ພະຍາບານເບິ່ງແຍງດູແລຜູ້ຕິດເຊື້ອພະຍາດ Covid - 19 (ພາບ: AFP/TTXVN)
ທ່ານ Tedros Adhanom Ghebreyesus ຜູ້ອຳນວຍໃຫຍ່ການ WHO ຖະແຫຼງວ່າ ມີເປັນໜ້າເສຍດາຍຕໍ່ການຕັດສິນໃຈຂອງ ທ່ານປະທານາທິບໍດີອາເມລິກາ Donald Trump ແລະ ຢັ້ງຢືນວ່າ ສິ່ງທີ່ WHO ເອົາໃຈໃສ່ທີ່ສຸດໃນຈຸດເວລານີ້ແມ່ນສະກັດກັ້ນ ເຊື້ອໄວຣັດ ເພື່ອກູ້ຊ່ວຍເອົາຊີວິດຂອງປະຊາຊົນນັບຫຼາຍລ້ານຄົນໃນທົ່ວໂລກ. ທ່ານກໍ່ປະຕິເສດບັນດາຂໍ້ກ່າວຫາຂອງທ່ານປະທານາທິບໍດີ ອາເມລິກາ Donald Trump ວ່າ WHO ມີການກະທຳຢ່າງຊັກຊ້າ ແລະ ບໍ່ອອກຄຳກ່າວເຕືອນໃນໄລຍະເບື້ອງຕົ້ນໂດຍໄວ ໄລຍະທີ່ໂລກລະບາດ Covid – 19 ຫາກໍ່ເກີດຂຶ້ນຢູ່ ອູຫັນ ປະເທດຈີນ.
ໃນຂະນະນັ້ນ, ການນຳບັນດາອົງການຈັດຕັ້ງສາກົນ ແລະ ການນຳບັນດາປະເທດເອີລົບບໍ່ເຫັນດີເຫັນພ້ອມກັບການຕັດສິນໃຈຂອງ ທ່ານ D.Trump ໃນຊ່ວງເວລານີ້. ອັງກິດກໍ່ຖະແຫຼງວ່າ ຈະບໍ່ປະຕິບັດຕາມອາເມລິກາ ແລະ ຈະປະກອບສ່ວນເງິນ 200 ລ້ານປອນໃຫ້ແກ່ WHO. ຄະນະກຳມະການເອີລົບກໍ່ໄດ້ຈັດກອງປະຊຸມປຶກສາຫາລືກັບບັນດາປະເທດສະມາຊິກ ແລະ ເຫັນດີເປັນເອກະພາບຈະເບີກຈ່າຍຈຳນວນຫຼາຍກວ່າ 20 ຕື້ ເອີໂຣ ໃຫ້ແກ່ບັ້ນປ້ອງກັນ, ສະກັດກັ້ນໂລກລະບາດນີ້.ໃນສະພາບການຄືປັດຈຸບັນ, ຖ້າຫາກວ່າ ອາເມລິກາ ຢຸດຕິການສະໜອງງົບປະມານການໃຊ້ຈ່າຍທັງໝົດໃຫ້ແກ່ WHO ຢ່າງເປັນທາງການ, ຈະກໍ່ຜົນສະທ້ອນຢ່າງໜັກໜ່ວງ ເຖິງບັນດາການເຄື່ອນໄຫວຂອງ ອົງການນີ້ໃນໄລຍະຈະມາເຖິງ. ນີ້ບໍ່ ພຽງແຕ່ແມ່ນການ ນຳພາຄວາມມານະພະຍາຍາມທົ່ວໂລກເພື່ອຮັບມືກັບໂລກລະບາດ Covid – 19 ໃນປັດຈຸບັນເທົ່ານັ້ນ ຫາກຍັງແມ່ນການຜັນຂະຫຍາຍບັນດາມາດຕະການປ້ອງກັນ, ສະກັດກັ້ນບັນດາພະຍາດຕິດແປດທີ່ອັນຕະລາຍອື່ນໆອີກດ້ວຍ.
(ແຫຼ່ງຄັດຈາກ VOV)
