ທ່ານນາຍົກລັດຖະມົນຕີ ສປປ ລາວ ທອງລຸນ ສີສຸລິດ ຕ້ອນຮັບ
ທ່ານ ດິງຕ໋ຽນຢຸງ ລັດຖະມົນຕີກະຊວງການເງິນ ຫວຽດນາມ
ຕອນບ່າຍວັນທີ 30/03, ທ່ານນາຍົກລັດຖະມົນຕີ ສປປ ລາວ ທອງລຸນ ສີສຸລິດ ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງການເງິນ ຫວຽດນາມ ໂດຍທ່ານ ດິງຕ໋ຽນຢຸງ ລັດຖະມົນຕີກະຊວງການເງິນ ຫວຽດນາມ ນຳໜ້າ ພວມຢ້ຽມຢາມ ແລະ ເຮັດວຽກຢູ່ ລາວ. ທີ່ການຕ້ອນຮັບ, ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ຕີລາຄາສູງການຮ່ວມມືຢ່າງມີປະສິດທິຜົນ ແລະ ແໜ້ນແຟ້ນລະຫວ່າງ 2 ກະຊວງການເງິນ ຫວຽດນາມ ແລະ ລາວ ໃນຊຸມປີຜ່ານມາ; ຢືນຢັນວ່າ ບັນດາບົດຮຽນເຊິ່ງຄະນະຜູ້ແທນຂັ້ນສູງກະຊວງການເງິນ ຫວຽດນາມ ແບ່ງປັນໃນຕະຫລອດການຢ້ຽມຢາມ ແມ່ນລ້ຳຄ່າທີ່ສຸດ ເພື່ອໃຫ້ ລາວ ຮ່ຳຮຽນ, ນຳເຂົ້າໝູນໃຊ້ຕາມພຶດຕິກຳຕົວຈິງຂອງ ລາວ. ທ່ານນາຍົກລັດຖະມົນຕີ ລາວ ສະເໜີວ່າ ໃນໄລຍະຈະມາເຖິງ, ກະຊວງການເງິນ 2 ປະເທດຄວນສືບຕໍ່ເພີ່ມທະວີການແລກປ່ຽນຂໍ້ມູນຂ່າວ, ແບ່ງປັນບົດຮຽນໃນຂົງເຂດການເງິນ, ປະກອບສ່ວນເຂົ້າໃນການພັດທະນາເສດຖະກິດ - ສັງຄົມຂອງ 2 ປະເທດ.ທ່ານ ດິງຕ໋ຽນຢຸງ ລັດຖະມົນຕີກະຊວງການເງິນ ຫວຽດນາມ
ສ່ວນທ່ານລັດຖະມົນຕີ ດິງຕ໋ຽນຢຸງ ຢືນຢັນວ່າ: ພາຍຫລັງ 25 ປີແຫ່ງການກໍ່ສ້າງ ແລະ ພັດທະນາຂອງຄັງເງິນແຫ່ງລັດ, ກົມໃຫຍ່ສ່ວຍສາອາກອນ, ກົມໃຫຍ່ພາສີຕາມຮູບແບບຂະແໜງສາຍຕັ້ງ, ຫວຽດນາມ ຮັບຮູ້ວ່າ ນີ້ແມ່ນບາດກ້າວຫັນປ່ຽນສຳເລັດຜົນ, ປະກອບສ່ວນສຳຄັນເຂົ້າວຽກງານສຳເລັດໜ້າທີ່ການເງິນງົບປະມານຂອງຂະແໜງການເງິນ ຫວຽດນາມ ໃນຊຸມປີຜ່ານມາຢ່າງມີໄຊ. ເພາະສະນັ້ນ ຫວຽດນາມ ພ້ອມແລ້ວທີ່ຈະແບ່ງປັນບັນດາບົດຮຽນທີ່ຖອດຖອນມາໄດ້, ພ້ອມທັງຈະໜູນຊ່ວຍ ເພື່ອໃຫ້ກະຊວງການເງິນ ລາວ ສ້າງລະບົບຄັງເງິນ, ອາກອນ, ພາສີຕາມຮູບແບບຂະແໜງສາຍຕັ້ງໃນທົ່ວປະເທດສຳເລັດຜົນ.
ແລະໃນຕອນບ່າຍວັນດຽວກັນ, ທີ່ນະຄອນຫລວງ ວຽງຈັນ, ທ່ານລັດຖະມົນຕີກະຊວງການເງິນ ຫວຽດນາມ ດິງຕ໋ຽນຢຸງ ແລະ ທ່ານລັດຖະມົນຕີກະຊວງການເງິນ ລາວ ສົມດີ ດວງດີ ເປັນປະທານກອງປະຊຸມຄັ້ງທີ 13 ຂອງຄະນະຊີ້ນຳໂຄງການຮ່ວມມືລະຫວ່າງກະຊວງການເງິນ ຫວຽດນາມ ແລະ ກະຊວງການເງິນ ລາວ.
(ແຫຼ່ງຄັດຈາກ VOV)
