នៅដើមអត្ថបទ លោកអគ្គលេខាបក្ស តូ ឡឹម បានរំលឹកឡើងវិញនូវប្រវត្តិនៃទំនាក់ទំនងមិត្តភាពជិតស្និទ្ធ និងសមិទ្ធិផលនៃកិច្ចសហប្រតិបត្តិការលើគ្រប់វិស័យរវាងវៀតណាម និង ចិន។ លោកអគ្គលេខាបក្ស តូ ឡឹម បានអះអាងថា ទំនាក់ទំនងរវាងបក្សទាំងពីរ ប្រទេសទាំងពីរកំពុងអភិវឌ្ឍយ៉ាងល្អលើគ្រប់វិស័យ ដែលឆ្លុះបញ្ចាំងពីភាពជាដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយ ក៏ដូចជា សហគមន៍ចែករំលែកអនាគតប្រកបដោយអត្ថន័យជាយុទ្ធសាស្ត្រ ដែលប្រទេសទាំងពីរបានលើកតម្កើងក្នុងខែធ្នូ ឆ្នាំ ២០២៣។
ដើម្បីជំរុញទំនាក់ទំនងវៀតណាម - ចិន នាពេលខាងមុខក្នុងបរិបទដែលពិភពលោកកំពុងប្រឈមមុខនឹងការផ្លាស់ប្តូរជាមូលដ្ឋាននៃសម័យកាលនោះ អគ្គលេខាបក្ស លោក តូ ឡឹមបានសង្កត់ធ្ងន់ថា ប្រទេសទាំងពីរត្រូវរួមគ្នាកំណត់ចក្ខុវិស័យសម្រាប់យុគសម័យថ្មីនៃទំនាក់ទំនងវៀតណាម - ចិន ដោយផ្អែកលើសសរស្តម្ភចំនួនបួន រួមមានៈ រក្សាការផ្លាស់ប្តូរយុទ្ធសាស្ត្រ លើកកម្ពស់ទំនុកចិត្តនយោបាយ; បង្កើនកិច្ចសហប្រតិបត្តិការជាក់ស្តែង លើគ្រប់វិស័យ បង្កើតប៉ូលកំណើនថ្មី; ពង្រឹងបន្ថែមទៀតនូវមូលដ្ឋានសង្គមងាយស្រួលសម្រាប់ទំនាក់ទំនងវៀតណាម-ចិន; រួមដៃគ្នាកសាងបរិយាកាសសន្តិភាព និងស្ថិរភាពសម្រាប់យុគសម័យថ្មី ដែលជាយុគសម័យអភិវឌ្ឍន៍ថ្មីរបស់ប្រទេសនីមួយៗ។
នាថ្ងៃទី ១៤ មេសា អគ្គលេខាបក្សប្រធានរដ្ឋចិន លោក ស៊ី ជីនពីង អញ្ជើញមានអត្ថបទសរសេរមួយចុះលើកាសែតប្រជាជន (វៀតណាម) ដោយស្ងើចសរសើរអំពីទំនាក់ទំនងមិត្តភាពជិតស្និទ្ធរវាងបក្សទាំងពីរ ប្រទេសទាំងពីនិងប្រជាជនទាំងពីរ ដោយសង្កត់ធ្ងន់ថា សហគមន៍ចែករំលែកអនាគតចិន - វៀតណាម មានប្រភពចេញពីការជឿទុកចិត្តខាងនយោបាយយ៉ាងស៊ីជម្រៅ ចាក់ឫសក្នុងដីមានជីជាតិនៃកិច្ចសហប្រតិបត្តិការនិងត្រូវបានជំរុញតាមរយៈការជួបប្រាស្រ័យមនុស្សសាស្រយ៉ាងជិតស្និទ្ធ។
អគ្គលេខាបក្ស ប្រធានរដ្ឋចិន លោក ស៊ី ជីនពីង បានអះអាងថា ចិនតែងតែចាត់ទុកវៀតណាមជាទិសដៅអាទិភាពក្នុងទំនាក់ទំនងការទូត ជាអ្នកជិតខាង ហើយមានបំណងរួមជាមួយវៀតណាម ដើម្បីធ្វើឲ្យស៊ីជម្រៅ ថែមទៀតលើគ្រប់វិស័យក្នុងការកសាងសហគមន៍ចិន-វៀតណាមដែលមានអត្ថន័យយុទ្ធសាស្ត្រ៕
