07/11/2021 13:12 GMT+7 Email Print Like 0

នាយករដ្ឋមន្ត្រីវៀតណាម លោក Pham Minh Chinh បញ្ចប់ដំណើរទស្សនកិច្ចនៅសាធារណរដ្ឋបារាំងប្រកបដោយជោគជ័យ

នាយប់ថ្ងៃទី៥ ខែវិច្ឆិកា ឆ្នាំ២០២១ (ម៉ោងក្នុងតំបន់) នាយករដ្ឋមន្ត្រីវៀតណាម លោក Pham Minh Chinh បានចាកចេញពីទីក្រុងប៉ារីស បញ្ចប់ប្រកបដោយជោគជ័យ ដំណើរទស្សនកិច្ចជាផ្លូវការនៅសាធារណរដ្ឋបារាំង (ចាប់ពីថ្ងៃទី ៣ ដល់ថ្ងៃទី ៥ ខែវិច្ឆិកា) តបតាមសេចក្ដីអញ្ជើញរបស់នាយករដ្ឋមន្ត្រីនៃសាធារណៈរដ្ឋបារាំង លោក Jean Castex។
 

នាយករដ្ឋមន្ត្រីវៀតណាម លោក Pham Minh Chinh (រូបថត៖ VNA)


មុននោះ នារសៀលថ្ងៃទី ៥ ខែវិច្ឆិកា នាយករដ្ឋមន្ត្រីវៀតណាម លោក Pham Minh Chinh បានទទួលជួបជាមួយលោក Mathias Cormann អគ្គលេខាធិការអង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD)។ នៅក្នុងជំនួបនេះ លោកនាយករដ្ឋមន្ត្រីវៀតណាមបានស្នើឱ្យ OECD បន្តជួយឧបត្ថម្ភវៀតណាមក្នុងដំណើរការស្តារ និងអភិវឌ្ឍន៍សេដ្ឋកិច្ចសង្គមឡើងវិញ ផ្ដល់ព្រឹក្សាអំពីគោលនយោបាយ និងកៀរគរប្រភពធនធាន សំដៅបង្កើនការវិនិយោគលើមនុស្ស និងអភិវឌ្ឍន៍ប្រភពធនធានមនុស្សប្រកបដោយគុណភាពខ្ពស់។ លោកនាយករដ្ឋមន្ត្រីវៀតណាមមានក្ដីសង្ឃឹមថា OECD នឹងបន្តជួយ កៀរគរប្រភពធនធាន ជាពិសេសគឺប្រភពទុន បច្ចេកវិជ្ជា និងបទពិសោធន៍នៃអភិបាលកិច្ចប្រកបដោយប្រសិទ្ធភាព ដើម្បីជួយវៀតណាមរៀបចំរចនាសម្ព័ន្ធឡើងវិញ និងផ្ទេរប្ដូរគំរូកំណើន អនុវត្តន៍ការសន្យាកាត់បន្ថយការបញ្ចេញឧស្ម័នដែលបានកំណត់នៅក្នុងកិច្ចប្រជុំ COP26 នាពេលកន្លងទៅ។

ជាការឆ្លើយតប អគ្គលេខាធិការ OECD លោក Mathias Cormann បានសង្កត់ធ្ងន់ថា វៀតណាមជាដៃគូដ៏សំខាន់របស់ OECD នៅតំបន់អាស៊ីអាគ្នេយ៍។ លោកមានគោលបំណងចង់សហប្រតិបត្តិការយ៉ាងជិតស្និទ្ធិថែមទៀតជាមួយវៀតណាម និងបណ្ដាប្រទេសអាស៊ីអាគ្នេយ៍នាពេលខាងមុខ។ លោកអគ្គលេខាធិការបានអះអាងថា អនុស្សរណៈនៃការយោគយល់គ្នាស្តីពីការពង្រឹងកិច្ចសហប្រតិបត្តិការ (MOU) រវាងវៀតណាម និង OECD ដំណាក់កាល ២០២២-២០២៦ មានសារសំខាន់ណាស់ ដោយបានបង្កើតក្របខ័ណ្ឌជំរុញកិច្ចសហប្រតិបត្តិការរវាងភាគីទាំងពីរលើគ្រប់វិស័យ។ បន្ទាប់ពីជំនួបនេះ លោកនាយករដ្ឋមន្ត្រីវៀតណាមបានធ្វើជាសាក្សីក្នុងពិធីចុះហត្ថលេខាលើអនុស្សរណៈនៃការយោគយល់គ្នា (MOU) វៀតណាម- OECD ដំណាក់កាល ២០២២-២០២៦។

នាថ្ងៃដដែល នៅក្នុងជំនួបជាមួយលោកស្រី Audrey Azoulay អគ្គនាយិកាអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO) នៅទីក្រុងប៉ារីស ប្រទេសបារាំងនោះ នាយករដ្ឋមន្ត្រីវៀតណាម លោក Pham Minh Chinh បានសង្កត់ធ្ងន់ថា វៀតណាមបានយកចិត្តទុកដាក់លើការអនុវត្តគោលនយោបាយ យកប្រជាជនជាមជ្ឈភាព អភិវឌ្ឍន៍ប្រកបដោយចីរភាពដោយផ្អែកលើតម្លៃវប្បធម៌ ប្រវត្តិសាស្រ្ត កិច្ចការពារបរិស្ថាន ស្របតាមគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ។ លោកនាយករដ្ឋមន្ត្រីមានគោលបំណងចង់នាំទំនាក់ទំនងភាពជាដៃគូវៀតណាម - UNESCO ឡើងកម្រិតថ្មីមួយប្រកបដោយប្រសិទ្ធភាពជាក់ស្ដែងថែមទៀត។  ក្នុងឱកាសនេះ នាយករដ្ឋមន្ត្រី វៀតណាម លោក Pham Minh Chinh បាន ធ្វើជាសាក្សីក្នុងពិធីចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការរវាងវៀតណាម និង UNESCO ដំណាក់កាល ២០២១-២០២៥ និង កិច្ចព្រមព្រៀងសហប្រតិបត្តិការរវាង UNESCO និង សម្ព័ន្ធក្រុមហ៊ុន SOVICO ក្នុងការជំរុញបណ្តាញទីក្រុងច្នៃប្រឌិត និង អភិវឌ្ឍន៍ទេសចរណ៍ប្រកបដោយចីរភាពនៅវៀតណាមផងដែរ៕

តាម VOV5 - វិទ្យុសំឡេងវៀតណាម

បណ្តាព័ត៌មានបានផ្សាយ