បន្ទាប់ពីបានស្តាប់របាយការណ៍អំពីស្ថានភាពផលិតកម្ម និងអាជីវកម្មរបស់សហគ្រាសវៀតណមដ៏លេចធ្លោ ដែលបានឈរជើងយ៉ាងរឹងមាំក្នុងប្រទេសសាម៉ីប្ដូចជា៖ សម្ព័ន្ធក្រុមហ៊ុនកៅស៊ូវៀតណាម ក្រុមហ៊ុន Viettel នៅកម្ពុជា ធនាគារវិនិយោគ និងអភិវឌ្ឍន៍វៀតណាមនៅកម្ពុជា និងសហគ្រាសមួយចំនួនទៀត... លោកឧបនាយករដ្ឋមន្ត្រី Ho Duc Phoc បានវាយតំលៃខ្ពស់ចំពោះលទ្ធផលដែលបណ្ដាសហគ្រាសសម្រេចបាន។ លោកឧបនាយករដ្ឋមន្ត្រីបានមានប្រសាសន៍ថា លទ្ធផលនៃការវិនិយោគនៅកម្ពុជាមិនត្រឹមតែនាំមកនូវប្រសិទ្ធភាពសេដ្ឋកិច្ចដល់សហគ្រាសខ្លួនឯងប៉ុណ្ណោះទេ ថែមទាំងជាការរួមចំណែកប្រកបដោយអត្ថន័យសម្រាប់ទំនាក់ទំនងមិត្តភាពវៀតណាម-កម្ពុជា ដោយធ្វើជាស្ពានដ៏សំខាន់ក្នុងការបណ្តុះ ពង្រឹងនិងពង្រីកទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរទៀតផង។ លោកឧបនាយករដ្ឋមន្ត្រីក៏បានអះអាងថា រដ្ឋាភិបាលជានិច្ចកាលសម្របសម្រួលយ៉ាងជិតស្និទ្ធជាមួយភាគីកម្ពុជា ដើម្បីបង្កើតលក្ខខណ្ឌអំណោយផល និងការពារសិទ្ធិស្របច្បាប់សម្រាប់សហគ្រាសវៀតណាម។
បច្ចុប្បន្ននេះ វៀតណាមមានគម្រោងវិនិយោគដែលមានសុពលភាពជាង ២០០ នៅកម្ពុជា ជាមួយនឹងដើមទុនចុះបញ្ជីសរុបចំនួន ២,៩៤ ពាន់លានដុល្លារអាមេរិក ដែលនាំមុខគេក្នុងសមាគមប្រជាជាតិអាស៊ីអាគ្នេយ៍ (អាស៊ាន) និងស្ថិតក្នុងចំណោមប្រទេសទាំង ៥ ដែលមានការវិនិយោគផ្ទាល់ច្រើនជាងគេនៅកម្ពុជា។ ការវិនិយោគនៅកម្ពុជាក៏ជាប់ចំណាត់ថ្នាក់លេខ២ក្នុងចំណោមប្រទេស និងតំបន់ដែនដីចំនួន៧៩ កន្លែងដែលវៀតណាមកំពុងវិនិយោគផងដែរ៕
