ຕອນບ່າຍວັນທີ 28 ກໍລະກົດ, ຢູ່ສຳນັກງານສູນກາງພັກກອມມູນິດ ຫວຽດນາມ, ທ່ີ ຮ່າໂນ້ຍ, ທ່ານ ໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໄດ້ຕ້ອນຮັບທ່ານ ໄພວີ ສີບົວລິພາ, ປະທານສານປະຊາຊົນສູງສຸດແຫ່ງປະເທດ ສປປ.ລາວ ທີ່ພວມຢ້ຽມຢາມ ຫວຽດນາມ ຢ່າງເປັນທາງການ.
ທີ່ການຕ້ອນຮັບ, ທ່ານເລຂາທິການໃຫຍ່, ປະທານປະເທດ ໂຕເລິມ ສະເໜີໃຫ້ສານປະຊາຊົນ 2 ປະເທດ ຕ້ອງຍູ້ແຮງການຮ່ວມມືໃນການຫັນເປັນດີຈີຕອນ ແລະ ນຳໃຊ້ເຕັກໂນໂລຊີຂໍ້ມູນຂ່າວສານ, ໃນນັ້ນ ຖືເປັນສຳຄັນການຮ່ວມມືສ້າງສານເອເລັກໂຕນິກ ແລະ ການຫັນເປັນດີຈີຕອນ. ທ່ານກໍ່ສະເໜີໃຫ້ສານປະຊາຊົນສູງສຸດ 3 ປະເທດ ຫວຽດນາມ, ລາວ ແລະ ກຳປູເຈຍ ສືບຕໍ່ເສີມຂະຫຍາຍບົດບາດນຳໜ້າໃນການຊຸກຍູ້ການຮ່ວມມືດ້ານຕຸລາການ ແລະ ເປີດກວ້າງການຮ່ວມມືກັບຂະແໜງສານ ໄທ, ມຽນມາ ແລະ ບັນດາປະເທດເຂດອະນຸພາກພື້ນ, ສ້າງກົນໄກສົມທົບກັນກ່ຽວກັບບັນຫານິຕິກຳ, ຍຸຕິທຳທີ່ຕ່າງຝ່າຍຕ່າງມີຄວາມສົນໃຈເທື່ອລະກ້າວ.
ສ່ວນທ່ານ ໄພວີ ສີບົວລິພາ, ປະທານສານປະຊາຊົນສູງສຸດ ຢືນຢັນວ່າ ສານປະຊາຊົນສູງສຸດ ລາວ ຈະສົມທົບກັນກັບສານປະຊາຊົນສູງສຸດ ຫວຽດນາມ ເພື່ອຜັນຂະຫຍາຍບັນດາຄວາມຮັບຮູ້ລວມຂອງການນຳຂັ້ນສູງ 2 ພັກ, 2 ລັດໃຫ້ມີປະສິດທິຜົນ; ສືບຕໍ່ສຶກສາມູນເຊື້ອນ້ຳໃຈສາມັກຄີແບບພິເສດ ຫວຽດນາມ - ລາວ ໃຫ້ແກ່ຖັນແຖວພະນັກງານ, ພາລະກອນຂະແໜງສານຂອງ 2 ປະເທດ, ປະກອບສ່ວນອະນຸລັກຮັກສາ ແລະ ເສີມຂະຫຍາຍສາຍພົວພັນອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຄີ ລາວ - ຫວຽດນາມ.
