ទិដ្ឋភាពរួម​នៃកិច្ច​ប្រជុំ​រវាង​នាយករដ្ឋមន្ត្រីនៃប្រទេសទាំង​ពីរ។ រូបថត៖ VNA

 បន្ទាប់ពីពិធីទទួលបដិសណ្ឋារកិច្ចជាផ្លូវការ នាព្រឹកថ្ងៃទី ៤ ឧសភា នៅទីក្រុងហាណូយ នាយករដ្ឋមន្ត្រីវៀតណាម លោក Pham Minh Chinh បានអញ្ជើញជួបពិភាក្សាការងារជាមួយនាយករដ្ឋមន្ត្រីលុចសំបួលោក Xavier Bettel។

នៅក្នុងកិច្ចពិភាក្សាការងារ នាយករដ្ឋមន្ត្រីវៀតណាមលោក Pham Minh Chinh បានវាយតម្លៃថា ដំណើរទស្សនកិច្ចនៅវៀតណាមរបស់លោកនាយករដ្ឋមន្ត្រី Xavier Bettel មានអត្ថន័យដ៏សំខាន់ ជាពិសេសគឺក្នុងបរិបទ ដែលប្រទេសទាំងពីរកំពុងរំលឹកខួបលើកទី ៥០ ទិវាបង្កើតទំនាក់ទំនងការទូត (១៥ វិច្ឆិកា ១៩៧៣ - ១៥ វិច្ឆិកា ២០២៣ )។ លោកបានអះអាងពីបំណង និងការប្តេជ្ញារបស់ភាគីទាំងពីរ ដើម្បីនាំទំនាក់ទំនងនៃប្រទេសទាំងពីរទៅដំណាក់កាលអភិវឌ្ឍន៍ថ្មី ស៊ីជម្រៅ ប្រកបដោយប្រសិទ្ធភាពជាក់ស្ដែង។

លោកនាយករដ្ឋមន្ត្រី Pham Minh Chinh បានវាយតំលៃខ្ពស់ចំពោះជំហានអភិវឌ្ឍន៍ដ៏សកម្មក្នុងការផ្លាស់ប្តូរសេដ្ឋកិច្ច និងពាណិជ្ជកម្មរវាងប្រទេសទាំងពីរ ជាពិសេសគឺលើវិស័យវិនិយោគ នៅពេលដែលលុចសំបួជាវិនិយោគិនធំទី ៣ របស់អឺរ៉ុបនៅវៀតណាមជាមួយនឹងទុនវិនិយោគសរុបសម្រេចបាន ២,៦ ពាន់លានដុល្លារអាមេរិក។

ជាការឆ្លើយតប លោកនាយករដ្ឋមន្រ្តី Xavier Bettel បានឯកភាពលើការជំរុញបណ្តាប្រទេសសហភាពអឺរ៉ុប (EU) ផ្តល់សច្ចាប័នលើកិច្ចព្រមព្រៀងគាំពារការវិនិយោគវៀតណាម - EU (EVIPA) និង គាំទ្រការបង្កើនកិច្ចសហប្រតិបត្តិការរវាង EU និងវៀតណាមស្ដីពីការអភិវឌ្ឍរបរនេសាទត្រីប្រកបដោយចីរភាព។

អគ្គនាយិការទីភ្នាក់ងារសារព័ត៌មានវៀតណាម លោកស្រី Vu Viet Trang បានឧទ្ទេសនាមដល់នាយករដ្ឋមន្ត្រី លោក Pham Minh Chinh និងនាយករដ្ឋមន្ត្រីប្រទេសលុចសំបួ លោក Xavier Bettel រូបភាពនៃកិច្ចសហប្រតិបត្តិការរវាងវៀតណាម និងលុចសំបួ។ រូបថត៖ Duong Giang-VNA

នាយករដ្ឋមន្ត្រីទាំងពីររូបបានឯកភាពគ្នាស្ដីពីវិធានការ សំដៅជំរុញជំជឿទុកចិត្តផ្នែកនយោបាយ និងធ្វើឲ្យស៊ីជម្រៅថែមទៀតទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ សិក្សាស្រាវជ្រាវបង្កើតយន្តការសហប្រតិបត្តិការថ្មីសមស្របទៅនឹងសក្តានុពល តម្រូវការសហប្រតិបត្តិការ និងការអភិវឌ្ឍរវាងប្រទេសទាំងពីរ។ ភាគីទាំងពីរបានឯកភាពគ្នាអនុវត្តន៍យ៉ាងពេញលេញ និងប្រកបដោយប្រសិទ្ធភាពនូវកិច្ចព្រមព្រៀងពាណិជ្ជកម្មសេរីវៀតណាម - សហភាពអឺរ៉ុប (EVFTA); បង្កើនកិច្ចសហប្រតិបត្តិការលើវិស័យផ្សេងៗទៀត ដូចជា៖ វប្បធម៌ វិទ្យាសាស្ត្រ បច្ចេកវិទ្យា ព័ត៌មាន ការផ្លាស់ប្ដូររវាងប្រជាជនជាមួយប្រជាជន និងកិច្ចសហប្រតិបត្តិការឆ្លើយតបទៅនឹងការប្រែប្រួលអាកាសធាតុ។

ទាក់ទិននឹងបញ្ហាសមុទ្រខាងកើត ភាគីទាំងពីរបានអះអាងសារជាថ្មីម្តងទៀត អំពីសារៈសំខាន់នៃការធានាសន្តិភាព ស្ថិរភាព សន្តិសុខ សុវត្ថិភាព និងសេរីភាពនាវាចរណ៍ អាកាសចរណ៍នៅសមុទ្រខាងកើត មិនប្រើប្រាស់ឬគម្រៀមកំហែងប្រើប្រាស់កម្លាំងហឹង្សា ដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ជាពិសេសគឺអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS); គាំទ្រដល់ការអនុម័តលើក្រមប្រតិបត្តិរបស់ភាគីនានានៅសមុទ្រខាងកើត (COC) ឲ្យបានឆាប់ៗប្រកបដោយប្រសិទ្ធភាពជាក់ស្ដែង និងស្របតាមច្បាប់អន្តរជាតិ។

បន្ទាប់ពីជំនួបពិភាក្សា នាយករដ្ឋមន្ត្រីវៀតណាមលោក Pham Minh Chinh និងនាយករដ្ឋមន្ត្រីលុចសំបួលោក Xavier Bettel បានធ្វើជាសាក្សីក្នុងពិធីចុះហត្ថលេខាលើឯកសារសហប្រតិបត្តិការលើវិស័យហិរញ្ញវត្ថុ ជាពិសេសគឺកិច្ចព្រមព្រៀងភាពជាដៃគូយុទ្ធសាស្ត្រស្តីពីហិរញ្ញវត្ថុបៃតងរវាងក្រសួងហិរញ្ញវត្ថុនៃប្រទេសទាំងពីរផងដែរ៕