នាថ្ងៃទី២៩ ខែមិថុនា ឆ្នាំ២០២២ នៅទីក្រុងហាណូយ អនុប្រធានប្រចាំការរដ្ឋសភាវៀតណាម លោក Tran Thanh Man បានអញ្ជើញធ្វើកិច្ចសន្ទនាតាមទូរស័ព្ទជាមួយអនុប្រធានគណៈកម្មការអចិន្ត្រៃយ៍នៃមហាសន្និបាតតំណាងប្រជាជនទូទាំងប្រទេសចិន (រដ្ឋសភា) លោក Wang Chen។
អនុប្រធានប្រចាំការរដ្ឋសភាវៀតណាម លោក Tran Thanh Man បានស្នើឲ្យភាគីទាំងពីរបន្តបង្កើនការផ្លាស់ប្ដូរយុទ្ធសាស្ត្រ និងពង្រឹងជំនឿជាក់នយោបាយតាមរយៈការផ្លាស់ប្ដូរ និងជួបប្រាស្រ័យជាន់ខ្ពស់ ជំរុញកិច្ចសហប្រតិបត្តិការលើគ្រប់វិស័យយ៉ាងជាក់ស្ដែង ក្នុងនោះបន្តផ្ដោតសំខាន់លើការជំរុញ និងលើកកម្ពស់ប្រសិទ្ធភាពសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគ វប្បធម៌-អប់រំ និងកិច្ចសហប្រតិបត្តិការប្រយុទ្ធប្រឆាំងជំងឺរាតត្បាតកូវីដ ១៩។
ទាក់ទងនឹងបញ្ហាសមុទ្រខាងកើត អនុប្រធានប្រចាំការរដ្ឋសភា លោក Tran Thanh Man បានអះអាងសារជាថ្មីថា ភាគីទាំងពីរគប្បីគោរពយ៉ាងម៉ឺងម៉ាត់នូវការយល់ដឹងរួម និងកិច្ចព្រមព្រៀងរួមរបស់ថ្នាក់ដឹកនាំជាន់ខ្ពស់នៃបក្សទាំងពីរ និងរដ្ឋទាំងពីរ ព្រមទាំងដោះស្រាយបញ្ហានៅសមុទ្រដោយសន្តិវិធី ស្របតាមច្បាប់អន្តរជាតិ ក្នុងនោះមានអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២។
ជាការឆ្លើយតបអនុប្រធានគណៈកម្មការអចិន្ត្រៃយ៍នៃមហាសន្និបាតតំណាងប្រជាជនទូទាំងប្រទេសចិន លោក Wang Chen មានគោលបំណងចង់រួមជាមួយវៀតណាមពង្រីកទំនាក់ទំនងមិត្តភាពជាប្រពៃណី បង្កើនទំនុកទុកចិត្តនយោបាយ ធ្វើឱ្យស៊ីជម្រៅថែមទៀតនូវកិច្ចសហប្រតិបត្តិការដែលមានផលប្រយោជន៍ដូចគ្នា នាំមកនូវផលប្រយោជន៍ជាច្រើនដល់ប្រជាជននៃប្រទេសទាំងពីរ។ លោក Wang Chen បានអះអាងថា ចិននឹងបន្តជួយឧបត្ថម្ភវៀតណាមក្នុងការប្រយុទ្ធប្រឆាំងជំងឺរាតត្បាតកូវីដ ១៩ ក៏ដូចជាគោរពការយល់ដឹងរួមថ្នាក់ជាន់ខ្ពស់ក្នុងការថែរក្សាសន្តិភាព ស្ថិរភាពនៅសមុទ្រខាងកើតផងដែរ៕
