កាលពីថ្ងៃទី៦ ខែមិថុនា ឆ្នាំ២០២២ នាយករដ្ឋមន្ត្រីអូស្ត្រាលី លោក Anthony Albanese បាន សន្យា ជួយដល់តំបន់អាស៊ីអាគ្នេយ៍នូវទឹកប្រាក់ចំនួន ៦៧០ លានដុល្លាអូស្ត្រាលី (ប្រហែល ៤៨២ លានដុល្លាអាមេរិក) ក្នុងបរិបទដែល មេដឹកនាំរូបនេះ កំពុងស្វែងរក ការពង្រឹងភាពស្អិតរមួតជាមួយតំបន់។ ថ្លែងសុន្ទរកថាក្នុងសន្និសីទសារព័ត៌មានរួម បន្ទាប់ពីជំនួបរយៈពេលពីរម៉ោងជាមួយប្រធានាធិបតីឥណ្ឌូនេស៊ីលោក Joko Widodo នៅវិមានប្រធានាធិបតី Bogor នៅជាយក្រុងហ្សាកាតានោះ លោកនាយករដ្ឋមន្ត្រី Albanese បានសង្កត់ធ្ងន់ថា៖ “ការតភ្ជាប់កាន់តែស៊ីជម្រៅជាមួយអាស៊ីអាគ្នេយ៍គឺជា អាទិភាពរបស់រដ្ឋាភិបាលខ្ញុំ។ សមាគមប្រជាជាតិអាស៊ីអាគ្នេយ៍ (អាស៊ាន) និងស្ថាប័ន ដឹកនាំដោយអាស៊ាន គឺជាមជ្ឈភាពដាច់ខាតក្នុងចក្ខុវិស័យរបស់យើងខ្ញុំអំពីតំបន់មហា សមុទ្រឥណ្ឌា-ប៉ាស៊ីហ្វិក”។
លោកនាយករដ្ឋមន្ត្រី Albanese បានប្រកាសថា ទីក្រុងកង់បេរ៉ា នឹងតែងតាំង បេសកជនជាន់ខ្ពស់ទទួលបន្ទុកតំបន់អាស៊ាន ហើយបង្កើតនាយកដ្ឋានអាស៊ីអាគ្នេយ៍ ចំណុះក្រសួងការបរទេសនិងពាណិជ្ជកម្ម។ ក្រៅពីនោះ រដ្ឋាភិបាលរបស់លោកនឹង ត្រៀមរៀបចំយុទ្ធសាស្ត្រសេដ្ឋកិច្ចអាស៊ានឆ្នាំ ២០៤០ សំដៅ “វែករកឱកាសក្នុងការ នាំចេញ និងការវិនិយោគនាពេលអនាគតសម្រាប់ទីផ្សារអាស៊ានសំខាន់ៗផងដែរ”៕
