ທ່ານເລຂາທິການໃຫຍ່ ຫງວຽນຟູຈ້ອງ ພົບປະກັບອະດີດການນຳພັກ, ລັດ.
(ພາບ: ສຳນັກຂ່າວສານຫວຽດນາມ)
ຕອນເຊົ້າວັນທີ 19 ກຸມພາ, ຢູ່ ສຳນັກງານສູນກາງພັກ, ພາຍໃຕ້ການເປັນປະທານຂອງທ່ານເລຂາທິການໃຫຍ່ ຫງວຽນຟູຈ້ອງ, ກົມການເມືອງ, ຄະນະເລຂາໄດ້ຈັດຕັ້ງການພົບປະສັງສັນຕົ້ນລະດູບານໃຫມ່ປີຂານ 2022 ເນື່ອງໃນໂອກາດສະເຫລີມສະຫລອງ 92 ປີແຫ່ງວັນສ້າງຕັ້ງພັກ (03/02/1930 – 03/02/2022) ດ້ວຍການເຂົ້າຮ່ວມຂອງຜູ້ແທນກວ່າ 250 ຄົນຊື່ງແມ່ນບັນດາອະດີດການນຳຂັ້ນສູງຂອງພັກ, ລັດ, ແນວໂຮມປະເທດຊາດຫວຽດນາມ.
ທ່ານເລຂາທິການໃຫຍ່ ຫງວຽນຟູຈ້ອງ ໄດ້ສົ່ງຄຳອວຍພອນປີໃຫມ່ມາຍັງບັນດາຜູ້ແທນພ້ອມກັບຄອບຄົວ ປີໃຫມ່ມີສຸຂະພາບເຂັ້ມແຂງ, ມີຄວາມສະຫງົບສຸກ ແລະ ສິ່ງທີ່ດີງາມ. ທ່ານເລຂາທິການໃຫຍ່ ຢັ້ງຢືນ: ຫວຽດນາມ ຜ່ານຜ່າປີ 2021 ດ້ວຍຫລາຍເຫດການສຳຄັນຍິ່ງ, ຟົດຟື້ນ ແລະ ອຸດົມສົມບູນ ສ້າງສິ່ງທີ່ປະທັບໃຈອັນດີງາມຫລາຍຢ່າງ, ປະກອບສ່ວນສືບຕໍ່ປັບປຸງ, ເພີ່ມທະວີຄວາມໄວ້ເນື້ອເຊື່ອໃຈຂອງປະຊາຊົນຕໍ່ກັບ ພັກ, ລັດ.
ເມື່ອເວົ້າເຖິງຫນ້າທີ່ໃນໄລຍະຈະມາເຖິງ, ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ: ໃນສະພາບການໂລກ ແລະ ພາຍໃນປະເທດ ຄຽງຂ້າງສິ່ງທີ່ສະດວກ, ກາລະໂອກາດ ແລ້ວ ກໍຍັງມີຄວາມຫຍຸ້ງຍາກ ສິ່ງທ້າທາຍບໍ່ແມ່ນຫນ້ອຍ, ຮຽກຮ້ອງທົ່ວພັກທົ່ວກອງທັບ ແລະ ທົ່ວປວງຊົນ ຕ້ອງມີຄວາມຕັດສິນໃຈສູງ, ສາມັກຄີ, ເປັນເອກະພາບ ເພື່ອສືບຕໍ່ມີແຜນນະໂຍບາຍລັດຖະນະໂຍບາຍອັນຖືກຕ້ອງ, ວິທີການອັນຖືກຕ້ອງເພື່ອແນໃສ່ນຳປະເທດຊາດສືບຕໍ່ພັດທະນາແບບຍືນຍົງ, ໃນນັ້ນ ຈຳເປັນສືບຕໍ່ໄດ້ຮັບຄຳເຫັນຢ່າງສຸດຈິດສຸດໃຈແລະ ມີຄວາມຮັບຜິດຊອບຂອງບັນດາພະນັກງານຂັ້ນສູງຂອງພັກ, ລັດ ຜ່ານຫລາຍໄລຍະ.
ທ່ານເລຂາທິການໃຫຍ່ ປາດຖະຫນາຢາກບັນດາອະດີດການນຳພັກ, ລັດ ດ້ວຍບັນດາບົດຮຽນ ປະສົບການທີ່ຖອດຖອນມາໄດ້ ອີງຕາມເງື່ອນໄຂຂອງແຕ່ລະຄົນ ສືບຕໍ່ມີບັນດາການອຸທິດສ່ວນ, ປະກອບສ່ວນໃຫ້ແກ່ພາລະກິດປະຕິວັດຂອງພັກ, ລັດ ແລະ ປະຊາຊົນຫວຽດນາມ.
