តំណាងមន្ទីរទេសចរណ៍ខេត្ត Ninh Binh នាថ្ងៃទី ៧ មេសា បានឲ្យដឹងថា ខេត្ត Ninh Binh ទើបតែត្រូវបានទស្សនាវដ្ដី Forbes របស់អាមេរិក ជ្រើសតាំងជាគោលដៅទេសចរណ៍មួយក្នុងចំណោមគោលដៅទេសចរណ៍ដ៏អស្ចារ្យបំផុតទាំង ២៣ ក្នុងឆ្នាំ ២០២៣។

ទស្សនាវដ្ដី Forbes បានធ្វើការអត្ថាធិប្បាយថា រូបភាព Ninh Binh កាន់តែមានប្រជាប្រិយភាពនៅលើបណ្ដាញសង្គម ហើយណែនាំដល់ភ្ញៀវទេសចរអញ្ជើញទៅទស្សនាខេត្ត Ninh Binh ព្រោះគោលដៅនេះផ្តល់ឱ្យអ្នកទស្សនានូវបទពិសោធន៍ជាក់ស្ដែងនៅវៀតណាម។ ទស្សនាវដ្ដី Forbes ក៏បានណែនាំអំពីការបទពិសោធន៍គយគន់ទេសភាពផង និងទទួលទានម្ហួបអាហារឆ្ងាញ់ៗនៅពេលទៅទស្សនាខេត្ត Ninh Binh។

មុននេះ កាលពីខែកុម្ភៈ ខេត្ត Ninh Binh មានកិត្តិយសដែលបានជាប់ឈ្មោះក្នុងចំណោមគោលដៅដ៏ស្និទ្ធស្នាលបំផុតនៅលើពិភពលោក ដែលត្រូវបាន Traveler Review Awards បោះឆ្នោតជ្រើសតាំង។ នេះគឺជាពានរង្វាន់ប្រចាំឆ្នាំ ដែលត្រូវបាន Booking រៀបចំឡើង សំដៅលើកតម្កើងគោលដៅ និងកន្លែងស្នាក់នៅនៅលើពិភពលោក។ លោក Nguyen Van Minh នាយកមជ្ឈមណ្ឌលផ្សព្វផ្សាយទេសចរណ៍ខេត្ត Ninh Binh បានឲ្យដឹងថា នាពេលកន្លងមក ផ្នែកទេសចរណ៍តែងតែខិតខំប្រឹងប្រែងអនុវត្តន៍វិធានការជាច្រើន សំដៅបង្កើតគោលដៅដ៏ស្និទ្ធស្នាល និងអស្ចារ្យជូនភ្ញៀវទេសចរទាំងជាតិ និងអន្តរជាតិផងដែរ៕