25/05/2019 13:34 GMT+7 Email Print Like 0

ຫວຽດນາມ - ອາເມລິກາ ສືບຕໍ່ຊຸກຍູ້ການຮ່ວມມືດ້ານເສດຖະກິດ - ການຄ້າ - ການລົງທຶນ ແລະ ປ້ອງກັນຊາດ

ໂດຍສືບຕໍ່ບັນດາການເຄື່ອນໄຫວຢ້ຽມຢາມ ອາເມລິກາ ຢ່າງເປັນທາງການ, ວັນທີ 23 ພຶດສະພາ, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ຟ້າມບີ່ງມິງ ໄດ້ພົບປະແລກປ່ຽນກັບການນຳບັນດາກະຊວງ, ຂະແໜງການຕ່າງໆຂອງ ອາເມລິກາ.

ທ່ານ Patrick Shanahan ຜູ້ຮັກສາການລັດຖະມົນຕີກະຊວງປ້ອງກັນປະເທດ ອາເມລິກາ ຕ້ອນຮັບທ່ານ ຟ້າມບີ່ງມິງ (ພາບ: TTXVN)

ທີ່ການພົບປະແລກປ່ຽນກັບທ່ານລັດຖະມົນຕີກະຊວງການເງິນ ອາເມລິກາ Steven Mnuchin, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ຟ້າມບີ່ງມິງ ໄດ້ຢືນຢັນວ່າ: ຫວຽດນາມ ພວມປັບປຸງສະພາບແວດລ້ອມແຫ່ງການລົງທຶນໃຫ້ມີຄວາມສະດວກກ່ວາ ແລະ ສົ່ງເສີມບັນດາບໍລິສັດ ອາເມລິກາ ເຂົ້າມາລົງທຶນ ແລະ ດຳເນີນທຸລະກິດຢູ່ ຫວຽດນາມ; ສະເໜີ 2 ຝ່າຍສືບຕໍ່ແກ້ໄຂບັນດາບັນຫາເຊິ່ງຕ່າງຝ່າຍຕ່າງມີຄວາມສົນໃຈ ບົນຈິດໃຈຊຸກຍູ້ການຄ້າຕ່າງຝ່າຍຕ່າງມີຜົນປະໂຫຍດ. ສ່ວນທ່ານລັດຖະມົນຕີກະຊວງການເງິນ ອາເມລິກາ Steven Mnuchin ໄດ້ເຫັນດີເປັນເອກະພາບ ສືບຕໍ່ຊຸກຍູ້ການພົວພັນດ້ານເສດຖະກິດ - ການຄ້າ - ການລົງທຶນ, ຖືນີ້ແມ່ນພື້ນຖານຂອງການພົວພັນ 2 ຝ່າຍລະຫວ່າງ ຫວຽດນາມ - ອາເມລິກາ, ທ່ານຕີລາຄາສູງ ເລື່ອງ ຫວຽດນາມ ຕັ້ງໜ້າແບ່ງປັນຂໍ້ມູນຂ່າວສານ, ແກ້ໄຂບາງບັນຫາເສດຖະກິດ - ການເງິນບຸລິມະສິດ.

        ທີ່ການພົບປະກັບທ່ານລັດຖະມົນຕີກະຊວງການຄ້າ ອາເມລິກາ Wilbur Ross, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຟ້າມບີ່ງມິງ ແລະ ທ່ານລັດຖະມົນຕີກະຊວງການຄ້າ Wilbur Ross ໄດ້ເຫັນດີເປັນເອກະພາບສືບຕໍ່ຜັນຂະຫຍາຍບັນດາກົນໄກທີ່ມີຢູ່ແລ້ວ ຄືສັນຍາແມ່ກ່ຽວກັບການຄ້າ ແລະ ການລົງທຶນ (TIFA), ພ້ອມທັງ ສືບຕໍ່ປຶກສາຫາລືສ້າງຂອບເຂດເສດຖະກິດ - ການຄ້າໃຫມ່, ເປັນປົກກະຕິ, ຍາວນານໃຫ້ແກ່ການພົວພັນລະຫວ່າງ ຫວຽດນາມ - ອາເມລິກາ, ເໝາະສົມກັບຄຸນລັກສະນະ, ລະດັບການພົວພັນເສດຖະກິດ 2 ຝ່າຍ ແລະ ຂອບເຂດການພົວພັນຮ່ວມ.

        ແລະກໍ່ໃນການຢ້ຽມຢາມຄັ້ງນີ້, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ຟ້າມບີ່ງມິງ ກໍ່ໄດ້ພົບປະແລກປ່ຽນກັບທ່ານ Patrick Shanahan ຜູ້ຮັກສາການລັດຖະມົນຕີກະຊວງປ້ອງກັນປະເທດ ອາເມລິກາ; ທ່ານ Eliot Engel ສະມາຊິກສະພາຕ່ຳ, ປະທານກຳມາທິການພົວພັນຕ່າງປະເທດສະພາຕ່ຳ ອາເມລິກາ ແລະ ທ່ານ Gustavo Pimenta ຮອງປະທານກຸ່ມບໍລິສັດ AES.

(ແຫຼ່ງຄັດຈາກ VOV)