ຂ່າວສານ
ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ: ຕ້ອງເປັນເຈົ້າການໃນການປະຕິບັດວຽກງານຮັບມື, ແກ້ໄຂຜົນຮ້າຍຢ້ອນຫຼັງຈາກຝົນຕົກ, ນ້ຳຖ້ວມໃຫ້ເປັນຢ່າງດີ ແລະ ວ່ອງໄວ
ຕໍ່ໜ້າສະພາບການນັ້ນ, ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກໄດ້ມີຈົດໝາຍສົ່ງເຖິງພໍ່ແມ່ປະຊາຊົນ, ນັກຮົບ ແລະ ບັນດາກຳລັງຕ່າງໆທີ່ພວມປະຕິດບັດ ວຽກງານປ້ອງກັນ, ຕ້ານໄພທຳມະຊາດ, ກູ້ໄພກູ້ຊີບ ຢູ່ບັນດາແຂວງ ແຕ່ ຮ່າຕິງ ຫາ ເທື່ອທຽນເຫ້ວ.
ໃນຈົດໝາຍ, ທ່ານນາຍົກລັດຖະມົນຕີໄດ້ຍ້ອງຍໍບັນດາຄວາມມານະພະຍາຍາມ, ຂອງ ສະຫາຍ, ພໍ່ແມ່ພີ່ນ້ອງ, ກຳລັງປ້ອງກັນຕ້ານໄພທຳມະຊາດ, ໄດ້ຜ່ານຜ່າທຸກຄວາມຫຍຸ້ງຍາກ, ບໍ່ຫວາດຫວັ່ນຕໍ່ໄພອັນຕະລາຍ, ປະກອບສ່ວນຮັບປະກັນຄວາມປອດໄພໃຫ້ແກ່ປະຊາຊົນ ແລະ ພິເສດເພື່ອໃຫ້ພວກນ້ອງນັກຮຽນເນື່ອງໃນໂອກາດໄຂສົກຮຽນໃໝ່.
ໃນໄລຍະຈະມາເຖິງ, ໄພທຳມະຊາດອາດຈະສືບຕໍ່ເກີດຂຶ້ນຢ່າງຍັງສັບສົນ, ຍາກທີ່ຈະຄາດຄະເນລ່ວງໜ້າໄດ້, ທ່ານນາຍົກລັດຖະມົນຕີໄດ້ສະເໜີໃຫ້ຄະນະພັກ, ອຳນາດການປົກຄອງທຸກຂັ້ນ, ບັນດາກຳລັງປ້ອງກັນ, ຕ້ານໄພທຳມະຊາດ ແລະ ປະຊາຊົນທຸກຖ້ວນໜ້າສືບຕໍ່ເປັນເຈົ້າການໃນການປະຕິບັດວຽກງານຮັບມື, ແກ້ໄຂຜົນຮ້າຍຢ້ອນຫຼັງຈາກຝົນຕົກ, ນ້ຳຖ້ວມໃຫ້ເປັນຢ່າງດີ ແລະ ວ່ອງໄວ.
ທ່ານນາຍົກລັດຖະມົນຕີໄດ້ແບ່ງປັນຄວາມຫຍຸ້ງຍາກຂອງອຳນາດການປົກຄອງ ແລະ ປະຊາຊົນຢູ່ເຂດນ້ຳຖ້ວມ ແລະ ສະເໜີໃຫ້ທຸກຂັ້ນ, ທຸກຂະແໜງການ ແລະ ປະຊາຊົນທຸກຖ້ວນໜ້າສືບຕໍ່ເສີມຂະຫຍາຍນ້ຳໃຈຮັບຜິດຊອບ, ຄວາມເມດຕາປານີເພື່ອຮ່ວມແຮງຮ່ວມໃຈກັນຮັບມື, ແກ້ໄຂຜົນເສຍຫາຍໄດ້ຢ່າງທັນການ ແລະ ມີປະສິດທິຜົນ, ຮັບປະກັນເຮັດໃຫ້ການເປັນຢູ່, ການຜະລິດຂອງປະຊາຊົນກັບຄືນສູ່ຄວາມເປັນປົກກະຕິໂດຍໄວ.
(ແຫຼ່ງຄັດຈາກ VOV)
