ປຶກສາຫາລືທີ່ກອງປະຊຸມ, ບັນດາຜູ້ແທນຖືວ່າ ການແຜ່ລະບາດຮອບທີ 4 ນີ້ແມ່ນມີຄວາມສັບສົນທີ່ສຸດ, ມີການຜັນແປຢ່າງໄວວາ ແລະ ອັນຕະລາຍ; ສົ່ງຜົນກະທົບຢ່າງໃຫຍ່ຫຼວງຕໍ່ຊີວິດອິນຊີ, ສຸຂະພາບ ແລະ ການດຳລົງຊີວິດຂອງປະຊາຊົນ ແລະ ທຸກດ້ານໃນເສດຖະກິດ - ສັງຄົມຂອງປະເທດຊາດ. ແຕ່ຍ້ອນມີຄວາມຕັດສິນໃຈສູງ, ຄວາມເຫັນດີເປັນເອກະພາບ, ເປັນຈິດໜຶ່ງໃຈດຽວ, ຮ່ວມແຮງຮ່ວມໃຈຂອງທັງລະບົບການເມືອງ, ຂອງປະຊາຊົນ, ສະພາບໂລກລະບາດໂຄວິດ - 19 ໃນທົ່ວປະເທດໄດ້ຮັບການຄວບຄຸມໂດຍພື້ນຖານ.
ກ່າວສະຫຼຸບກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ໄດ້ເນັ້ນໜັກວ່າ ການຜັນປ່ຽນທີ່ບັນລຸໄດ້ໃນວຽກງານປ້ອງກັນ, ຕ້ານໂລກລະບາດໃນໄລຍະຜ່ານມາ ຈະສືບຕໍ່ໄດ້ພິສູດໃຫ້ເຫັນວ່າ ວຽກງານປ້ອງກັນ, ຕ້ານໂລກລະບາດພວມໄປຖືກທິດ ແລະ ບັນລຸໄດ້ໝາກຜົນອັນຕັ້ງໜ້າ. ໃນໄລຍະຈະມາເຖິງ, ທ່ານນາຍົກລັດຖະມົນຕີ ກໍຮຽກຮ້ອງໃຫ້ອຳນາດການປົກຄອງທຸກຂັ້ນ, ທຸກຂະແໜງການ ແລະ ທ້ອງຖິ່ນ ຈົ່ງເປັນເຈົ້າການກໍ່ສ້າງ ແລະ ຈັດຕັ້ງແຜນການຮັບມືຢ່າງປອດໄພ, ມີໄຫວພິບ, ຄວບຄຸມໂລກລະບາດໄດ້ຢ່າງມີປະສິດທິຜົນ. ສືບຕໍ່ນຳເຂົ້າວັກຊິນກັນພະຍາດໂຄວິດ - 19 ແລະ ຊຸກຍູ້ການຜະລິດວັກຊິນພາຍໃນປະເທດ; ມີມາດຕະການສັງລວມ, ລະດົມແຫຼ່ງກຳລັງສັງຄົມເຂົ້າຮ່ວມວຽກງານຊ່ວຍໜູນສັງຄົມ. ທ້ອງຖິ່ນແຫ່ງຕ່າງໆ ສືບຕໍ່ເປັນເຈົ້າການ, ອັບເດັດສະພາບການໂລກລະບາດໃນບໍລິເວນເປັນປະຈຳ, ກໍ່ສ້າງ ແລະ ຜັນຂະຫຍາຍແຜນການຟື້ນຟູ ແລະ ພັດທະນາເສດຖະກິດ - ສັງຄົມ, ສູ້ຊົນບັນລຸບັນດາເປົ້າໝາຍ, ຄາດໝາຍຂອງປີ 2021 ທີ່ໄດ້ວາງອອກໃຫ້ຢູ່ໃນລະດັບສູງສຸດ.
(ແຫຼ່ງຄັດຈາກ VOV)
