12/03/2021 10:14 GMT+7 Email Print Like 0

ຫວຽດ​ນາມ ປາດ​ຖະ​ໜາ​ວ່າ ມຽນ​ມາ ຈະ​ກັບ​ຄືນ​ສູ່​ສະ​ພາບ​ເປັນ​ປົກ​ກະ​ຕິ​ໂດຍ​ໄວ ເພື່ອ​ຜົນ​ປະ​ໂຫຍດ​ຂອງ​ປະ​ຊາ​ຊົນ, ເພື່ອ​ສັນ​ຕິ​ພາບ, ສະ​ຖຽນ​ລະ​ພາບ​ຂອງ​ພາກ​ພື້ນ

“ຫວຽດນາມ ຈະສືບຕໍ່ຮ່ວມມືກັບບັນດາປະເທດອື່ນໃນພາກພື້ນ ອາຊີຕາເວັນອອກສ່ຽງໃຕ້, ມານະພະຍາຍາມຊອກຫາມາດຕະການແກ້ໄຂບັນຫາຢູ່ ມຽນມາ..."

ໃນການຖະແຫຼງຂ່າວ ທີ່ຈັດຂຶ້ນໃນຕອນບ່າຍວັນທີ 11 ມີນາ, ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດ ຫວຽດນາມ ໄດ້ສະແດງຄວາມວິຕົກກັງວົນຕໍ່ສະພາບການໃຊ້ຄວາມຮຸນແຮງ ແລະ ສະພາບລົ້ມຫາຍຕາຍຈາກທີ່ສືບຕໍ່ເພີ່ມຂຶ້ນຢູ່ ມຽນມາ ໃນຊຸມວັນມໍ່ໆມານີ້ກ ຫວຽດນາມ ຮຽກຮ້ອງໃຫ້ບັນດາຝ່າຍຈົ່ງອົດກັ້ນ, ບໍ່ນໍາໃຊ້ອາວຸດ, ແກ້ໄຂການຂັດແຍ້ງກັນໂດຍສັນຕິວິທີຜ່ານການເຈລະຈາ; ພ້ອມທັງປາດຖະໜາວ່າ ມຽນມາ ຈະກັບຄືນສູ່ສະພາບເປັນປົກກະຕິໂດຍໄວ ເພື່ອຜົນປະໂຫຍດຂອງປະຊາຊົນ, ເພື່ອສັນຕິພາບ, ສະຖຽນລະພາບຂອງພາກພື້ນ. ທ່ານນາງ ເລທິທູຮັ່ງ ຢັ້ງຢືນວ່າ:

        “ຫວຽດນາມ ຈະສືບຕໍ່ຮ່ວມມືກັບບັນດາປະເທດອື່ນໃນພາກພື້ນ ອາຊີຕາເວັນອອກສ່ຽງໃຕ້, ມານະພະຍາຍາມຊອກຫາມາດຕະການແກ້ໄຂບັນຫາຢູ່ ມຽນມາ. ຫວຽດນາມ ກໍໄດ້ຮຽກຮ້ອງໃຫ້ ມຽນມາ ຮັບປະກັນຄວາມປອດໄພແກ່ຊີວິດອິນຊີ ກໍຄື ຜົນປະໂຫຍດອັນຊອບທຳຂອງປະຊາຊົນ, ວິສາຫະກິດ ຫວຽດນາມ ຢູ່ ມຽນມາ. ສະຖານທູດ ຫວຽດນາມ ປະຈຳ ມຽນມາ ພວມຕິດຕາມສະພາບການໃກ້ຊິດ, ຕິດຕໍ່ກັບອົງການເຈົ້າໜ້າທີ່ທີ່ມີຄວາມຮັບຜິດຊອບຂອງປະເທດປະຈຳຖິ່ນ, ຜູ້ປະສານງານປະຊາຄົມຊາວ ຫວຽດນາມ ອາໄສ ຢູ່ ມຽນມາ ເປັນປະຈຳ ເພື່ອອັບເດດຂໍ້ມູນ ແລະ ໃຫ້ຄຳກ່າວເຕືອນຢ່າງທັນການ, ມີມາດຕະການປົກປ້ອງພົນລະເມືອງໃນກໍລະນີທີ່ຈຳເປັນຢ່າງພ້ອມພຽງ”.

 

ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດ ຫວຽດນາມ (ພາບ: TTXVN)

 ເມື່ອຕອບຄຳຖາມຂອງນັກຂ່າວສະເໜີໃຫ້ຮູ້ທັດສະນະຂອງ ຫວຽດນາມ ກ່ຽວກັບ “ເອກະສານແນະນຳຍຸດທະສາດຄວາມໝັ້ນຄົງແຫ່ງຊາດສະບັບຊົ່ວຄາວ” ຂອງ ອາເມລິກາ ທີ່ໄດ້ວາງອອກຫວ່າງມໍ່ໆມານີ້, ທ່ານນາງ ເລທິທູຮັ່ງກ່າວວ່າ:

        “ທັດສະນະຂອງ ຫວຽດນາມ ແມ່ນປາດຖະໜາ ແລະ ຊົມເຊີຍບັນດາຂໍ້ລິເລີ່ມທີ່ປະກອບສ່ວນເຂົ້າໃນການສ້າງສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ; ບັນດາຂໍ້ລິເລີ່ມທີ່ອີງໃສ່ພື້ນຖານເຄົາລົບກົດໝາຍສາກົນ, ເໝາະສົມກັບຜົນປະໂຫຍດຂອງບັນດາປະເທດ ແລະ ບົດບາດຂອງ ອາຊຽນ ໃນເວທີພາກພື້ນ ແລະ ສາກົນ”.

        ກ່ຽວຂ້ອງເຖິງກອງປະຊຸມຂອງກຸ່ມ 4 ປະເທດ ອາເມລິກາ, ຍີ່ປຸ່ນ, ອົດສະຕາລີ ແລະ ອິນເດຍ, ທ່ານນາງ ໂຄສົກກະຊວງການຕ່າງປະເທດ ຫວຽດນາມ ເລທິທູຮັ່ງ ກໍຢັ້ງຢືນວ່າ:

 

        “ຫວຽດນາມ ຍາມໃດກໍເອົາໃຈໃສ່ ແລະ ຕິດຕາມການຜັນແປ ແລະ ສະພາບຂອງການພາກພື້ນ ໃນນັ້ນ ມີບັນດານະໂຍບາຍການຕ່າງປະເທດຂອງບັນດາປະເທດມະຫາອຳນາດ. ຫວຽດນາມ ປາດຖະໜາວ່າ ບັນດາປະເທດ ຄວນສືບຕໍ່ປະກອບສ່ວນເຂົ້າໃນການສ້າງສັນຕິພາບ, ຄວາມໝັ້ນຄົງ, ສະຖຽນລະພາບ ແລະ ວັດທະນາຖາວອນຂອງພາກພື້ນ ກໍຄືໃນໂລກ. ຮັກສາການຮ່ວມມື ແລະ ເຄົາລົບບົດບາດເປັນໃຈກາງຂອງ ອາຊຽນ”.  

(ແຫຼ່ງຄັດຈາກ VOV)