ານ ໂຄວິດ-19 ແຕ່ “ບໍ່ມີກໍລະນີຕິດ ໂຄວິດ-19” ມາເປັນປະຕິບັດເປົ້າໝາຍຄູ່. ການແຜ່ລະບາດຂອງເຊື້ອ ໄວຣັດ SARS-CoV-2 ຄັ້ງທີ 4 ໄດ້ເຮັດໃຫ້ທົ່ວປະເທດມີຜູ້ຕິດ ໂຄວິດ-19 ທັງໝົດ 1.630.851 ຄົນ, ຍົກຈຳນວນຜູ້ຕິດ ໂຄວິດ-19 ເປັນ 1.636.455 ຄົນ; ມີຜູ້ເສຍຊີວິດແມ່ນ 31.007 ຄົນ ແລະ 1.229.684 ຄົນເຊົາເຈັບ.

4. ປະຕິບັດສຳເລັດ ຍຸດທະວິທີ ວັກຊີນ: ພັກ, ລັດ ໄດ້ລະດົມທຸກແຫຼ່ງກຳລັງ, ພະຍາຍາມປະຕິບັດ ຍຸດທະວິທີ ວັກຊີນ ປ້ອງກັນເຊື້ອ ໂຄວິດ-19 ເພື່ອເປົ້າໝາຍ ຕ້ານທານຕໍ່ພະຍາດໃນປະຊາຄົມ ດ້ວຍບັນດາມາດຕະການ ສ້າງຕັ້ງກອງທຶນ ວັກຊີນ; ປະຕິບັດການທູດ ວັກຊີນ; ຄົ້ນຄວ້າຜະລິດ ວັກຊີນ ຢູ່ພາຍໃນ; ຈັດຕັ້ງການສັກ ວັກຊີນ ດ້ວຍຂະໜາດທີ່ບໍ່ເຄີນເຫັນມາກ່ອນໃນປະຫວັດສາດ ແລະ ມີບາງໄລຍະ ບັນລຸໄດ້ຄວາມໄວສູງກວ່າ 30% ເມື່ອທຽບກັບໂລກ.

5. ປະກາດໃຊ້ເອກະສານທີ່ສຳຄັນກ່ຽວກັບການກໍ່ສ້າງ, ປັບປຸງພັກ 5 ສະບັບ: ໃນປີທຳອິດຂອງກອງປະຊຸມໃຫຍ່ ຄັ້ງທີ XIII ອາຍຸການ 2021-2026, ພັກໄດ້ປະກາດໃຊ້: ບົດສະຫຼຸບເລກທີ 01-KL/TW ຂອງກົມການເມືອງ ກ່ຽວກັບການສືບຕໍ່ປະຕິບັດ ຄຳສັ່ງເລກທີ 05-CT/TW ອອກວັນທີ 15 ພຶດສະພາ 2016 “ກ່ຽວກັບຍູ້ແຮງການຮຳ່ຮຽນ ແລະ ປະຕິບັດ ຕາມແນວຄິດ, ຄຸນສົມບັດ ແລະ ແບບແຜນດຳລົງຊີວິດຂອງ ໂຮ່ຈີມິນ”; ຂໍ້ສະຫຼຸບເລກທີ 21-KL/TW, ກອງປະຊຸມສູນກາງ 4 ຊຸດທີ XIII “ກ່ຽວກັບຍູ້ແຮງການກໍ່ສ້າງ, ປັບປຸງພັກ ແລະ ລະບົບການເມືອງ” ແລະ ກົດລະບຽບເລກທີ 37-QD/TW “ກ່ຽວກັບສິ່ງທີ່ສະມາຊິກພັກບໍ່ໄດ້ເຮັດ”, ເອກະສານ 3 ສະບັບນີ້ມີຫຼາຍຈຸດໃໝ່ ແລະ ເພີ່ມເຕີມທາງດ້ານຂອບເຂດ, ເປົ້າໝາຍ, ວິທີແກ້ໄຂ...; ບົດສະຫຼຸບ ສະບັບເລກທີ 14-KL/TW ວ່າດ້ວຍການຊຸກຍູ້ ແລະ ປົກປ້ອງພະນັກງານຂະຫຍັນຂັນເຄື່ອນ, ມີຫົວຄິດປະດິດສ້າງ, ກ້າຄິດ, ກ້າເຮັດ ແລະ ກົດລະບຽບເລກທີ 41-QD/TW ວ່າດ້ວຍການປົດອອກ ແລະ ປົດຕໍາແໜ່ງພະນັກງານ, ໄດ້ອອກເອກະສານ 2 ສະບັບເປັນຄັ້ງທຳອິດ.

6. ກອງປະຊຸມວັດທະນະທຳແຫ່ງຊາດປຸກລະດົມແຫຼ່ງກຳລັງເກີດຂຶ້ນ ແລະ ຂະຫຍາຍຕົວໂດຍສາເຫດຈາກພາຍໃນ, UNESCO ສືບຕໍ່ເຊີດຊູວັດທະນະທຳ ຫວຽດນາມ: ກອງປະຊຸມວັດທະນະທຳແຫ່ງຊາດຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIII ຂອງພັກ ໄດ້ກຳນົດ 6 ເປົ້າໝາຍສະເພາະ ແລະ 10 ວິທີແກ້ໄຂສຳຄັນ, ສືບຕໍ່ປຸກລະດົມນ້ຳໃຈຮັກຊາດ, ກຸ້ມຕົນເອງ, ມຸ່ງໄປເຖິງການພັດທະນາປະເທດໃຫ້ຈະເລີນຮຸ່ງເຮືອງ; ຮັກສາເອກະລັກແຫ່ງຊາດ, ພັດທະນາວັດທະນະທຳຫວຽດນາມໃນໄລຍະໃໝ່; ຍູ້ແຮງບັນດາແຫຼ່ງກຳລັງເກີດຂຶ້ນ ແລະ ຂະຫຍາຍຕົວໂດຍສາເຫດຈາກພາຍໃນ ເພື່ອຜັນຂະຫຍາຍບັນດາຈຸດໝາຍພັດທະນາຂອງປະເທດຮອດປີ 2030, ມຸ່ງໄປເຖິງປີ 2045. ເຫດການນີ້ ໄດ້ຈັດຂຶ້ນໃນວັນທີ 24 ພະຈິກ 2021 ພາຍຫຼັງ 75 ປີ ກອງປະຊຸມວັດທະນະທໍາແຫ່ງຊາດຈັດຂຶ້ນຄັ້ງທໍາອິດ. ວັນທີ 15 ທັນວາ ປີ 2021, ອົງການການສຶກສາ, ວິທະຍາສາດ ແລະ ວັດທະນະທຳຂອງສະຫະປະຊາຊາດ (UNESCO) ໄດ້ຂຶ້ນທະບຽນສິລະປະ ຊອຍໄທ ເປັນມໍລະດົກທີ່ບໍ່ມີຮູບຮ່າງຂອງມະນຸດ. ກ່ອນໜ້ານັ້ນ, ວັນທີ 23 ພະຈິກ, ກອງປະຊຸມໃຫຍ່ອົງການ UNESCO ໄດ້ຕັດສິນໃຈຍ້ອງຍໍ ແລະ ສະເຫຼີມສະຫຼອງ: 200 ປີແຫ່ງວັນຄ້າຍວັນເກີດຂອງບຸລຸດຜູ້ມີຊື່ສຽງ ຫງວຽນດິງຈ້ຽວ; 250 ປີແຫ່ງວັນເກີດ ແລະ 200 ປີແຫ່ງການເສຍຊີວິດຂອງຈິດຕະກອນຍິງ ໂຮ່ຊວນເຮືອງ ໃນປີ 2022.

7. ຫວຽດນາມ ຕັ້ງໜ້າເຂົ້າຮ່ວມບັນດາກົນໄກຮ່ວມມືຫຼາຍຝ່າຍ: ທີ່ກອງປະຊຸມຄັ້ງທີ 26 ຂອງບັນດາຝ່າຍເຂົ້າຮ່ວມສົນທິສັນຍາຂອງສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດ (COP 26), ຫວຽດນາມ ໃຫ້ຄຳໝັ້ນສັນຍາຫຼຸດຜ່ອນການປ່ອຍອາຍພິດເຮືອນແກ້ວໃຫ້ເຫຼືອ “ສູນ” ຮອດປີ 2050, ຫຼຸດຜ່ອນ 30% ຂອງ methane. ອາຍແກັສ ຮອດປີ 2030 ທຽບໃສ່ປີ 2020..., ຢັ້ງຢືນຄວາມຕັດສິນໃຈດ້ານການເມືອງອັນໜັກແໜ້ນຂອງ ຫວຽດນາມ ໃນການເລັ່ງລັດການຫັນປ່ຽນຮູບແບບເສດຖະກິດໄປສູ່ການເຕີບໂຕສີຂຽວ ແລະ ຮັບມືກັບການປ່ຽນແປງຂອງດິນຟ້າອາກາດຢ່າງຮອບດ້ານ.

ນອກຈາກນັ້ນ, ຫວຽດນາມ ສືບຕໍ່ປະກອບສ່ວນຢ່າງຕັ້ງໜ້າ ແລະ ມີຄວາມຮັບຜິດຊອບໃນຂອບເຂດ ອາຊຽນ, AIPA, ASEM, ASEP, APEC, APPF…, ສຳເລັດການດຳລົງຕຳແໜ່ງສະມາຊິກບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ ສະໄໝທີ 2; ໄດ້ເລືອກຕັ້ງຄະນະກຳມະການກົດໝາຍສາກົນຂອງອົງການສະຫະປະຊາຊາດອາຍຸການ 2023-2027, ໄດ້ເລືອກຕັ້ງສະມາຊິກຄະນະບໍລິຫານງານອົງການ UNESCO ໄລຍະ 2021-2025.

8. ການຜັນແປຢ່າງໃຫຍ່ຫຼວງຂອງເສດຖະກິດ ແລະ ຄວາມມານະພະຍາຍາມຮັກສາຫຼາຍເສົາຄ້ຳການເຕີບໂຕ: GDP ໃນໄຕມາດທີ III/2021 ຫຼຸດລົງ 6,17% ເມື່ອທຽບໃສ່ໄລຍະດຽວກັນຂອງປີກາຍ, ແມ່ນການຫຼຸດລົງຢ່າງເລິກເຊິ່ງທີ່ສຸດນັບແຕ່ ຫວຽດນາມ ໄດ້ຄິດໄລ່ ແລະ ປະກາດໃຊ້ GDP ປະຈໍາໄຕມາດ ຍ້ອນຜົນກະທົບຂອງການແຜ່ລະບາດ ໂຄວິດ-19 ຄັ້ງທີ 4. ຂະແຫນງການບໍລິການ, ການຜະລິດອຸດສາຫະກໍາໃນພາກໃຕ້ ຫຼຸດລົງຢ່າງເລິກເຊິ່ງ ແລະ ເຖິງ 60% ປະຊາຊົນສູນເສຍວຽກເຮັດ ຫຼື ລາຍໄດ້ຫຼຸດລົງໃນໄຕມາດທີ III.

ສະພາແຫ່ງຊາດ ແລະ ລັດຖະບານ ໄດ້ມີຄວາມຕັດສິນໃຈຢ່າງແຂງແຮງເພື່ອລົບລ້າງຄວາມຫຍຸ້ງຍາກ, ໜູນຊ່ວຍປະຊາຊົນ ແລະ ດຳເນີນທຸລະກິດ, ເປີດກ້ວາງບັນດາແຫຼ່ງເງິນລົງທຶນ ແລະ ການຜະລິດ ເພື່ອບັນລຸເປົ້າໝາຍຄູ່ “ທັງປ້ອງກັນພະຍາດລະບາດ, ທັງພັດທະນາເສດຖະກິດ”. ຍ້ອນເຫດນັ້ນ, ຫວຽດນາມ ບັນລຸ ແລະ ເກີນຄາດໝາຍເສດຖະກິດສຳຄັນຈຳນວນໜຶ່ງຄື: ລາຍຮັບງົບປະມານ ຄາດຄະເນບັນລຸ 1.471 ຕື້ດົ່ງ, ສູງກວ່າການຄາດຄະເນ 9,5% ແລະ ສູງກວ່າຄາດໝາຍ 3% ຂອງລາຍຈ່າຍລັດຖະບານ; ການສົ່ງອອກບັນລຸໄດ້ລື່ນກາຍ 335 ຕື້ USD ແລະ ເກີນດຸນການຄ້າປະມານ 3 ຕື້ USD, ກາຍເປັນປະເທດທີ່ມີຍອດເກີນດຸນການຄ້າ 6 ປີຕິດຕໍ່ກັນ; ດຶງດູດແຫຼ່ງທຶນ FDI ໂດຍກົງກວ່າ 29 ຕື້ USD.

9. ລະບົບຖານຂໍ້ມູນປະຊາກອນແຫ່ງຊາດໄດ້ຮັບການປະຕິບັດເປັນຄັ້ງທຳອິດ: ລະບົບຖານຂໍ້ມູນປະຊາກອນແຫ່ງຊາດໄດ້ເລີ່ມປະຕິບັດແຕ່ວັນທີ 1 ກໍລະກົດ 2021 ເປັນພື້ນຖານອັນສຳຄັນໃນການພັດທະນາລັດຖະບານເອເລັກໂຕຣນິກ, ລັດຖະບານ ດີຈີຕອນ, ສັງຄົມ ດີຈີຕອນ. ຄຽງຄູ່ກັບການສຳເລັດເປົ້າໝາຍການອອກບັດປະຈຳຕົວພົນລະເມືອງດ້ວຍ ຊິບ ເອເລັກໂຕຣນິກ, ເປັນຄັ້ງທຳອິດບັນດາຂໍ້ມູນພື້ນຖານກ່ຽວກັບພົນລະເມືອງຫວຽດນາມ ໄດ້ຖືກມາດຕະຖານ, ເປັນ ດີຈີຕອນ ແລະ ເຂົ້າໃນລະບົບເຊື່ອມໂຍງເຂົ້າກັບການຄຸ້ມຄອງລັດ.

10. ກິລາ ຫວຽດນາມ ບັນລຸໄດ້ບັນດາຜົນງານທີ່ໜ້າປະທັບໃຈໃນສະພາບຄວາມຫຍຸ້ງຍາກ: ທິມບານເຕະຊາຍ ຫວຽດນາມ ຄັ້ງທຳອິດໃນປະຫວັດສາດໄດ້ເຂົ້າຮອບຄັດເລືອກຮອບທີ 3 ບານເຕະໂລກ 2022. ຄັ້ງທີ 2, ທິມ Futsal ຍາດໄດ້ສິດເຂົ້າຮ່ວມຮອບສຸດທ້າຍຂອງ FIFA Futsal World Cup, ສິ່ງດັ່ງກ່າວສະແດງໃຫ້ເຫັນຄວາມຄືບໜ້າທີ່ຍິ່ງໃຫຍ່ ເຖິງວ່າຈະມີການຢຸດເຊົາໃນຮອບ 1/8. ກ່ຽວກັບຜົນງານສ່ວນບຸກຄົນ, ນັກຍົກນ້ຳໜັກຄົນພິການ ເລວັນໂກງ ຍາດໄດ້ຫຼຽນເງິນໃນປະເພດຍົກນ້ຳໜັກ 49 ກິໂລຊາຍ ໃນງານມະຫາກຳກິລາ ພາຣາລິມປິກ 2020 ເຊິ່ງໄດ້ຈັດຂັ້ນຢູ່ ຍີ່ປຸ່ນ; ນັກມວຍຍິງ ຫງວຽນທິທູຍີ ກາຍເປັນນັກມວຍ ຫວຽດນາມ ຄົນທຳອິດທີ່ຄວ້າແຊ້ມ WBO ລຸ້ນນ້ຳໜັກເບົາ ໂລກ.