ໂຄສົກກະຊວງການຕ່າງປະເທດ ຫວຽດນາມ ທ່ານນາງ ເລທິທູຮັ່ງ
ວັນທີ 09/04/2017, ເມື່ອຕອບສຳພາດຕໍ່ນັກຂ່າວກ່ຽວກັບປະຕິກິລິຍາຂອງ ຫວຽດນາມ ຕໍ່ແຫຼ່ງຂ່າວ ທ່ານປະທານາທິບໍດີ ຟີລິບປີນ Duterte ອອກຄຳສັ່ງໃຫ້ກອງທັບຢືດຄອງທຸກໂຄງສ້າງພູມສາດເຊິ່ງ ຟີລິບປີນ ມີຄຳຮຽກສິດອະທິປະໄຕຢູ່ທະເລຕາເວັນອອກ ແຕ່ຍັງບໍ່ທັນຖືກຝ່າຍໃດຢືດຄອງ ກໍ່ຄືຖະແຫຼງ ຈະຢ້ຽມຢາມເກາະ ທິຕື ທີ່ຂຶ້ນກັບໝູ່ເກາະ ເຈື່ອງຊາ ຂອງ ຫວຽດນາມ ໃນໄລຍະຈະມາເຖິງ, ໂຄສົກກະຊວງການຕ່າງປະເທດ ຫວຽດນາມ ທ່ານນາງ ເລທິທູຮັ່ງ ຊີ້ແຈ້ງວ່າ ຫວຽດນາມ ເອົາໃຈໃສ່ ແລະ ພວມຕິດຕາມ, ກຳນົດບັນດາແຫຼ່ງຂ່າວນີ້. ຫວຽດນາມ ມີພະຍານຫຼັກຖານປະຫວັດສາດ ແລະ ພື້ນຖານນິຕິກຳຢ່າງຄົບຖ້ວນ ເພື່ອຢັ້ງຢືນອະທິປະໄຕຂອງຕົນສຳລັບ 2 ໝູ່ເກາະ ຮ່ວາງຊາ ແລະ ເຈື່ອງຊາ, ທຸກການກະທຳຂອງປະເທດອື່ນໆຢູ່ 2 ໝູ່ເກາະດັ່ງກ່າວ ຖ້າບໍ່ໄດ້ຮັບການອະນຸຍາດຂອງ ຫວຽດນາມ ລ້ວນແຕ່ຜິດກົດໝາຍ ແລະ ໄຮ້ຄຸນຄ່າ. ທ່ານນາງ ເລທິທູຮັ່ງ ເນັ້ນໜັກວ່າ ຫຼັກໝັ້ນສະເໝີຕົ້ນສະເໝີປາຍຂອງ ຫວຽດນາມ ກ່ຽວກັບບັນຫາທະເລຕາເວັນອອກ ນັ້ນແມ່ນ ທຸກການຂັດແຍ້ງກັນຕ້ອງໄດ້ຮັບການແກ້ໄຂດ້ວຍສັນຕິວິທີ ບົນພື້ນຖານກົດໝາຍສາກົນ. ໃນຂະນະທີ່ພວມລໍຖ້າຊອກຫາມາດຕະການແກ້ໄຂໂດຍພື້ນຖານ ແລະ ຍາວນານໃຫ້ແກ່ການຂັດແຍ້ງກັນ, ບັນດາຝ່າຍຄວນລະງັບໃຈ, ບໍ່ໃຫ້ເກີດບັນດາການກະທຳເຮັດໃຫ້ສະພາບການສັບສົນວຸ້ນວາຍ ຫຼື ເປີດກ້ວາງການຂັດແຍ້ງກັນ, ເໝາະສົມກັບຈິດໃຈ ແລະ ເນື້ອໃນຈິດໃຈຂອງຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ປີ 2002.
(ແຫຼ່ງຄັດຈາກ VOV)
