តំណាងអាជ្ញាធរឃុំមីឌឹក សហគ្រាសទេសចរណ៍ និងក្រុមសម្របសម្រួលទេសចរណ៍សហគមន៍មឿងកុក បានចុះហត្ថលេខាលើអនុស្សរណៈនៃការយោគយល់គ្នា ស្តីពី​កិច្ច​សហប្រតិបត្តិការអភិវឌ្ឍផលិតផល និងសេវាកម្មទេសចរណ៍។ រូបថត៖ Tuyet Mai/TTXVN

ដោយ​ស្ថិតនៅចម្ងាយប្រហែល ៦០ គីឡូម៉ែត្រពីកណ្តាលទីក្រុងហាណូយ មឿងកុក មានទេសភាពដ៏ពិសេស ជាមួយនឹងបឹង Bai Bo ស្រះផ្កាឈូក វាលស្រែ ភ្នំថ្មកំបោរ និងតម្លៃវប្បធម៌វិសេសវិសាលជាច្រើន ដូចជា សំឡេងគងឃ្មោះ ចម្រៀងប្រជាប្រិយ​ជនជាតិ​មឿង ឱសថបុរាណ និងមុខ​ម្ហូបប្រពៃណី។

លោក ត្រឹន ទ្រុងហៀវ អនុប្រធានមន្ទីរទេសចរណ៍ទីក្រុងហាណូយ បានឱ្យដឹងថា៖ «ភាពសុខដុមរមនារវាងធម្មជាតិ វប្បធម៌ និងមនុស្សបានបង្កើតអត្តសញ្ញាណដ៏​វិសេសវិសាលរបស់ មឿងកុក។ ជាមួយនឹងសារថា "មឿងកុក - ប៉ះដល់​ភាពសុខសាន្ត​" យើងសង្ឃឹមថា ភ្ញៀវទេសចរម្នាក់ៗនៅពេល​មកដល់ទីនេះ អាចទទួលអារម្មណ៍ពីចង្វាក់ជីវិតដ៏​​ធូរស្រាលជាង ផ្ទៀង​ស្តាប់ធម្មជាតិកាន់តែច្រើននិងទទួលអារម្មណ៍កាន់តែស៊ីជម្រៅនូវ​តម្លៃវប្បធម៌ដ៏វិសេសវិសាល តាម​រយដំបូល​ផ្ទះ ម្ហូប​អាហារ សំឡេងគងឃ្មោះ ទំនុក​ច្រៀង និងនៅក្នុងភាពស្មោះត្រង់របស់ប្រជាជននៃភូមិជនជាតិ​មឿង ឃុំមីឌឹក»​។​

ចំណុចលេចធ្លោនៃផលិតផលទេសចរណ៍សហគមន៍ មឿងកុក គឺកម្មវិធី "មួយថ្ងៃជាជនជាតិមឿង" ដែលមានសកម្មភាពជាច្រើនដូចជា៖ ស្លៀកពាក់សំលៀកបំពាក់ប្រពៃណី ឆ្លងបទពិសោធន៍​ធ្វើស្រែចម្ការ ការរៀបចំម្ហូបក្នុងស្រុក រៀនរបៀប​លេងគងឃ្មោះ ច្រៀងចម្រៀងប្រជាប្រិយ​ជនជាតិ​មឿង និងស្វែងយល់ពីផ្លូវជិះកង់ និងដើរលេងកម្សាន្ត Trekking នៅកណ្តាលបរិយាកាស​ជនបទដ៏សុខសាន្ត។ លោក ង្វៀន ក្វាងឌឿង ប្រធានគណៈកម្មាធិការប្រជាជនឃុំមីឌឹក បានសង្កត់ធ្ងន់ថា៖ «​ផលិតផលទេសចរណ៍ សហគមន៍មឿងកុក នឹងបើកចេញ​ទិសដៅថ្មីមួយក្នុងការរៀបចំ​រចនាសម្ព័ន្ធសេដ្ឋកិច្ចនៅក្នុងតំបន់ឡើងវិញ បង្កើតមុខ​របរ​ចិញ្ជឹម​ជីវិត បង្កើនប្រាក់ចំណូល និងលើកកម្ពស់ជីវភាពរស់នៅរបស់ប្រជាជនក្នុងតំបន់។ នេះក៏ជាព្រឹត្តិការណ៍សំខាន់មួយ ដែលរួមចំណែកធ្វើឱ្យផែនទីទេសចរណ៍នៃរដ្ឋធធានីកាន់​តែ​សម្បូរបែប ជាមួយនឹងគំរូបទ​ពិសោធន៍ថ្មីៗ ពិតប្រាកដ និងខុសប្លែក»​៕