នេះជាការបញ្ជាក់របស់ឯកអគ្គរដ្ឋទូតវៀតណាម ប្រចាំនៅប្រទេសថៃ លោក Pham Viet Hung ពេលឆ្លើយសម្ភាសន៍ជាមួយអ្នកសារព័ត៌មាននៃវិទ្យុសំឡេងវៀតណាមប្រចាំនៅថៃ។
យោងតាមលោកឯកអគ្គរដ្ឋទូត Pham Viet Hung នេះគឺជាដំណើរទស្សនកិច្ចផ្លូវការលើកដំបូងនៅវៀតណាមរបស់នាយករដ្ឋមន្ត្រីថៃ ក្នុងរយៈពេល ១១ ឆ្នាំបន្ទាប់ពីដំណើរទស្សនកិច្ចរបស់អតីតនាយករដ្ឋមន្ត្រី Prayut Chan-o-cha ក្នុងឱកាសរំលឹកខួបលើកទី ៥០ នៃទំនាក់ទំនងការទូតនៃប្រទេសទាំងពីរ (៦ សីហា ១៩៧៦ - ៦ សីហា ២០២៦) ដែលជាព្រឹត្តិការណ៏ប្រវត្តិសាស្ត្រដ៏សំខាន់នៃប្រទេសទាំងពីរ។ លោកឯកអគ្គរដ្ឋទូត Pham Viet Hung បានឲ្យដឹងថា៖ ក្នុងដំណើរទស្សនកិច្ចនេះ ភាគីទាំងពីរនឹងដំណើរការកិច្ចប្រជុំគណៈរដ្ឋមន្ត្រីរួមលើកទី៤ ជាយន្តការមួយបង្ហាញពីចំណាប់អារម្មណ៍ខ្ពស់ និងការប្តេជ្ញាចិត្តរួមក្នុងការអភិវឌ្ឍទំនាក់ទំនងទ្វេភាគី។ ក្រោមការដឹកនាំជាសហប្រធាន និងការណែនាំផ្ទាល់របស់នាយករដ្ឋមន្ត្រីទាំងពីររូប ភាគីទាំងពីរនឹងពិនិត្យ និងដោះស្រាយបញ្ហាដែលកំពុងកើតមាន និងកំណត់ទិសដៅសម្រាប់កិច្ចសហប្រតិបត្តិការលើគ្រប់វិស័យ។ លើវិស័យនយោបាយ និងការទូត ភាគីទាំងពីរនឹងផ្តោតលើការពិភាក្សាអំពីវិធានការបន្តពង្រឹងទំនុកចិត្តនយោបាយ ការផ្លាស់ប្តូរគណៈប្រតិភូ និងពង្រឹងកិច្ចសហប្រតិបត្តិការលើគ្រប់បណ្តាញបក្ស រដ្ឋាភិបាល រដ្ឋសភា និងមូលដ្ឋាន ព្រមទាំងសម្របសម្រួលយ៉ាងជិតស្និទ្ធនៅវេទិកាតំបន់ និងអន្តរជាតិ ជាពិសេសក្នុងក្របខ័ណ្ឌអាស៊ាន និងយន្តការអនុតំបន់មេគង្គ។ ភាគីទាំងពីរនឹងមានបំណងបង្កើនទំហំពាណិជ្ជកម្មទ្វេភាគីដល់ ២៥ ពាន់លានដុល្លាអាមេរិកនាពេលខាងមុខ ប្រកបដោយតុល្យភាព និងនិរន្តរភាព”៕
