ສປປ ລາວ ຫາກໍ່ໄດ້ຈັດຕັ້ງກອງປະຊຸມສຳມະນາກ່ຽວກັບການກະກຽມໃຫ້ວຽກງານຈັດຕັ້ງປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2022. 

ທ່ານ ບຸນທອງ ຈິດມະນີ, ຮອງປະທານປະເທດ ແຫ່ງ ສປປ ລາວ, ຫົວໜ້າຄະນະຊີ້ນຳແຫ່ງຊາດ ຮັບຜິດຊອບການສະເຫຼີມສະຫຼອງປີສາມັກຄີ ລາວ - ຫວຽດນາມ 2022 (ພາບ: lnr.org.la )

ກ່າວຄຳເຫັນຢູ່ນີ້, ທ່ານ ບຸນທອງ ຈິດມະນີ, ຮອງປະທານປະເທດ ແຫ່ງ ສປປ ລາວ, ຫົວໜ້າຄະນະຊີ້ນຳແຫ່ງຊາດ ຮັບຜິດຊອບການສະເຫຼີມສະຫຼອງປີສາມັກຄີ ລາວ - ຫວຽດນາມ 2022 ໄດ້ເນັ້ນໜັກວ່າ ປີ 2022 ມີຄວາມໝາຍສຳຄັນພິເສດຕໍ່ 2 ປະເທດ ລາວ ແລະ ຫວຽດນາມ. 2 ປະເທດຈະສະເຫຼີມສະຫຼອງ 60 ປີແຫ່ງວັນສ້າງສາຍພົວພັນການທູດ (5 ກັນຍາ 1962 – 5 ກັນຍາ 2022) ແລະ 45 ປີແຫ່ງວັນລົງນາມສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ (18 ກໍລະກົດ 1977 – 18 ກໍລະກົດ 2022). ການສະເຫຼີມສະຫຼອງ 2 ວັນປະຫວັດສາດທີ່ມີຄວາມໝາຍສຳຄັນຕໍ່ພັກ, ລັດ ກໍ່ຄືປະຊາຊົນ 2 ປະເທດ ລາວ ແລະ ຫວຽດນາມ, ເປັນໂອກາດເພື່ອທົບທວນຄືນມູນເຊື້ອສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ - ຫວຽດນາມ ຕັ້ງແຕ່ໄລຍະຕໍ່ສູ້ປົດປ່ອຍປະເທດຊາດຕະຫຼອດຮອດໄລຍະສ້າງສາ ແລະ ພັດທະນາປະເທດຊາດປະຈຸບັນ. ນີ້ກໍ່ແມ່ນໜຶ່ງໃນບັນດາການເຄື່ອນໄຫວດຳເນີນຊີວິດດ້ານການເມືອງແນວຄິດໃຫຍ່ສຳລັບພະນັກງານ, ພາລະກອນ, ທະຫານ, ຕຳຫຼວດ ແລະ ປະຊາຊົນທຸກຄົນ, ພິເສດແມ່ນຄົນລຸ້ນໜຸ່ມ ໄດ້ຮູ້ ແລະ ເຂົ້າໃຈຢ່າງຖືກຕ້ອງ, ເລິກເຊິ່ງກ່ຽວກັບສາຍພົວພັນ ລາວ - ຫວຽດນາມ.

(ແຫຼ່ງຄັດຈາກ VOV)