ທ່ານລັດຖະມົນຕີກະຊວງການຕ່າງປະເທດຫວຽດນາມ ບຸ່ຍແທັງເຊີນ ໂອ້ລົມສົນທະນາກັບທ່ານລັດຖະມົນຕີກະຊວງການຕ່າງປະເທດ ອາຣັບບິ ຊາອຸດິ (ພາບ: TTXVN)  

 ທີ່ການໂອ້ລົມສົນທະນາ, ທ່ານລັດຖະມົນຕີກະຊວງການຕ່າງປະເທດ ບຸ່ຍແທັງເຊີນ ແລະ ທ່ານລັດຖະມົນຕີກະຊວງການຕ່າງປະເທດ ອາຣັບບິ ຊາອຸດິ Faisal Bin Farhan Al Saud ໄດ້ເຫັນດີເປັນເອກະພາບ ໂດຍຕີລາຄາວ່າ ການພົວພັນຮ່ວມມື ຫວຽດນາມ - ອາຣັບບິ ຊາອຸດິ ໃນໄລຍະຜ່ານມາ ມີການພັດທະນາຢ່າງຕັ້ງໜ້າໃນຫຼາຍຂົງເຂດທີ່ແຕກຕ່າງກັນ. ການພົວພັນດ້ານການເມືອງພັດທະນາດີງາມ ເຊິ່ງສະແດງໃຫ້ເຫັນຜ່ານການໂອ້ລົມທາງໂທລະສັບ, ການພົບປະໂດຍກົງ ລະຫວ່າງການນຳກະຊວງການຕ່າງປະເທດສອງປະເທດ, ສອງຝ່າຍຮັກສາການສົມທົບ ແລະ ສະໜັບສະໜູນເຊິ່ງກັນແລະກັນຢູ່ອົງການຈັດຕັ້ງສາກົນ.

ສອງຝ່າຍໄດ້ເຫັນດີເປັນເອກະພາບນຳກັນວ່າຄວນສືບຕໍ່ຮັກສາ ແລະ ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຂັ້ນສູງ, ສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນແລະກັນ ຢູ່ອົງການຈັດຕັ້ງສາກົນ, ໂດຍສະເພາະແມ່ນ ຢູ່ ສປຊ, ສອງຝ່າຍກໍ່ຢັ້ງຢືນການສະໜັບສະໜູນຕໍ່ລັດທິຫຼາຍຝ່າຍ, ແກ້ໄຂຄວາມບໍ່ລົງລອຍກັນບົນພື້ນຖານການເຈລະຈາ ແລະ ອີງໃສ່ກົດໝາຍສາກົນ. ລັດຖະມົນຕີສອງທ່ານກໍ່ເຫັນດີເປັນເອກະພາບຕໍ່ການຜັນຂະຫຍາຍກົນໄກຮ່ວມມືຄືຄະນະກຳມະການລະຫວ່າງລັດຖະບານ, ການປຶກສາຫາລືດ້ານການເມືອງລະຫວ່າງ 2 ກະຊວງການຕ່າງປະເທດ, ຊຸກຍູ້ການເຈລະຈາ ແລະ ລົງນາມສັນຍາວ່າດ້ວຍການສົ່ງເສີມ ແລະ ອາລັກຂາການລົງທຶນ, ເພີ່ມທະວີການພົວພັນແລກປ່ຽນປະຊາຊົນ...