នារសៀលថ្ងៃទី ២៦ ខែសីហានៅទីក្រុងហាណូយ អនុប្រធានាធិបតីសហរដ្ឋអាមេរិកលោកស្រី Kamala Harris បានដឹកនាំសន្និសីទកាសែតប្រកាសលទ្ធផលនៃដំណើរទស្សនកិច្ចរបស់លោកស្រីនៅប្រទេសវៀតណាម ចាប់ពីថ្ងៃទី ២៤ ដល់ថ្ងៃទី ២៦ ខែសីហាឆ្នាំ ២០២១ ។ នេះគឺជាសកម្មភាពចុងក្រោយនៃដំណើរទស្សនកិច្ចរបស់លោកស្រីនៅប្រទេសវៀតណាម។
 

អនុប្រធានាធិបតីលោកស្រី Kamala Harris

បើកសន្និសីទកាសែត អនុប្រធានាធិបតីលោកស្រី Kamala Harris បានសង្កត់ធ្ងន់ថា ទំនាក់ទំនងរវាងវៀតណាមនិងសហរដ្ឋអាមេរិកគឺជាទំនាក់ទំនងយូរអង្វែងនិងមានអត្ថន័យចំពោះប្រជាជន ចំពោះសន្តិសុខនិងវិបុលភាពនៃប្រទេសទាំងពីរ។ ដោយចាត់ទុកថាដំណើរទស្សនកិច្ចរបស់លោកស្រីនៅវៀតណាមគឺជាទំព័របន្ទាប់ក្នុងទំនាក់ទំនងរវាងប្រទេសទាំងពីរនោះ លោកស្រីអនុប្រធានាធិបតីបានអះអាងថាសមិទ្ធផលក្នុងទំនាក់ទំនងរវាងប្រទេសទាំងពីរចាប់តាំងពីពេលធ្វើប្រក្រតីភាពទំនាក់ទំនងឡើងវិញគឺគួរឲ្យកោតសរសើរណាស់។ ឆ្ពោះទៅមុខជាមួយគ្នា វៀតណាមនិងអាមេរិកនឹងបន្តស្វែងរកឱកាសសម្រាប់ភាគីទាំងពីរ។ នៅក្នុងសន្និសីទកាសែត អនុប្រធានាធិបតីអាមេរិកបានអះអាងថា ជំងឺរាតត្បាតកូវីដ ១៩ គឺជាកង្វល់ចម្បងរបស់ប្រទេសទាំងពីរ។ រំលឹកពីជំនួយដ៏មានអត្ថន័យរបស់វៀតណាមចំពោះប្រជាជនអាមេរិកក្នុងការប្រយុទ្ធប្រឆាំងនឹងជំងឺរាតត្បាតកូវីដ -១៩ នៅដើមឆ្នាំ ២០២០ លោកស្រី Kamala Harris បានឲ្យដឹងថាឥឡូវនេះសហរដ្ឋអាមេរិកបាននាំយកវ៉ាក់សាំងជូនប្រជាជនវៀតណាម ហើយបានបើកការិយាល័យ CDC អាស៊ីអាគ្នេយ៍ នៅទីក្រុងហាណូយ ដើម្បីចូលរួមជាមួយវៀតណាម ក្នុងការប្រយុទ្ធប្រឆាំងនឹងជំងឺរាតត្បាត។

លើវិស័យកិច្ចសហប្រតិបត្តិការអភិវឌ្ឍសេដ្ឋកិច្ចនោះ លោកស្រីអនុប្រធានាធិបតី Kamala Harris បានលើកឡើងពីនិន្នាការនៃកិច្ចសហប្រតិបត្តិការរវាងប្រទេសទាំងពីរលើបញ្ហាដូចជា៖ ការធ្វើឌីជីថលសេដ្ឋកិច្ច ការគាំទ្រតំបន់ជនជាតិភាគតិច ស្ត្រី បច្ចេកវិទ្យាផ្កាយរណបក្នុងវិស័យកសិកម្ម។ ដោយសង្កត់ធ្ងន់លើសារៈសំខាន់នៃការឆ្លើយតបទៅនឹងការប្រែប្រួលអាកាសធាតុនោះ លោកស្រីអនុប្រធានាធិបតី Kamala Harris បានឲ្យដឹងថានេះគឺជាបញ្ហាបន្ទាន់មួយ។ សហរដ្ឋអាមេរិកនឹងបន្តធ្វើការជាមួយវៀតណាម ដើម្បីលើកកម្ពស់សេរីភាពនាវាចរណ៍ ធានាសណ្តាប់ធ្នាប់និងគោរពច្បាប់នៅដែនសមុទ្រ។ សេចក្តីប្រកាសមួយទៀតដែលបានលោកស្រីអនុប្រធានាធិបតី Kamala Harris លើកឡើងនៅក្នុងសន្និសីទកាសែតគឺការសាងសង់ទីស្នាក់ការថ្មីនៃស្ថានទូតអាមេរិកប្រចាំនៅទីក្រុងហាណូយ។ លោកស្រីបានបញ្ជាក់ថានេះគឺជាការបង្ហាញយ៉ាងច្បាស់លាស់អំពីការប្តេជ្ញាចិត្តរបស់ប្រទេសទាំងពីរក្នុងទំនាក់ទំនងកិច្ចសហប្រតិបត្តិការផងដែរ៕

តាម VOV5 - វិទ្យុសម្លេងវៀតណាម