ព័ត៌មាន
អគ្គលេខាបក្ស ប្រធានរដ្ឋវៀតណាមលោក តូ ឡឹម ចាប់ផ្តើមដំណើរទស្សនកិច្ចផ្លូវរដ្ឋនៅព្រះរាជាណាចក្រដាណឺម៉ាក
នៅព្រឹកថ្ងៃទី១៩ ខែតុលា (ម៉ោងក្នុងតំបន់) អគ្គលេខាបក្ស ប្រធានរដ្ឋវៀតណាមលោក តូ ឡឹម រួមជាមួយភរិយារបស់លោក គឺលោកស្រី ងោ ភឿងលី និងគណៈប្រតិភូជាន់ខ្ពស់វៀតណាម បានទៅដល់អាកាសយានដ្ឋានអន្តរជាតិ Copenhagen ប្រទេសដាណឺម៉ាក ដើម្បីចាប់ផ្តើមដំណើរទស្សនកិច្ចផ្លូវរដ្ឋនៅព្រះរាជាណាចក្រដាណឺម៉ាក ចាប់ពីថ្ងៃទី១៩ ដល់ថ្ងៃទី២១ ខែតុលា តាមការអញ្ជើញរបស់ព្រះមហាក្សត្រ Frederik X និងព្រះមហាក្សត្រីយានីនៃប្រទេសដាណឺម៉ាក។
ពិធីទទួលបដិសណ្ឋារកិច្ចជាផ្លូវការជូនចំពោះអគ្គលេខាបក្ស ប្រធានរដ្ឋវៀតណាម និងភរិយា ត្រូវបានធ្វើឡើងយ៉ាងឧឡារិកនៅអាកាសយានដ្ឋានអន្តរជាតិ Copenhagen។ ព្រះមហាក្សត្រ Frederik X និងព្រះមហាក្សត្រីយានី Mary បានយាងធ្វើជាអធិបតីក្នុងពិធីនេះ។ បន្ទាប់ពីពិធី អគ្គលេខាបក្ស ប្រធានរដ្ឋ លោក តូ ឡឹម និងភរិយា រួមជាមួយព្រះមហាក្សត្រ និងព្រះមហាក្សត្រីយានីដាណឺម៉ាក បានអញ្ជើញដាក់កម្រងផ្កានៅវិមានរំលឹកវិញ្ញាណក្ខន្ធនៅទីក្រុង Copenhagen។
ដាណឺម៉ាកគឺជាប្រទេសមួយក្នុងចំណោមប្រទេសលោកខាងលិចដំបូងគេដែលបានបង្កើតទំនាក់ទំនងការទូតជាមួយវៀតណាមក្នុងឆ្នាំ ១៩៧១។ ក្នុងរយៈពេលកន្លះសតវត្សរ៍កន្លងមកនេះ ទំនាក់ទំនងរវាងប្រទេសទាំងពីរត្រូវបានពង្រឹង ពង្រីក និងលើកកម្ពស់ជាបន្តបន្ទាប់ដល់កម្រិតថ្មី។ ដំណើរទស្សនកិច្ចលើកនេះបានរួមចំណែកដល់ការពង្រឹង និងលើកកំពស់បន្ថែមទៀតនូវទំនុកចិត្តនយោបាយ កំណត់ទិសដៅ និងអាទិភាពសម្រាប់កិច្ចសហប្រតិបត្តិការរយៈពេលវែង ដើម្បីអភិវឌ្ឍន៍ទំនាក់ទំនងទ្វេភាគីឲ្យកាន់តែទូលំទូលាយ និងស៊ីជម្រៅ៕
