អនុរដ្ឋមន្ត្រីអចិន្រ្តៃយ៍ក្រសួងការបរទេសវៀតណាម លោក ង្វៀន មិញវូ។ (រូបថត៖ Phuong Hoa/TTXVN)

យោងតាមអនុរដ្ឋមន្ត្រីអចិន្រ្តៃយ៍ក្រសួងការបរទេសវៀតណាម លោក ង្វៀន មិញវូ ប្រធានសន្និសីទលើកទី៣៥ នៃបណ្ដាប្រទេសសមាជិកអនុសញ្ញាអង្គការសហប្រជាជាតិស្តីពីច្បាប់សមុទ្រ វៀតណាមបានចុះហត្ថលេខាលើកិច្ចព្រមព្រៀងខាងលើនៅថ្ងៃដំបូងនៃការចុះហត្ថលេខា សម្រេចនីតិវិធីផ្តល់សច្ចាប័ន និងដាក់ឯកសារផ្តល់សច្ចាប័នសម្រាប់បណ្ណសារនៅថ្ងៃទី៩ ខែមិថុនា ឆ្នាំ២០២៥។ ប្រការនេះបង្ហាញពីការសន្យាដ៏មុតមាំ និងការទទួលខុសត្រូវ របស់វៀតណាមក្នុងការការពារសមុទ្រ និងមហាសមុទ្រ ការអភិរក្ស និងប្រើប្រាស់ជីវចម្រុះសមុទ្រប្រកបដោយចីរភាព។

ចំពោះប្រទេសវៀតណាម កិច្ចព្រមព្រៀងខាងលើ បានជួយសម្រួលដល់ការពង្រឹងកិច្ចសហប្រតិបត្តិការអន្តរជាតិ ការទទួលបានចំណេះដឹង ទិន្នន័យ និងបច្ចេកវិទ្យាជឿនលឿន តាមនោះលើកកំពស់សមត្ថភាពស្រាវជ្រាវវិទ្យាសាស្ត្រសមុទ្រ ការគ្រប់គ្រង និងការការពារបរិស្ថានសមុទ្រ។ ក្នុងនាមជាប្រទេសសមាជិកនៃកិច្ចព្រមព្រៀងនេះ វៀតណាមនឹងចូលរួមចំណែកយ៉ាងសកម្ម និងប្រកបដោយការទទួលខុសត្រូវចំពោះការអនុវត្តកិច្ចព្រមព្រៀងប្រកបដោយប្រសិទ្ធភាព ដោយចូលរួមយ៉ាងស៊ីជម្រៅនៅក្នុងយន្តការទាក់ទងនឹងសសរស្តម្ភទាំង៤ រួមមាន៖ ការទទួលបាននិងការចែករំលែកផលប្រយោជន៍ដោយសមធម៌ពីធនធានហ្សែនសមុទ្រ; ការបង្កើត និងការគ្រប់គ្រងតំបន់អភិរក្សសមុទ្រ; ការវាយតម្លៃផលប៉ះពាល់បរិស្ថានចំពោះសកម្មភាពនៅក្នុងតំបន់នៅក្រៅដែនយុត្តាធិការជាតិ និងការកសាងសមត្ថភាព ផ្ទេរបច្ចេកវិទ្យាសមុទ្រ។ ក្នុងពេលជាមួយគ្នានោះ វៀតណាមក៏នឹងឆ្លុះបញ្ចាំងពីសំឡេង និងផលប្រយោជន៍ស្របច្បាប់របស់ប្រទេសនានាដែលមានសមត្ថភាពនៅមានកម្រិត ក៏ដូចជាប្រទេសដែលរងផលប៉ះពាល់យ៉ាងខ្លាំងដោយការប្រែប្រួលអាកាសធាតុ ដោយធានាបាននូវភាពសមស្របនឹងអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ ១៩៨២៕