ចាប់ពីថ្ងៃទី ១០ ដល់ទី ១២ ខែធ្នូ (ម៉ោងក្នុងតំបន់) នៅទីស្នាក់ការអង្គការសហប្រជាជាតិ (UN) នៅទីក្រុងញូវយ៉ក (សហរដ្ឋអាមេរិក) មហាសន្និបាតអង្គការសហប្រជាជាតិនីតិកាលទី ៧៩ បានបើកសម័យប្រជុំពិភាក្សាពេញអង្គជាប្រចាំស្តីពីមហាសមុទ្រ និងច្បាប់សមុទ្រ ចំឱកាសខួបលើកទី ៣០ ទិវាអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ចូលជាធរមាន។ ថ្លែងមតិក្នុងសម័យប្រជុំ លោកឯកអគ្គរដ្ឋទូត Dang Hoang Giang ប្រធានបេសកកម្មវៀតណាមប្រចាំនៅ UN បានអំពាវនាវឲ្យប្រទេសនានាបន្តជំរុញការគោរព UNCLOS លើវិស័យជាក់លាក់នីមួយៗនៃកិច្ចសហប្រតិបត្តិការសមុទ្រហើយអះអាងថា វៀតណាមជានិច្ចកាលយកចិត្តទុកដាក់ដល់សកម្មភាពសេដ្ឋកិច្ចសមុទ្រក្នុងយុទ្ធសាស្ត្រធានាកំណើន និងការអភិវឌ្ឍប្រទេសប្រកបដោយចីរភាព។
ទាក់ទិននឹងស្ថានភាពនៅសមុទ្រខាងកើត លោកឯកអគ្គរដ្ឋទូត Dang Hoang Giang បានសម្តែងការព្រួយបារម្ភអំពីសកម្មភាព និងឧប្បត្តិហេតុតានតឹងជាច្រើនដែលកើតឡើងនៅសមុទ្រខាងកើតនាពេលថ្មីៗនេះ បានប៉ះពាល់ដល់សន្តិភាព និងសន្តិសុខក្នុងតំបន់ ដើរផ្ទុយទៅនឹងបទប្បញ្ញត្តិរបស់ UNCLOS។ ដោយសង្កត់ធ្ងន់លើជំហរជាគោលការណ៍របស់វៀតណាមដែលគាំទ្រការដោះស្រាយវិវាទដោយសន្តិវិធី ស្របតាមច្បាប់អន្តរជាតិ រួមទាំង UNCLOS នោះ លោកឯកអគ្គរដ្ឋទូត Dang Hoang Giang បានស្នើឱ្យប្រទេសពាក់ព័ន្ធអនុវត្តន៍ឱ្យបានពេញលេញ និងប្រកបដោយសុឆន្ទៈនូវកាតព្វកិច្ចក្រោម UNCLOS អនុវត្តន៍យ៉ាងពេញលេញ និងប្រកបដោយប្រសិទ្ធភាពនូវខ្លឹមសារនៃសេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រខាងកើត (DOC) អនុវត្តន៍ការអត់ធ្មត់ កសាងទំនុកចិត្ត ដោះស្រាយការវិវាទដោយសន្តិវិធី គោរពយ៉ាងពេញលេញនូវដំណើរការការទូត និងគតិយុត្ត។ វៀតណាមជានិច្ចកាលគោរពសិទ្ធិរបស់បណ្ដាប្រទេសជាប់មាត់សមុទ្រក្នុងការចេញផ្សាយច្បាប់សមុទ្រក្នុងស្រុក ស្របតាម UNCLOS ព្រមទាំងសំណូមពរឲ្យមានការគោរពអធិបតេយ្យភាព និងសិទ្ធិស្របច្បាប់របស់ប្រទេសជាប់មាត់សមុទ្រដទៃទៀត។ វៀតណាមអះអាងសារជាថ្មីនូវការសន្យាអនុវត្តន៍ DOC យ៉ាងពេញលេញ ហើយបន្តពិភាក្សាយ៉ាងសកម្មជាមួយប្រទេសផ្សេងៗ ឆ្ពោះទៅរកការសម្រេចក្រមប្រតិបត្តិនៅសមុទ្រខាងកើត (COC) ប្រកបដោយសុពលភាព ភាពជាក់ស្ដែង និងស្របតាមច្បាប់អន្តរជាតិ ជាពិសេស UNCLOS។
គួរឲ្យជម្រាបថា UNCLOS ត្រូវបានអនុម័តនៅថ្ងៃទី ១០ ខែធ្នូ ឆ្នាំ ១៩៨២ ហើយចូលជាធរមានជាផ្លូវការនៅថ្ងៃទី ១៦ ខែវិច្ឆិកា ឆ្នាំ ១៩៩៤។ វៀតណាមជាប្រទេសមួយក្នុងចំណោមប្រទេស១០៧ដំបូងគេដែលបានចុះហត្ថលេខា ហើយបន្ទាប់មកផ្តល់សច្ចាប័នលើអនុសញ្ញានេះនៅថ្ងៃទី២៣ ខែមិថុនា ឆ្នាំ១៩៩៤។ បច្ចុប្បន្ន UNCLOS មានសមាជិកចំនួន ១៧០៕
