ចាប់ពីម៉ោង៧ ព្រឹកនេះ (ថ្ងៃទី២៥ ខែកុម្ភៈ) ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ បានចាប់ផ្តើមជាផ្លូវការហើយ នៅការិយាល័យបោះឆ្នោតចំនួន ៣៣ នៃមណ្ឌលបោះឆ្នោតចំនួន ៨ ទូទាំងប្រទេស។ គណៈកម្មាធិការជាតិរៀបចំការបោះឆ្នោតកម្ពុជា (គ.ជ.ប) បានឲ្យដឹងថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ នឹងប្រព្រឹត្តទៅតាមទម្រង់នៃការបោះឆ្នោតអសកល។
ចូលរួមការបោះឆ្នោតលើកនេះ មានគណបក្សធំៗចំនួន៤ គឺគណបក្សប្រជាជនកម្ពុជា គណបក្សឆន្ទៈខ្មែរ គណបក្សហ៊្វុនស៊ិនប៉ិច និងគណបក្សកម្លាំងជាតិ។ គណបក្សនយោបាយដែលមានបេក្ខជនចូលរួមការបោះឆ្នោតនឹងប្រជែងយកអាសនៈព្រឹទ្ធសភាចំនួន ៥៨ លើចំនួន ៦២។ ក្នុងចំណោមអាសនៈទាំង ៤ ដែលនៅសេសសល់ មាន ២ អាសនៈចាត់តាំងដោយព្រះមហាក្សត្រកម្ពុជា និង ២ អាសនៈត្រូវបានរដ្ឋសភាតែងតាំងតាមរយៈដំណើរការបោះឆ្នោតទំនុកចិត្ត។
សេចក្តីប្រកាសរបស់ គ.ជ.ប កាលពីម្សិលមិញ (ថ្ងៃទី២៤ ខែកុម្ភៈ) បានឲ្យដឹងថា អ្នកសង្កេតការណ៍ជាតិ អន្តរជាតិ និងភ្ញៀវពិសេសជិត ៨០០នាក់ បានចុះឈ្មោះ ដើម្បីតាមដាន និងត្រួតពិនិត្យការបោះឆ្នោតនេះ។
យោងតាមបទប្បញ្ញត្តិ និងកាលវិភាគបោះឆ្នោតរបស់ គ.ជ.ប បន្ទាប់ពីបញ្ចប់សកម្មភាពបោះឆ្នោតនៅម៉ោង ៣:00 រសៀលថ្ងៃនេះ ការិយាល័យបោះឆ្នោតនឹងបិទ ហើយក្លាយទៅជាការិយាល័យរាប់សន្លឹកឆ្នោត ហើយលទ្ធផលបឋមនឹងប្រកាសនៅថ្ងៃដដែល។ លទ្ធផលផ្លូវការនៃការបោះឆ្នោតត្រូវបានគេរំពឹងថានឹងត្រូវប្រកាសនៅថ្ងៃទី ២ ខែមេសាខាងមុខ៕
