(ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ)

      ຕອນເຊົ້າວັນທີ 25 ກໍລະກົດ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ເປັນປະທານກອງປະຊຸມຄະນະປະຈຳລັດຖະບານກ່ຽວກັບການປ້ອງກັນ, ຕ້ານໂລກລະບາດໂຄວິດ-19. ທ່ານນາຍົກລັດຖະມົນຕີ ຫງວຽນຊວັນຟຸກ ຊີ້ແຈ້ງວ່າ, ໃນໄລຍະຜ່ານມາ, ບັນດາອົງການທີ່ມີບົດບາດໜ້າທີ່ໄດ້ມີຄວາມຕັດສິນໃຈ, ມານະພະຍາຍາມຢ່າງສູງ ແລະ ບັນລຸໄດ້ຜົນສຳເລັດໃນການຄວບຄຸມໂລກລະບາດ, ປະກອບສ່ວນສະກັດກັ້ນສະພາບໂລກລະບາດແຜ່ລະບາດຍ້ອນຜູ້ຕິດເຊື້ອລອດເຂົ້າມາຫວຽດນາມ ຢ່າງມີປະສິດທິຜົນ. ເຖິງຢ່າງໃດກໍ່ຕາມ, ດ້ວຍປະເທດໜຶ່ງທີ່ມີເສັ້ນຊາຍແດນທາງບົກ ແລະ ທາງທະເລຍາວໄກ, ເລື່ອງຄວບຄຸມໂລກລະບາດກໍ່ປະສົບກັບຄວາມຫຍຸ້ງຍາກຫຼາຍຢ່າງ. ໃນເບື້ອງຕົ້ນ, ຫວຽດນາມ ອະນຸຍາດໃຫ້ບັນດານັກຊ່ຽວຊານຕ່າງປະເທດເຂົ້າມາເຮັດວຽກຢູ່ ຫວຽດນາມ, ຮັບພົນລະເມືອງຫວຽດນາມ ກັບມາຈາກຕ່າງປະເທດ. ບັນດາເປົ້າໝາຍດັ່ງກ່າວລ້ວນແຕ່ໄດ້ປະຕິບັດບັນດາມາດຕະການດ້ານການແພດທີ່ຈຳເປັນ, ຮັບປະກັນວ່າ ຖ້າຫາກມີກໍລະນີຕິດໂລກລະບາດໂຄວິດ-19 ນັ້ນກໍບໍ່ສາມາດຕິດແປດໃສ່ຊຸມຊົນ. ກ່ຽວກັບກໍລະນີມີຜົນກວດເປັນບວກຢູ່ດ່ານັ້ງ, ທ່ານນາຍົກລັດຖະມົນຕີຖືວ່າ, ພວກເຮົາຕ້ອງທຸ່ນທ່ຽງໃຈ, ຍົກອອກບັນດາທິດ, ມາດຕະການແກ້ໄຂທີ່ຈຳເປັນເພື່ອຄວບຄຸມ, ບໍ່ປະໃຫ້ແຜ່ລະບາດໃສ່ຊຸມຊົນ.

 (ແຫຼ່ງຄັດຈາກ VOV)