តបតាមការអញ្ជើញរបស់នាយករដ្ឋមន្ត្រីនៃសាធារណៈរដ្ឋសិង្ហបុរី លោក Lee Hsien Loong និងព្រះមហាក្សត្រប្រ៊ុយណេដារូសាឡឹម ព្រះបាទ Sultan Haji Hassanal Bolkiah នាយករដ្ឋមន្ត្រីវៀតណាមលោក Pham Minh Chinh និងភរិយា បានដឹកនាំគណៈប្រតិភូជាន់ខ្ពស់វៀតណាម អញ្ជើញបំពេញទស្សនកិច្ចជាផ្លូវការនៅសាធារណរដ្ឋសិង្ហបុរី និង ប្រ៊ុយណេ ដារូសាឡឹម ចាប់ពីពីថ្ងៃទី ៨ ដល់ថ្ងៃទី ១១ ខែកុម្ភៈ ឆ្នាំ ២០២៣។ ដំណើរទស្សនកិច្ចផ្លូវការនៅប្រទេសសមាជិកសមាគមប្រជាជាតិអាស៊ីអាគ្នេយ៍ (អាស៊ាន) ទាំងពីរ របស់លោកនាយករដ្ឋមន្ត្រី Pham Minh Chinh បានបង្ហាញពីការគោរព និងបំណងចង់បង្កើតកម្លាំងចលករថ្មីសម្រាប់ទំនាក់ទំនងរវាងវៀតណាម សិង្ហបុរី និងប្រ៊ុយណេ។
វៀតណាម៖ ជាដៃគូសេដ្ឋកិច្ចដ៏សំខាន់របស់សិង្ហបុរី
សិង្ហបុរីគឺជាប្រទេសមួយក្នុងចំណោមប្រទេសដើមដំបូង ដែលបានបង្កើតទំនាក់ទំនងការទូតជាមួយវៀតណាម (ខែសីហា ឆ្នាំ ១៩៧៣) បន្ទាប់ពីកិច្ចព្រមព្រៀងទីក្រុងប៉ារីសឆ្នាំ ១៩៧៣ ត្រូវបានចុះហត្ថលេខា។ ទំនាក់ទំនងរវាងប្រទេសទាំងពីរបានកត់សម្គាល់ជំហានអភិវឌ្ឍន៍យ៉ាងឆាប់រហ័ស ជាពិសេសគឺបន្ទាប់ពីវៀតណាមបានក្លាយទៅជាសមាជិកអាស៊ានក្នុងឆ្នាំ ១៩៩៥ ដោយប្រកៀកស្មាជាមួយសិង្ហបុរីក្រោម "ដំបូលផ្ទះរួម"។ ក្នុងឆ្នាំ ២០១៣ សិង្ហបុរីបានក្លាយទៅជាប្រទេសមួយ ក្នុងចំណោមប្រទេសជាសមាជិកអាស៊ានដើមដំបូង ដែលបានបង្កើតទំនាក់ទំនងដៃគូយុទ្ធសាស្ត្រជាមួយវៀតណាមបានបើកសករាជថ្មីនៃកិច្ចសហប្រតិបត្តិការដើម្បីផលប្រយោជន៍ដូចគ្នា គោរព និងជឿទុកចិត្តរវាងប្រទេសទាំងពីរ។
កិច្ចសហប្រតិបត្តិការសេដ្ឋកិច្ចកំពុងជាចំណុចលេចធ្លោសម្រាប់ទំនាក់ទំនងទ្វេភាគីរវាងវៀតណាម និងសិង្ហបុរី។ វៀតណាមកំពុងជាខឿនសេដ្ឋកិច្ចមួយ ក្នុងចំណោមខឿនសេដ្ឋកិច្ចអភិវឌ្ឍន៍យ៉ាងខ្លាំងក្លាក្នុងតំបន់។ កាលពីឆ្នាំមុន GDP របស់វៀតណាមមានកំណើនជាង ៨%។ លទ្ធផលពោលខាងលើមិនត្រឹមតែឆ្លុះបញ្ចាំងពីការប្តេជ្ញាចិត្តរបស់ប្រជាជនវៀតណាមប៉ុណ្ណោះទេ ថែមទាំងសរឲ្យឃើញពីសារៈសំខាន់យ៉ាងច្បាស់លាស់របស់រដ្ឋាភិបាលក្នុងការតម្រង់ទិសដៅសម្រាប់ប្រទេសជាតិឈានឡើងផងដែរ។
បណ្ដាក្រុមហ៊ុនសិង្ហបុរីក៏បានឃើញពីសក្ដានុពលដ៏ធំធេងនៃខឿនសេដ្ឋកិច្ចវៀតណាម។ ក្នុងរយៈពេល ៣ ឆ្នាំកន្លងទៅសិង្ហបុរីគឺជាវិនិយោគិនបរទេសដ៏ធំរបស់វៀតណាម។ បន្ទាប់ពីដំណើរទស្សនកិច្ចជាផ្លូវការនៅសិង្ហបុរីរបស់លោកនាយករដ្ឋមន្ត្រី Pham Minh Chinh ឱកាសអភិវឌ្ឍន៍ជាច្រើនសម្រាប់ទំនាក់ទំនងសិង្ហបុរី-វៀតណាមលើវិស័យដូចជា៖ សេដ្ឋកិច្ចឌីជីថល ថាមពលកកើតឡើងវិញ ឥណទានកាបូន និងហេដ្ឋារចនាសម្ព័ន្ធប្រកបដោយនិរន្តរភាព នឹងត្រូវបានអនុវត្តន៍យ៉ាងខ្លាំងក្លា។ វាយតម្លៃអំពីយថាទស្សន៍នៃកិច្ចសហប្រតិបត្តិការទ្វេភាគី លោកបណ្ឌិត ឈាងវណ្ណារិទ្ធ មកពីសាកលវិទ្យាល័យបច្ចេកវិទ្យា Nanyang ប្រធានវិទ្យាស្ថានសិក្សាស្រាវជ្រាវចក្ខុវិស័យអាស៊ីបានចាត់ទុកថា៖“សិង្ហបុរីមានបច្ចេកវិទ្យា ខឿនសេដ្ឋកិច្ចបច្ចេកវិទ្យាឌីជីថល សេដ្ឋកិច្ចបៃតង និងសន្តិសុខតាមបណ្ដាញអ៊ីនធឺណិតទំនើប។ ខណៈដែលវៀតណាមក៏មានអត្ថប្រយោជន៍ជាច្រើន ដើម្បីផ្គត់ផ្គង់ដូចជា៖ វៀតណាមកំពុងផ្លាស់ប្ដូរឌីជីថលយ៉ាងខ្លាំងក្លា។ វៀតណាមគឺជាខឿនសេដ្ឋកិច្ចមួយ ក្នុងចំណោមខឿនសេដ្ឋកិច្ចឌីជីថលអភិវឌ្ឍន៍យ៉ាងឆាប់រហ័សបំផុតនៅអាស៊ីអាគ្នេយ៍។ សហគ្រាសរដ្ឋជាច្រើនមានជំនាញខាងបច្ចេកវិទ្យា ហើយមានស្មារតីចាប់ផ្ដើមអាជីវកម្មបច្ចេកវិទ្យា។ ដូច្នេះខ្ញុំគិតថា ទាំងអស់នេះគឺជាវិស័យសហប្រតិបត្តិការដ៏មានសក្ដានុពល។ ប្រទេសទាំងពីរអាចជំរុញកិច្ចសហប្រតិបត្តិការកសាងសមត្ថភាពអំពីសេដ្ឋកិច្ចបច្ចេកវិទ្យាឌីជីថល សេដ្ឋកិច្ចបៃតង បណ្តាញទីក្រុងឆ្លាតវៃ និងសន្តិសុខតាមបណ្ដាញអ៊ីនធឺណិតផងដែរ”។
បង្កើនកិច្ចសហប្រតិបត្តិការជាមួយប្រ៊ុយណេ
វៀតណាម និងប្រ៊ុយណេបានបង្កើតទំនាក់ទំនងការទូតនៅថ្ងៃទី ២៩ ខែកុម្ភៈ ឆ្នាំ ១៩៩២ ហើយបានតម្លើងថ្នាក់ជាទំនាក់ទំនងភាពជាដៃគូគ្រប់ជ្រុងជ្រោយ ក្នុង ឱកាសនៃដំណើរទស្សនកិច្ចផ្លូវរដ្ឋរបស់ព្រះមហាក្សត្រប្រ៊ុយណេដារូសាឡឹមនៅវៀតណាមក្នុងខែមីនា ឆ្នាំ ២០១៩ ក្នុងកិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគ ប្រ៊ុយណេដារូសាឡឹមគឺជាទីផ្សារតូចមួយសម្រាប់ទំនិញនាំចេញរបស់វៀតណាម។ ក្នុងឆ្នាំ ២០២២ ទំហំពាណិជ្ជកម្មទ្វេភាគីសម្រេចបានជាង ៧០០ លានដុល្លារអាមេរិក កើនឡើង ១៣៤% បើធៀបនឹងឆ្នាំ ២០២១ លើសពីគោលដៅ ៥០០ លានដុល្លារអាមេរិកនៅឆ្នាំ ២០២៥ ដែលមេដឹកនាំនៃប្រទេសទាំងពីរបានដាក់ចេញ។ ប្រ៊ុយណេជាប់ចំណាត់ថ្នាក់ទី ២៦ ក្នុងចំណោមប្រទេស និងតំបន់ដែនដីចំនួន ១៤១ ដែលវិនិយោគនៅវៀតណាមដោយមានដើមទុនចុះបញ្ជីសរុបចំនួន ៩៧១ លានដុល្លារអាមេរិក ដោយផ្តោតលើឧស្សាហកម្មកែច្នៃ សំណង់ និងអាជីវកម្មអចលនទ្រព្យ។
នាពេលខាងមុខ ភាគីទាំងពីរមានតម្រូវការជំរុញកិច្ចសហប្រតិបត្តិការរវាងសហគ្រាសនៃប្រទេសទាំងពីរលើវិស័យសក្តានុពលដូចជា៖ កសិកម្ម រុក្ខកម្ម ជលផល និងម្ហូបអាហារឥស្លាម Halal សាងសង់ អភិវឌ្ឍន៍ហេដ្ឋារចនាសម្ព័ន្ធ; ជំរុញសហគ្រាសវៀតណាមចូលរួមបណ្តាក់ទុន និងសហប្រតិបត្តិការជាមួយសហគ្រាសប្រ៊ុយណេ។ វាយតម្លៃទំនាក់ទំនងវៀតណាម-ប្រ៊ុយណេ លោកបណ្ឌិត ឈាង វណ្ណារិទ្ធ មានប្រសាសន៍ថា៖ “ទោះបីជាទំនាក់ទំនងវៀតណាម-ប្រ៊ុយណេមិនទាន់ទទួលបានជោគជ័យជាច្រើនដូចជាទំនាក់ទំនងវៀតណាម-សិង្ហបុរីអំពីពាណិជ្ជកម្ម វិនិយោគក៏ដោយ ប៉ុន្តែមានកិច្ចសហប្រតិបត្តិការដ៏ពិសេសដូចជាកិច្ចសហប្រតិបត្តិការលើវិស័យប្រេង ឧស្ម័ន។ លើសពីនេះទៅទៀត ក្នុងនាមជាសមាជិកអាស៊ាន វៀតណាម និងប្រ៊ុយណេនឹងសហការគ្នាយ៉ាងជិតស្និទ្ធក្រោមក្របខណ្ឌ និងយន្តការដឹកនាំដោយអាស៊ាន ក្នុងនោះមានរបៀបវារៈស្តីពីបញ្ហាក្នុងតំបន់ ដែលមានការយកចិត្តទុកដាក់ដូចគ្នា ដូចជាបញ្ហាសមុទ្រខាងកើតផងដែរ”។
ដំណើរទស្សនកិច្ចជាផ្លូវការនៅសិង្ហបុរី និងប្រ៊ុយណេដារូសាឡឹមរបស់លោកនាយករដ្ឋមន្ត្រី Pham Minh Chinh និងភរិយានឹងរួមចំណែកពង្រឹងទំនុកចិត្តនយោបាយ និងជំរុញពាណិជ្ជកម្ម និងវិនិយោគរវាងវៀតណាម និងប្រទេសជាសមាជិកអាស៊ានទាំងពីរ ក៏ដូចជាជំរុញកិច្ចសហប្រតិបត្តិការ និងការសម្របសម្រួលរវាងភាគីនានាក្នុងបញ្ហាតំបន់ និងអន្តរជាតិដែលមានការយកចិត្តទុកដាក់ដូចគ្នាផងដែរ៕
