ຕອນບ່າຍວັນທີ 11 ມີນາ, ທີ່ກອງປະຊຸມຖະແຫຼງຂ່າວຂອງກະຊວງການຕ່າງປະເທດຫວຽດນາມ, ເມື່ອຕອບຄຳຖາມກ່ຽວກັບເລື່ອງ ໄຕ້ຫວັນ (ຈີນ) ພວມພິຈາລະຈາພ້ອມກັບບາງປະເທດຊຸກຍູ້ຮູບແບບ “ການພົວພັນດ້ານການທ່ອງທ່ຽວ” ແລະ ຍ້ອນ ຫວຽດນາມ ປະຕິບັດວຽກງານປ້ອງກັນ, ສະກັດກັ້ນໂລກລະບາດໄດ້ເປັນຢ່າງດີພໍສົມຄວນ ສະນັ້ນໄດ້ພິຈາລະນານຳເຂົ້າໃນບັນຊີລາຍຊື່ຮູບແບບການທ່ອງທ່ຽວນີ້, ທ່ານນາງໂຄສົກກະຊວງການຕ່າງປະເທດຫວຽດນາມ ເລທິທູຮັ່ງ ໃຫ້ຮູ້ວ່າ: ບັນດາອົງການທີ່ມີໜ້າທີ່ຂອງຫວຽດນາມ ພວມແລກປ່ຽນກັບບັນດາຄູ່ຮ່ວມມືກ່ຽວກັບວິວັດການເຊື່ອມຕໍໍ່ສາຍການບິນດ້ານການຄ້າຄືນໃໝ່.
ຕາມທ່ານນາງ ເລທິທູຮັ່ງ ແລ້ວ, ເພື່ອແນໃສ່ປະຕິບັດເປົ້າໝາຍທັງປ້ອງກັນ, ສະກັດກັ້ນໂລກລະບາດໂຄວິດ-19, ທັງຊຸກຍູ້ການພັດທະນາເສດຖະກິດ, ຜັນຂະຫຍາຍຄຳເຫັນຊີ້ນຳຂອງນາຍົກລັດຖະມົນຕີ, ບັນດາອົງການທີ່ມີໜ້າທີ່ຂອງຫວຽດນາມ ໄດ້ ແລະ ພວມແລກປ່ຽນກັບບາງຄູ່ຮ່ວມມືທີ່ມີຄວາມປອດໄພສູງ ກ່ຽວກັບການຜັນຂະຫຍາຍ, ເຊື່ອມຕໍ່ບັນດາສາຍການບິນດ້ານການຄ້າຕາມປົກກະຕິລະຫວ່າງຫວຽດນາມ ກັບບັນດາຄູ່ຮ່ວມມືນີ້.
ກໍ່ກ່ຽວຂ້ອງເຖິງບັນຫາໜັງສືຜ່ານແດນວັກຊິນ, ກະຊວງການຕ່າງປະເທດພວມສົມທົບກັບບັນດາອົງການທີ່ມີໜ້າທີ່ຂອງຫວຽດນາມ, ອົງການຕາງໜ້າຫວຽດນາມ ປະຈຳຕ່າງປະເທດ ຄົ້ນຄວ້າ, ຊອກຮູ້ ແລະ ຈະສະເໜີດັດປັບຂໍ້ກຳນົດການເຂົ້າ-ອອກເມືອງໃຫ້ເໝາະສົມກັບສະພາບການ.
ກ່ຽວກັບການເພີ່ມທະວີການກວດກາ, ສະກັດກັ້ນບັນດາກໍລະນີເຂົ້າ-ອອກເມືອງຢ່າງຜິດກົດໝາຍ, ທ່ານນາງ ເລທິທູຮັ່ງ ໃຫ້ຮູ້ວ່າ: ໃນໄລຍະຜ່ານມາ, ຢູ່ບາງທ້ອງຖິ່ນໄດ້ກວດພົບກໍລະນີຄົນເຂົ້າເມືອງຫວຽດນາມ ຢ່າງຜິດກົດໝາຍ. ບົນຈິດໃຈມະນຸດສະທຳ, ບັນດາກໍລະນີດັ່ງກ່າວກໍ່ລ້ວນແຕ່ໄດ້ຮັບການກວດວິໄຈຫາເຊື້ອໂລກລະບາດໂຄວິດ-19, ໄດ້ຮັບການປິ່ນປົວຖ້າຫາກຕິດເຊື້ອພະຍາດ, ແຍກຕົວ ແລະ ແກ້ໄຂຕາມຂໍ້ກຳນົດຂອງກົດໝາຍຫວຽດນາມ ພາຍຫຼັງສິ້ນສຸດການແຍກຕົວ.
ກໍ່ຕາມທ່ານນາງ ເລທິທູຮັ່ງ ແລ້ວ, ອົງການທີ່ມີໜ້າທີ່ຂອງຫວຽດນາມ ພວມຕັ້ງໜ້າສົມທົບກັບບັນດາອົງການທີ່ມີໜ້າທີ່ຂອງຕ່າງປະເທດ, ພິເສດແມ່ນບັນດາປະເທດທີ່ມີເສັ້ນຊາຍແດນຮ່ວມ, ໃນນັ້ນມີຈີນ, ເພື່ອມີມາດຕະການຄຸ້ມຄອງໃຫ້ເປັນຢ່າງດີກວ່າ ແລະ ສະກັດກັ້ນການເຂົ້າ-ອອກເມືອງ ຜ່ານແດນຢ່າງຜິດກົດໝາຍ.
(ແຫຼ່ງຄັດຈາກ VOV)
