ຂ່າວສານ
ການໂອ້ລົມສົນທະນາ “ແບ່ງປັນບົດຮຽນປະສົບການປະຕິບັດວຽກງານສື່ມວນຊົນທີ່ປອດໄພ ໃນໄລຍະເກີດໂລກລະບາດໂຄວິດ - 19”
“ນັກຂ່າວເມື່ອປະຕິບັດວຽກງານສື່ມວນຊົນໃນໄລຍະເກີດໂລກລະບາດໂຄວິດ - 19 ຍາມໃດກໍ່ຕ້ອງຮັບປະກັນມີຊຸດປ້ອງກັນຕົນເອງ ແລະ ເຄື່ອງຈັກ, ວັດຖຸອຸປະກອນຢ່າງຄົບຖ້ວນ”. ນີ້ແມ່ນການແບ່ງປັນຂອງບັນດານັກຂ່າວ ທີ່ການໂອ້ລົມສົນທະນາທາງໄກ “ແບ່ງປັນບົດຮຽນປະສົບການປະຕິບັດວຽກງານສື່ມວນຊົນ ໃນໄລຍະເກີດໂລກລະບາດໂຄວິດ - 19” ໂດຍ ສະຖານີວິທະຍຸກະຈາຍສຽງ ຫວຽດນາມ ສົມທົບ ກັບ ສະຖານີວິທະຍຸກະຈາຍສຽງແຫ່ງຊາດ ອິນໂດເນເຊຍ ທີ່ໄດ້ຈັດຂຶ້ນໃນຕອນບ່າຍວັນທີ 29 ກັນຍາ.
ກ່າວຄຳເຫັນທີ່ການໂອ້ລົມສົນທະນາ, ທ່ານຮອງຜູ້ອຳນວຍການ ສະຖານີ ວິທະຍຸກະຈາຍສຽງ ຫວຽດນາມ ໂງມິງຫ໋ຽນ ເນັ້ນໜັກວ່າ: ຫວຽດນາມ ແລະ ອິນໂດເນເຊຍ ກໍ່ຄືທົ່ວໂລກ ໄດ້ຜ່ານຜ່າການຕໍ່ສູ້ກັບໂລກລະບາດໂຄວິດ - 19 ມາເປັນເວລາ 2 ປີແລ້ວ ແລະ ແມ່ນກຳລັງແນວໜ້າໃນການສື່ຂ່າວກ່ຽວກັບໂລກລະບາດໂຄວິດ - 19 ໄປເຖິງມະຫາຊົນ. ວິວັດການປະຕິບັດໜ້າທີ່ ໃນໄລຍະເກີດໂລກລະບາດໂຄວິດ - 19 ກໍ່ໄດ້ຊ່ວຍບັນດານັກຂ່າວ ມີບົດຮຽນຫຼາຍຢ່າງໃນການປະຕິບັດໜ້າທີ່ຢູ່ສະຖານທີ່ທີ່ມີຄວາມສ່ຽງສູງ, ໂຄສະນາເຜີຍແຜ່ຂ່າວກ່ຽວກັບສະພາບການໂລກລະບາດໂຄວິດ - 19ຢ່າງຕິດແທດ.ທີ່ການໂອ້ລົມສົນທະນາ, ບັນດານັກຂ່າວ ຂອງສະຖານີວິທະຍຸກະຈາຍສຽງ ຫວຽດນາມ ແລະ ຄູ່ຮ່ວມງານຂອງ ສະຖານີວິທະຍຸກະຈາຍສຽງ ອິນໂດເນເຊຍ ໄດ້ແບ່ງປັນກ່ຽວກັບວິວັດການປະຕິບັດໜ້າທີ່ ໃນໄລຍະເກີດໂລກລະບາດໂຄວິດ - 19. ໃນນັ້ນ, ສຳລັບນັກຂ່າວແຕ່ລະຄົນ ເມື່ອມາເຂດທີ່ມີຜູ້ຕິດເຊື້ອໂຄວິດ - 19, ຫຼືມີຄວາມສ່ຽງມີເກີດໂລກລະບາດ ລ້ວນແຕ່ໄດ້ຮັບການປະກອບວັດຖຸອຸປະກອນການແພດ, ຮັບປະກັນເອກະສານໜັງສືປະຈຳຕົວ, ລະບຽບການຢ່າງຄົບຖ້ວນ ເມື່ອມາບັນດາສຳນັກງານສິດອຳນາດ ຫຼື ໃນການເດີນທາງໄປມາ.
(ແຫຼ່ງຄັດຈາກ VOV)
