|
ການເຈລະຈາລະຫວ່າງທ່ານປະທານປະເທດຫວຽດນາມ ເຈີນດ້າຍກວາງ ແລະ ທ່ານປະທານາທິບໍດີ ສ. ເຊັກໂກ Milos Zeman
|
ທີ່ການເຈລະຈາລະຫວ່າງທ່ານປະທານປະເທດຫວຽດນາມ ເຈີນດ້າຍກວາງ ແລະທ່ານປະທານາທິບໍດີ ສ. ເຊັກໂກ Milos Zeman ພາຍຫຼັງພິທີຕ້ອນຮັບ, ການນຳທັງ 2 ທ່ານໄດ້ເຫັນດີຕໍ່ບັນດາມາດຕະການຊຸກຍູ້ການຮ່ວມມື 2 ຝ່າຍໃນໄລຍະທີ່ຈະມາເຖິງ.
ທາງດ້ານການເມືອງ-ການຕ່າງປະເທດ, 2 ຝ່າຍໄດ້ເຫັນດີແລກປ່ຽນຄະນະຜູ້ແທນຂັ້ນຕ່າງໆ, ສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສພາກພື້ນ ແລະ ສາກົນເຊັ່ນ: ອາຊຽນ, ອາແຊມ, EU, ສະຫະປະຊາຊາດ…
ທາງດ້ານການຄ້າ ແລະ ການລົງທຶນ, 2 ຝ່າຍເຫັນດີເປັນເອກະສັນກ່ຽວກັບບັນດາເນື້ອໃນຂອງກອງປະຊຸມຄະນະກຳມາທິການລະຫວ່າງ 2 ລັດຖະບານຫວຽດນາມ-ເຊັກໂກ ຊຶ່ງຄາດວ່າຈະຖືກດຳເນີນໃນຕົນປີ 2018. ກ່ຽວກັບບັນຫາທະເລຕາເວັນອອກ, ການນຳທັງ 2 ທ່ານໄດ້ເຫັນດີເນັ້ນໜັກເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ ແລະ ຖືວ່າທຸກໆ ການຂັດແຍ້ງຕ້ອງໄດ້ຮັບການແກ້ໄຂດ້ວຍມາດຕະການໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ພ້ອມກັບບັນດາຝ່າຍທີ່ກ່ຽວຂ້ອງປະຕິບັດຕາມຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (DOC), ກ້າວໄປສູ່ການສ້າງກົດແຫ່ງການປະພຶດຂອງຝ່າຍຕ່າງໆຢູ່ ທະເລຕາເວັນອອກ (COC) ໂດຍໄວ.
ພາຍຫຼັງການເຈລະຈາ, ທ່ານປະທານປະເທດຫວຽດນາມ ເຈີນດ້າຍກວາງ ແລະທ່ານປະທານາທິບໍດີ ສ. ເຊັກໂກ Milos Zeman ໄດ້ເປັນສັກຂີພິຍານພິທີລົງນາມໃນສັນຍາກ່ຽວກັບການຮ່ວມມືຕ້ານອາດຊະຍາກຳ ແລະ ສັນຍາມອບສົ່ງຜູ້ຖືກຕັດສິນລົງໂທດຈຳຄຸກ.
ທີ່ການພົບປະກັບສື່ມວນຊົນ, ທ່ານປະທານປະເທດຫວຽດນາມ ເຈີນດ້າຍກວາງຢືນຢັນວ່າ ທ່ານ ແລະ ທ່ານປະທານາທິບໍດີ ສ. ເຊັກໂກ Milos Zeman ໄດ້ມີການເຈລະຈາຢ່າງສຳເລັດຜົນ. ທ່ານກ່າວວ່າ :
“ ດ້ວຍບັນດາພື້ນຖານທີ່ໝັ້ນແກ່ນຜ່ານ 67 ປີ ທີ່ຜ່ານມາ, ປາດຖະໜາວ່າ ການຮ່ວມມືຫວຽດນາມ-ເຊັກໂກຈະສືບຕໍ່ພັດທະນາຂຶ້ນສູ່ລະດັບສູງໃໝ່, ຕອບສະໜອງຄວາມມຸ່ງຫວັງຂອງປະຊາຊົນຂອງ 2 ປະເທດ. ແລະ ປະຊາຄົມຊາວຫວຽດນາມຢູ່ເຊັກໂກ ຈະເປັນຂົວເຊື່ອມຕໍ່ຊຸກຍູ້ນ້ຳໃຈມິດຕະພາບລະຫວ່າງ 2 ປະເທດ ”.
ສ່ວນທ່ານປະທານາທິບໍດີ ສ. ເຊັກໂກ Milos Zeman ຢືນຢັນວ່າ :
“ 68 ວິສາຫະກິດຂອງເຊັກໂກຕິດຕາມຂ້າພະເຈົ້າມາຫວຽດນາມ ກໍເປັນການຢັ້ງຢືນວ່າ ພວກຂ້າພະເຈົ້າມີຄວາມຫວັງຮ່ວມມືກັບຫວຽດນາມ. 2 ຝ່າຍພວກເຮົາໄດ້ລົງນາມໃນຂໍ້ຕົກລົງຮ່ວມມື 7 ສະບັບໃນຫຼາຍຂົງເຂດ, ໃນນັ້ນ ພິເສດມີຂໍ້ຕົກລົງຮ່ວມມືລວມມູນຄ່າ 20 ລ້ານ USD ໃນຂົງເຂດກໍ່ສ້າງເຂດຕາກອາກາດຢູ່ພາກກາງຫວຽດນາມ ”
ເນື່ອງໃນໂອກາດທ່ານປະທານາທິບໍດີ ສ. ເຊັກໂກ Milos Zeman ມາຢ້ຽມຢາມທາງລັດຖະກິດຢູ່ຫວຽດນາມ, 2 ປະເທດໄດ້ອອກຖະແຫຼງການຮ່ວມ.
(ແຫຼ່ງຄັດຈາກ VOV)