ທ່ານເລຂາທິການໃຫຍ່ ຫງວຽນຟູ໋ຈ້ອງ ພົບປະກັບບັນດານັກທຸລະກິດຈີນ
ຕອນເຊົ້າວັນທີ 15/1, ຢູ່ນະຄອນ ຄ໋າງເຈົາ, ແຂວງ ເຈື້ອຈຽງ, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ມີການພົບປະກັບບັນດານັກທຸລະກິດຈີນ. ກ່າວຄວາມເຫັນຢູ່ທີ່ນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ ຖືວ່າ, ພື້ນຖານເສດຖະກິດການຕະຫຼາດ ຕາມກຳນົດທິດສັງຄົມນິຍົມຢູ່ ຫວຽດນາມ ໃນປະຈຸບັນແມ່ນພື້ນຖານເສດຖະກິດການຕະຫຼາດທີ່ຫາກໍ່ພົ້ນເດັ່ນຂຶ້ນ, ດ້ວຍຈຳນວນພົນລະເມືອງ 92 ລ້ານຄົນ, ພວມໄດ້ຮັບການພັດທະນາ, ສະຖຽນລະພາບ ດ້ວຍລະດັບເຕີບໂຕຢ່າງຕໍ່ເນື່ອງແຕ່ 6-7%/ປີ, ມີລະດັບການເປີດປະຕູສູງ ແລະ ພວມເຊື່ອມໂຍງນັບມື້ນັບເລິກເຊິ່ງກວ້າງຂວາງໃນພາກພື້ນ ແລະ ໃນໂລກ ໄດ້ຮັບການຕີລາຄາວ່າ, ແມ່ນຕະຫຼາດທີ່ເຕັມໄປດ້ວຍຄວາມສາມາດບົ່ມຊ້ອນ ແລະ ສ້າງຄວາມດຶງດູດແຖວໜ້າກ່ຽວກັບການດຶງດູດນັກລົງທຶນຕ່າງປະເທດ.“ຫວຽດນາມຖືເປັນສຳຄັນທີ່ສຸດການພົວພັນຮ່ວມມືທາງດ້ານເສດຖະກິດ, ການຄ້າ ແລະ ການລົງທຶນກັບຈີນ; ສົ່ງເສີມ, ສະໜັບສະໜູນ ແລະ ພ້ອມແລ້ວທີ່ຈະສ້າງເງື່ອນໄຂສະດວກເພື່ອໃຫ້ບັນດາວິສາຫະກິດສອງປະເທດເພີ່ມທະວີການຮ່ວມມື, ປະກອບສ່ວນເຂົ້າໃນການພັດທະນາຂອງສອງປະເທດ ແລະ ປັບປຸງການພົວພັນ ຫວຽດນາມ - ຈີນ ກວ່າເກົ່າ. ພວກຂ້າພະເຈົ້າຊົມເຊີຍບັນດາວິສາຫະກິດ ຈີນ ທີ່ລົງທຶນເຂົ້າ ຫວຽດນາມ, ດ້ວຍບັນດາໂຄງການນຳໃຊ້ເຕັກໂນໂລຢີກ້າວໜ້າ, ບໍ່ສົ່ງມົນລະພິດເຖິງສິ່ງແວດລ້ອມ…., ເໝາະສົມກັບຄວາມຮຽກຮ້ອງຕ້ອງການ ແລະ ຍຸດທະສາດພັດທະນາຂອງ ຫວຽດນາມ; ຊົມເຊີຍບັນດາວິສາຫະກິດສອງປະເທດທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານຊຸກຍູ້ການພັດທະນາດ້ານການຄ້າຕ່າງຝ່າຍຕ່າງມີຜົນປະໂຫຍດ, ຍູ້ແຮງການເຄື່ອນໄຫວດ້ານການທ່ອງທ່ຽວ, ເພື່ອແນໃສ່ເພີ່ມທະວີການພົບປະແລກປ່ຽນ, ຄວາມເຂົ້າອົກເຂົ້າໃຈ ແລະ ມິດຕະພາບລະຫວ່າງປະຊາຊົນສອງປະເທດ“.
ກ່ອນໜ້ານັ້ນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ມີການພົບປະກັບກົງສູນໃຫຍ່ ຫວຽດນາມ ປະຈຳຊຽງໄຮ້. ນະທີ່ນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ ຮຽກຮ້ອງວ່າໃນສະພາບການໃໝ່, ໝູ່ພະນັກງານ, ພາລະກອນກົງສູນໃຫຍ່ຈົ່ງສືບຕໍ່ມານະພະຍາຍາມແກ້ໄຂຄວາມຫຍຸ້ງຍາກ, ປະຕິບັດບົດບາດເປັນເສນາທິການ ແລະ ຂົວເຊື່ອມຈອດໃຫ້ດີເພື່ອຊຸກຍູ້ການພົວພັນລະຫວ່າງສອງພັກ, ສອງລັດໃຫ້ນັບມື້ນັບພັດທະນາ ກ້າວເຂົ້າສູ່ລວງເລິກ, ແທດຈິງ.
ແລະກໍ່ໃນຕອນເຊົ້າວັນທີ 15/1, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ໄປຢ້ຽມຢາມກຸ່ມບໍລິສັດ ຟ໋ານຊູຫລາຍ ເຊິ່ງແມ່ນວິສາຫະກິດແຖວໜ້າຂອງ ເຈື້ອຈຽງ ແລະ ຈີນໃນຂົງເຂດຜະລິດແພໄໝ.
ຕອນບ່າຍວັນທີ 15/1, ທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ເດີນທາງອອກຈາກນະຄອນ ຄ໋າງເຈົາ ກັບຄືນປະເທດ, ສິ້ນສຸດການຢ້ຽມຢາມຈີນເປັນທາງການຢ່າງຈົບງາມ.
(ແຫຼ່ງຄັດຈາກ VOV)
