16/11/2020 08:20 GMT+7 Email Print Like 0

ອັດກອງ​ປະ​ຊຸມ​ສຸດຍອດ ອາ​ຊຽນ ຄັ້ງ​ທີ 37

ຕອນບ່າຍ ວັນທີ 15 ພະຈິກໄດ້ດຳເນີນ ພິທີອັດກອງປະຊຸມສຸດຍອດ ອາຊຽນ ຄັ້ງທີ 37 ແລະ ບັນດາກອງປະຊຸມທີ່ກ່ຽວຂ້ອງ ແລະ ມອບໂອນບົດບາດປະທານ ອາຊຽນ ໃຫ້ແກ່ ບຣູໄນ ແລະ ດຳເນີນກອງປະຊຸມຂ່າວສາກົນ.

ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ມອບໂອນບົດບາດປະທານ ອາຊຽນ ໃຫ້ແກ່ ບຣູໄນ 

ກ່າວຄຳເຫັນທີ່ພິທີອັດ, ທ່ານນາຍົກລັດຖະມົນຕີ ຫງວຽນຊວນຟຸກໄດ້ຢືນຢັນວ່າ ກອງປະຊຸມໄດ້ປະສົບຜົນສຳເລັດຢ່າງຈົບງາມ ອັນໄດ້ປິດປີປະທານອາຊຽນ 2020 ດ້ວຍບັນດາຄວາມທົດສອບຫຼາຍປະການ. ບັນດາການນຳ ອາຊຽນ ໄດ້ແລກປ່ຽນບັນດາມາດຕະການ ຍົກອອກບັນດາການກຳນົດທິດໃຫຍ່ໃຫ້ແກ່ປະຊາຄົມອາຊຽນ. ທ່ານນາຍົກລັດຖະມົນຕີ ຫງວຽນຊວນຟຸກ ກ່າວວ່າ :

   “ປີ 2020 ແມ່ນປີທີ່ເຕັມໄປດ້ວຍຄວາມທົດສອບໃນສະພາວະ ໂລກລະບາດ  Covid – 19 ພວມຄຸກຄາມ.   ພາຍຫຼັງ 5 ທົດສະວັດແຫ່ງການສ້າງຕັ້ງ ແລະ ຂະຫຍາຍຕົວ, ອາຊຽນສືບຕໍ່ຢັ້ງຢືນກຳລັງແຮງແຫ່ງນ້ຳໃຈສາມັກຄີ, ການສ້າງຄວາມເຂັ້ມແຂງດ້ວຍຕົນເອງ ແລະ ຄວາມສາມາດປັບຕົວໃຫ້ແທດເໝາະຕໍ່ບັນດາສິ່ງທ້າທາຍ. ພວກເຮົາໄດ້ເຫັນດີນຳກັນ ຕໍ່ບັນດາເນື້ອໃນທີ່ສຳຄັນດ ສ້າງກຳລັງໜູນໃໝ່ໃຫ້ສາຍພົວພັນ ອາຊຽນກັບບັນດາຄູ່ຮ່ວມມື; ຢັ້ງຢືນຄຳໝັ້ນສັນຍາຮ່ວມມືຫຼາຍຝ່າຍ; ຮ່ວມສຳພັນຫັນເສດຖະກິດເປັນເສລີ, ແບ່ງປັນບັນດາບັນຫາພາກພື້ນ ແລະ ສາກົນທີ່ພວມເກີດຂຶ້ນ. ພວກເຮົາເຫັນດີຕໍ່ບົດບາດເປັນໃຈກາງຂອງອາຊຽນ ຄວນສືບຕໍ່ຮັກສາ ແລະ ເສີມຂະຫຍາຍ, ຊຸກຍູ້ການເຈລະຈາ, ຮ່ວມມືສະກັດກັ້ນການປະທະກັນດ ສ້າງຄວາມເຊື້ອໝັ້ນ ແລະ ເສີມສ້າງໂຄງສ້າງພາກພື້ນເປີດກ້ວາງ, ໂປ່ງໃສ, ກວມລວມ ແລະ ອີງໃສ່ກົດໝາຍ.

  ກ່ອນໜ້ານັ້ນ, ໃນວັນດຽວກັນ, ທີ່ກອງປະຊຸມສຸດຍອດ ອາຊຽນ - ສປຊ ຄັ້ງທີ 11, ບັນດາການນຳ ໄດ້ເນັ້ນໜັກເຖິງຄວາມຕ້ອງການໃນການຮ່ວມມືເພື່ອຮັບມືກັບການປ່ຽນແປງຂອງດິນຟ້າອາກາດ ແລະ ໄພທຳມະຊາດ; ຕ້ານອາດຊະຍາກຳຂ້າມຊາດ, ການກໍ່ການຮ້າຍ, ການພັດທະນາແບບຍືນຍົງ, ຕ້ານນ້ຳທະເລຍື່ງຂຶ້ນສູງ, ພົນລະພິດສິ່ງແວດລ້ອມ ແລະ ຈຳກັດສິ່ງເສດເຫຼືອຢາງພະລາດສະຕິກ; ຊຸກຍູ້ການຮ່ວມມື ລະຫວ່າງ ອາຊຽນ ກັບ UNESCO ແລະ ກອງທຶນເພື່ອເດັກ ຂອງ ສປຊ (UNICEF). ທ່ານເລຂາທິການໃຫຍ່ ສປຊ Antonio Guterres ກໍເນັ້ນໜັກເຖິງຄວາມສຳຄັນ ແລະ ບົດບາດເປັນໃຈກາງຂອງ ອາຊຽນ ໃນໂຄງສ້າງຂອງພາກພື້ນ, ຕີລາຄາສູງບັນດາຜົນງານເຊິ່ງ ອາຊຽນ ບັນລຸໄດ້ໃນການພັດທະນາເສດຖະກິດ - ສັງຄົມ, ເຖິງຢ່າງໃດກໍຕາມ, ທ່ານຖືວ່າ ຍັງມີສິ່ງທ້າທາຍຫຼາຍຢ່າງຕ້ອງໄດ້ຮັບການແກ້ໄຂ ເພື່ອບໍ່ປະໃຫ້ຜູ້ໃດຖືກຕົກຢູ່ເບື້ອງຫຼັງ. ທ່ານເລຂາທິການໃຫຍ່ ສປຊ ຢັ້ງຢືນວ່າ ສປຊ ພ້ອມແລ້ວທີ່ຈະໜູນຊ່ວຍ ອາຊຽນ ພ້ອມທັງປາດຖະໜາວ່າ ອາຊຽນ ຈະສືບຕໍ່ປະຕິບັດເປົ້າໝາຍພັດທະນາແບບຍືນຍົງ.

ກອງປະຊຸມສຸດຍອດ ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ແມ່ນສັນຍາການຄ້າ ລະຫວ່າງ 10 ປະເທດສະມາຊິກ ອາຊຽນ ແລະ 6 ປະເທດຄູ່ຮ່ວມມື ເຊິ່ງລວມມີ ຈີນ, ຍີ່ປຸ່ນ, ສ.ເກົາຫຼີ, ອິນເດຍ, ອົດສະຕີລີ, ນິວຊີແລັນ ແຕ່ພາຍຫຼັງການເຈລະຈາໃນວັນທີ 4 ພະຈິກ 2019, ອິນເດຍ ໄດ້ຖອນຕົວອອກຈາກສັນຍາສະບັບດັ່ງກ່າວ. ສັນຍາ RCEP ແມ່ນເພື່ອແນໃສ່ເປົ້າໝາຍສ້າງຕັ້ງບັນດາຫຼັກການລວມ ກ່ຽວກັບການຄ້າເອເລັກໂຕນິກ, ການຄ້າ ແລະ ຊັບສິນທາງປັນຍາ.

ສັນຍາສຸດຍອດ ອາຊຽນ ຄັ້ງທີ 37 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ແມ່ນບັນດການເຄື່ອນໄຫວມີຄວາມໝາຍສຳຄັນເປັນພິເສດ ແລະ ປິດອາຍຸການປະທານ ອາຊຽນ 2020. 

(ແຫຼ່ງຄັດຈາກ VOV)