ສະຖານທູດຫວຽດນາມ ປະຈຳກຳປູເຈຍ ຈັດຕັ້ງລາຍການອວຍພອນປີໃໝ່
(ພາບປະກອບ: TTXVN)
ວັນທີ 23/01, ສະຖານທູດຫວຽດນາມ ປະຈຳກຳປູເຈຍ ໄດ້ຈັດຕັ້ງລາຍການອວຍພອນປີໃໝ່, ມອບຂອງຂວັນໃຫ້ພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດທີ່ປະສົບກັບຄວາມຫຍຸ້ງຍາກຢູ່ແຂວງ Kandal, ເພື່ອແນໃສ່ຊ່ວຍປະຊາຄົມຊາວຫວຽດນາມ ອາໄສຢູ່ທີ່ນີ້ໄດ້ຕ້ອນຮັບບຸນເຕັດດ້ວຍຄວາມອົບອຸ່ນ ແລະ ຄົບຖ້ວນ. ນີ້ແມ່ນໜຶ່ງໃນບັນດາການເຄື່ອນໄຫວກຸສົນ ແລະ ວຽກງານປະຊາຄົມໂດຍສະຖານທູດສົມທົບກັບທະນາຄານກະສິກຳ ແລະ ພັດທະນາຊົນນະບົດຫວຽດນາມ ຢູ່ກຳປູເຈຍ ຈັດຕັ້ງ. ຄະນະປະຕິບັດງານໄດ້ມອບຂອມຂວັນ 200 ພູດ, ແຕ່ລະພູດແມ່ນເຂົ້າສານ 20 ໂລ ໃຫ້ບັນດາຄອບຄົວຊາວຫວຽດນາມ ອາໄສຢູ່ຕ່າງປະເທດທີ່ປະສົບກັບຄວາມຫຍຸ້ງຍາກຢູ່ເມືອງ Kean Svay.(ພາບປະກອບ: TTXVN)
ຕອນຄ່່ຳວັນທີ 23/01, ສະຖານທູດຫວຽດນາມ ປະຈຳອິນໂດເນເຊຍ ໄດ້ຈັດຕັ້ງພິທີຕ້ອນຮັບບຸນເຕັດປະຊາຄົມປີລະກາ ດ້ວຍການເຂົ້າຮ່ວມຂອງພະນັກງານບັນດາອົງການຕາງໜ້າຫວຽດນາມ, ພໍ່ແມ່ປະຊາຊົນຊາວຫວຽດນາມ, ນັກສຶກສາ, ນັກຮຽນທີ່ພວມເຮັດວຽກ, ຮ່ຳຮຽນຢູ່ອິນໂດເນເຊຍ, ພ້ອມກັບຜູ້ຕາງໜ້າສະຖານທູດບາງປະເທດ ແລະ ບາງອົງການຈັດຕັ້ງຂອງອິນໂດເນເຊຍ ເກືອບ 300 ຄົນ. ກ່າວຄຳເຫັນທີ່ພິທີ, ທ່ານເອກອັກຄະລັດຖະທູດຫວຽດນາມ ປະຈຳອິນໂດເນເຊຍ ຮ່ວາງແອງຕ໋ວນ ໄດ້ຝາກຄຳຂອບອົກຂອບໃຈເຖິງເພື່ອນມິດສາກົນໃນຄະນະທຸຕານຸທູດ ແລະ ເພື່ອນມິດອິນໂດເນເຊຍ ໃນໄລຍະຜ່ານຍາມໃດກໍ່ຮ່ວມມື, ສະໜັບສະໜູນຫວຽດນາມ ເວົ້າລວມ ແລະ ສະຖານທູດຫວຽດນາມ ເວົ້າສະເພາະ, ພ້ອມທັງສະແດງຄວາມປາດຖະໜາຢາກໄດ້ຮັບການສະໜັບສະໜູນໃນອະນາຄົດ.
ກ່ອນໜ້ານັ້ນ, ວັນທີ 22/01, ສະຖານທູດຫວຽດນາມ ປະຈຳລາຊາອານາຈັກ ມາຣົກ ກໍ່ຈັດຕັ້ງງານພົບປະສ້າງສັນຕ້ອນຮັບປີໃໝ່ປີລະກາ, ດ້ວຍການເຂົ້າຮ່ວມຂອງຊາວຫວຽດນາມ ແລະ ນັກສຶກສາທີ່ພວມດຳລົງຊີວິດ ແລະ ຮ່ຳຮຽນຢູ່ມາຣົກ.
ຕອນຄ່ຳວັນທີ 22/01, ພໍ່ແມ່ປະຊາຊົນຊາວຫວຽດນາມ, ພະນັກງານ, ນັກສຶກສາພວມດຳລົງຊີວິດ, ຮໍ່າຮຽນ ແລະ ເຮັດວຽກຢູ່ອິດສະຣາແອນ ໄດ້ພ້ອມກັນເຂົ້າຮ່ວມງານພົບປະສ້າງສັນຕ້ອນຮັບບຸນເຕັດປະຊາຄົມ ເນື່ອງໃນໂອກາດບຸນເຕັດປີລະກາ ໂດຍສະຖານທູດຫວຽດນາມ ປະຈຳອິດສະຣາແອນ ຈັດຕັ້ງ. ກ່າວຄຳເຫັນທີ່ງານພົບປະ, ທ່ານເອກອັກຄະລັດຖະທູດຫວຽດນາມ ປະຈຳອິດສະຣາແອນ ກາວຮ່ວາງກ໋ວກຫາຍ ເນັ້ນໜັກວ່າ, ບຸນເຕັດປະຊາຄົມປີນີ້ ດຳນີນໄປໃນບັນຍາກາດຟົດຟື້ນມ່ວນຊື່ນ ແລະ ອົບອຸ່ນ. ທ່ານເອກອັກຄະລັດຖະທູດກໍແຈ້ງໃຫ້ພໍ່ແມ່ປະຊາຊົນຊາວຫວຽດນາມ ຮັບຊາບກ່ຽວກັບສະພາບການພົ້ນເດັ່ນຂອງຫວຽດນາມ, ການພົວພັນລະຫວ່າງຫວຽດນາມ - ອິດສະຣາແອນ ໃນປີຜ່ານມາ ແລະ ບາງຂໍ້ກຳນົດທິດໃຫຍ່ໃນການພົວພັນລະຫວ່າງ 2 ປະເທດໃນປີຈະມາເຖິງ.
ເນື່ອງໃນໂອກາດບຸນເຕັດປີລະກາ ແລະ 87 ປີແຫ່ງວັນສ້າງຕັ້ງພັກກອມມູນິດຫວຽດນາມ, ຢູ່ນະຄອນຫຼວງ Wellington, ສະຖານທູດຫວຽດນາມ ປະຈຳນິວຊີແລນ ໄດ້ຈັດຕັ້ງງານພົບປະສ້າງສັນປະຊາຄົມ, ດ້ວຍການເຂົ້າຮ່ວມຂອງພໍ່ແມ່ປະຊາຊົນຊາວຫວຽດນາມ, ນັກສຶກສາທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ Wellington ແລະ ບັນດານະຄອນໃກ້ຄຽງ… ເປັນຈຳນວນຫຼາຍ. ທ່ານເອກອັກຄະລັດຖະທູດ ຫງວຽນຫວຽດຢຸງ ປາດຖະໜາວ່າ, ປະຊາຄົມຊາວຫວຽດນາມ ອາໄສຢູ່ ນິວຊີແລນ ສືບຕໍ່ແມ່ນໜຶ່ງໃນບັນດາຂົວເຊື່ອມຕໍ່ທີ່ມີປະສິດທິຜົນ ເພື່ອແນໃສ່ຊຸກຍູ້ການພົວພັນມິດຕະພາບ, ການຮ່ວມມືຮອບດ້ານທີ່ນັບມື້ນັບດີງາມລະຫວ່າງຫວຽດນາມ ແລະ ນິວຊີແລນ.
(ແຫຼ່ງຄັດຈາກVOV)
