អញ្ជើញជូនពរលោកស្រី Urawadee Sriphiromya ដែលបានតែងតាំងជាឯកអគ្គរដ្ឋទូតវិសាមញ្ញនិងពេញសមត្ថភាពនៃព្រះរាជាណាចក្រថៃប្រចាំនៅវៀតណាម នាយករដ្ឋមន្ត្រី ហ្វាម មិញ ជីញ បានអះអាងថា រដ្ឋាភិបាលវៀតណាមជានិច្ចកាលយកចិត្តទុកដាក់ និងបង្កើតលក្ខណៈងាយស្រួលសម្រាប់លោកស្រីឯកអគ្គរដ្ឋទូតពង្រីកតួនាទីជាស្ពានក្នុងការជំរុញទំនាក់ទំនងភាពជាដៃគូរឹងមាំរវាងប្រទេសទាំងពីរ។ អំពីកិច្ចសហប្រតិបត្តិការទ្វេភាគី លោកនាយករដ្ឋមន្ត្រីបានស្នើឱ្យភាគីទាំងពីររក្សានូវយន្តការ សហប្រតិបត្តិការទ្វេភាគីប្រកបដោយប្រសិទ្ធភាព; ជំរុញកិច្ចសហប្រតិបត្តិការទេសចរណ៍ ការតភ្ជាប់ហេដ្ឋារចនាសម្ព័ន្ធ; ធានាថា គ្មានបុគ្គលឬអង្គការណាមួយត្រូវបានអនុញ្ញាតឱ្យប្រើប្រាស់ទឹកដីនៃប្រទេសមួយប្រឆាំង នឹងប្រទេសមួយផ្សេងទៀតឡើយ។
ចំណែកលោកស្រីឯកអគ្គរដ្ឋទូត Urawadee Sriphiromya បានអះអាងថា លោកស្រីនឹងជំរុញដំណើរទស្សនកិច្ចកម្រិតខ្ពស់រវាងប្រទេសទាំងពីរក្នុងឆ្នាំ ២០២៥ រួមទាំងដំណើរទស្សនកិច្ចនៅវៀតណាមរបស់លោកស្រីនាយករដ្ឋមន្ត្រី និងប្រធានរដ្ឋសភាថៃផងដែរ។ លោកស្រីឯកអគ្គរដ្ឋទូតសង្ឃឹមថា ភាគីទាំងពីរនឹងបន្តពង្រឹងកិច្ចសហប្រតិបត្តិការក្នុងក្របខ័ណ្ឌនៃសមាគមប្រជាជាតិអាស៊ីអាគ្នេយ៍ (អាស៊ាន) ក៏ដូចជានៅក្នុងអង្គការក្នុងតំបន់ដែលប្រទេសទាំងពីរជាសមាជិក៕
