ທີ່ພິທີໄວ້ອາໄລ, ໃນບັນຍາກາດທີ່ເຄັ່ງຂຶມ ແລະສະເທືອນໃຈ, ທ່ານ ເຈິ່ນແທັງເໝີ້ນ ປະທານສະພາແຫ່ງຊາດ ແລະຄະນະຜູ້ແທນຂັ້ນສູງຫວຽດນາມ ໄດ້ວາງພວງມາລາ ແລະກົ້ມຫົວໄວ້ອາໄລໜຶ່ງນາທີ ເພື່ອອາໄລຫາອະດີດປະທານສະພາແຫ່ງຊາດລາວ ໄຊສົມພອນ ພົມວິຫານ, ຜູ້ເພື່ອນທີ່ສະໜິດສະໜົມ, ຕິດພັນກັບພັກ, ລັດ, ສະພາແຫ່ງຊາດ ແລະປະຊາຊົນຫວຽດນາມ.
ໃນການຂຽນປື້ມໄວ້ອາໄລ, ທ່ານ ເຈິ່ນແທັງເໝີ້ນ ປະທານສະພາແຫ່ງຊາດ ໄດ້ສະແດງຄວາມເສົ້າສະຫຼົດໃຈຢ່າງສຸດຊຶ້ງຕໍ່ການຈາກໄປຂອງອະດີດປະທານສະພາແຫ່ງຊາດລາວ ໄຊສົມພອນ ພົມວິຫານ; ເນັ້ນໜັກວ່ານີ້ແມ່ນການສູນເສຍອັນໃຫຍ່ຫຼວງສຳລັບພັກ, ລັດ, ສະພາແຫ່ງຊາດ ແລະປະຊາຊົນບັນດາເຜົ່າລາວ; ພ້ອມທັງ ຫວຽດນາມ ໄດ້ສູນເສຍຜູ້ເພື່ອນທີ່ຍິ່ງໃຫຍ່, ສະຫາຍທີ່ຈົງຮັກພັກດີ, ຜູ້ທີ່ໄດ້ປະກອບສ່ວນສຳຄັນຫຼາຍຢ່າງໃນການປັບປຸງ ແລະພັດທະນາການພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະຫຸ້ນສ່ວນຍຸດທະສາດ ລະຫວ່າງ ຫວຽດນາມ - ລາວ.
ຕາງໜ້າພັກ, ລັດ ແລະປະຊາຊົນຫວຽດນາມ, ທ່ານ ເຈິ່ນແທັງເໝີ້ນ ປະທານສະພາແຫ່ງຊາດ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງໄປຍັງພັກ, ລັດ, ສະພາແຫ່ງຊາດ ແລະປະຊາຊົນລາວ ແລະຄອບຄົວຂອງອະດີດປະທານສະພາແຫ່ງຊາດ ໄຊສົມພອນ ພົມວິຫານ.
