ຂ່າວສານ
ການຢ້ຽມຢາມ ຍີ່ປຸ່ນຂອງ ທ່ານນາຍົກລັດຖະມົນຕີ ຟ້າມມິງຈິງ ເປີດສາກໃຫ້ແກ່ການພັດທະນາໃໝ່ລະຫວ່າງ ຫວຽດນາມ ແລະ ຍີ່ປຸ່ນ
ໂດຍໄດ້ຮັບຄຳເຊື້ອເຊີນຂອງທ່ານນາຍົກລັດຖະມົນຕີ ຍີ່ປຸ່ນ Kishida Fumio, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ຈະໄປຢ້ຽມຢາມຍີ່ປຸ່ນ ຢ່າງເປັນທາງການໃນລະຫວ່າງວັນທີ 22 – 25 ພະຈິກ 2021. ນີ້ແມ່ນການຢ້ຽມຢາມ ຍີ່ປຸ່ນຢ່າງເປັນທາງການຄັ້ງທຳອິດຂອງທ່ານນາຍົກລັດຖະມົນຕີ ຫວຽດນາມ ນັບແຕ່ເວລາຮັບດຳລົງຕຳແໜ່ງ ແລະ ຍີ່ປຸ່ນມີການນຳຄົນໃໝ່.
ຕອບສຳພາດຕໍ່ນັກຂ່າວວິທະຍຸກະຈາຍສຽງ ຫວຽດນາມ ປະຈຳ ຍີ່ປຸ່ນ, ທ່ານເອກອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ຫວູຮົ່ງນາມ ໄດ້ເນັ້ນໜັກວ່າ ໃນສະພາບການ ໂລກລະບາດໂຄວິດ - 19 ຍັງບໍ່ທັນສາມາດຄວບຄຸມໄດ້, ການຢ້ຽມຢາມຂອງທ່ານນາຍົກລັດຖະມົນຕີ ຟ້າມມິງຈິງ ໄປຍັງ ຍີ່ປຸ່ນ ແມ່ນໂອກາດເພື່ອໃຫ້ 2 ທ່ານ ປຶກສາຫາລືຢ່າງເລິກເຊິ່ງກວ້າງຂວາງ ກ່ຽວກັບບັນດາບັນຫາທີ່ໄດ້ຮັບການປຶກສາຫາລືຢູ່ນອກກອງປະຊຸມ COP26 ທີ່ຜ່ານມາ, ພ້ອມທັງ ການຢ້ຽມຢາມຄັ້ງນີ້ ມີຄວາມໝາຍສຳຄັນ ບໍ່ພຽງແຕ່ແມ່ນຂີດໝາຍປະຫວັດສາດໃນການພົວພັນສອງປະເທດເທົ່ານັ້ນ, ຫາກຍັງສ້າງທ່າເພື່ອກະກຽມໃຫ້ແກ່ການສະເຫຼີມສະຫຼອງ ວັນສ້າງຕັ້ງການພົວພັນທາງການທູດ ລະຫວ່າງ ຫວຽດນາມ - ຍີ່ປຸ່ນ ໃນປີ 2023 ຄົບຮອບ 50 ປີອີກດ້ວຍ.ທ່ານເອກອັກຄະລັດຖະທູດ ຫວູຮົ່ງນາມ ໃຫ້ຮູ້ວ່າ ໃນການຢ້ຽມຢາມຄັ້ງນີ້, ບາງບັນຫາໃຫຍ່ຂອງ ທັງສອງປະເທດຈະໄດ້ຮັບການເຕື້ອງເຖິງຈາກ ນາຍົກລັດຖະມົນຕີ 2 ທ່ານ ຄື: ກຳນົດທິດການພັດທະນາການພົວພັນລະຫວ່າງສອງປະເທດໃນໄລຍະຈະມາເຖິງ, ບັນຫາເສດຖະກິດ - ການຄ້າ, ຄວາມໝັ້ນຄົງ - ການເມືອງ, ຊຸກຍູ້ການພົວພັນວັດທະນະທຳ, ການຮ່ວມມືບຳລຸງສ້າງແຫຼ່ງຊັບພະຍາກອນມະນຸດ, ແລກປ່ຽນນັກສຶກສາ…
(ແຫຼ່ງຄັດຈາກ VOV)
