នារសៀលថ្ងៃទី ១២ មករា នៅទីស្នាក់ការរដ្ឋាភិបាល នាយករដ្ឋមន្ត្រីវៀតណាមលោក Pham Minh Chinh បានអញ្ជើញទទួលជួបប្រធានាធិបតីឥណ្ឌូនេស៊ីលោក Joko Widodo ដែលកំពុងបំពេញទស្សនកិច្ចផ្លូវរដ្ឋនៅវៀតណាម។ នៅក្នុងជំនួបនេះ ថ្នាក់ដឹកនាំទាំងពីរបានវាយតម្លៃខ្ពស់ចំពោះការអភិវឌ្ឍយ៉ាងខ្លាំងក្លារវាងវៀតណាម និងឥណ្ឌូនេស៊ីលើគ្រប់វិស័យ។ ភាគីទាំងពីរបានឯកភាពគ្នាបង្កលក្ខណៈងាយស្រួល និងលើកទឹកចិត្តសហគ្រាសនៃប្រទេសទាំងពីរវិនិយោគលើទីផ្សាររបស់គ្នាទៅវិញទៅមក; ពង្រីកកម្មវិធីសហប្រតិបត្តិការក្នុងក្របខ័ណ្ឌនៃភាពជាដៃគូផ្លាស់ប្តូរថាមពលដោយយុត្តិធម៌ (JTEP)។ លោកនាយករដ្ឋមន្ត្រី Pham Minh Chinh បានស្នើឲ្យឥណ្ឌូណេស៊ី បង្កើតលក្ខខណ្ឌអំណោយផលសម្រាប់ផលិតផលហាឡាល់របស់វៀតណាម ដើម្បីចូលទៅកាន់ទីផ្សារឥណ្ឌូនេស៊ី ហើយ អនុញ្ញាតឲ្យមានការនាំចេញពូជបង្កងឥណ្ឌូនេស៊ីមកវៀតណាមឲ្យបានឆាប់ៗ។ ព្រមទាំងស្នើឱ្យភាគីទាំងពីរពង្រឹងកិច្ចសហប្រតិបត្តិការសន្តិសុខស្បៀង និងជំរុញការចុះហត្ថលេខាលើកិច្ចព្រមព្រៀង សហប្រតិបត្តិការពាណិជ្ជកម្មអង្ករ។ ថ្នាក់ដឹកនាំទាំងពីរក៏បានពិភាក្សាគ្នាអំពីស្ថានភាពក្នុងតំបន់ និងអន្តរជាតិដែលមានការយកចិត្តទុកដាក់ដូចគ្នា។ លោកនាយករដ្ឋមន្ត្រី Pham Minh Chinh បានស្នើឱ្យឥណ្ឌូនេស៊ីជួយឧបត្ថម្ភវៀតណាមក្នុងការរៀបចំប្រកបដោយជោគជ័យនូវវេទិកាអនាគតអាស៊ានស្តីពីការអភិវឌ្ឍយ៉ាងឆាប់រហ័ស និរន្តរភាព និងយកប្រជាជនជាស្នូល ដើម្បីរួមចំណែកក្នុងការកសាងសហគមន៍អាស៊ានដែលធន់និងនិរន្តរភាព។
នារសៀលថ្ងៃទី ១២ មករា ដដែល នៅវិមានរដ្ឋសភា ប្រធានរដ្ឋសភាលោក Vuong Dinh Hue បានអញ្ជើញជួបសន្ទនាជាមួយប្រធានាធិបតីឥណ្ឌូនេស៊ីលោក Joko Widodo ផងដែរ៕
