ຕາມບັນດາບົດລາຍງານທີ່ຫາກໍ່ປະກາດໃນອາທິດສຸດທ້າຍຂອງເດືອນ ພະຈິກ ແລ້ວ, ພື້ນຖານເສດຖະກິດໂລກພວມມີສັນຍານຟື້ນຟູທີ່ເປັນໜ້າປະເອີບໃຈ ໂດຍໄດ້ສະແດງອອກຜ່ານບາງຕົວເລກດັດຊະນີ, ຢືນອັນດັບໜຶ່ງ ແມ່ນການເຄື່ອນໄຫວການຄ້າ.
ການເຄື່ອນໄຫວການຄ້າທົ່ວໂລກຟື້ນຟູຢ່າງວ່ອງໄວ
ການເຄື່ອນໄຫວການຄ້າທົ່ວໂລກພວມມີການຟື້ນຟູເປັນຢ່າງດີ ດ້ວຍລະດັບຄວາມໄວກວ່າຫຼາຍເທົ່າ ເມື່ອທຽບໃສ່ວິກິດການດ້ານການເງິນໃນຊຸມປີ 2008 – 2009. ຕາມຫ້ອງການໄຈ້ແຍກນະໂຍບາຍເສດຖະກິດ CPB ຂອງ ໂຮນລັງ ແລ້ວ, ການຈໍລະຈອນສິນຄ້າຂ້າມຊາຍແດນໃນໄຕມາດທີ່ III ຜ່ານມາ ໄດ້ເພີ່ມຂຶ້ນເຖິງ 12,5% ເມື່ອທຽບໃສ່ໄຕມາດທີ II ເຊິ່ງເປັນລະດັບເພີ່ມຂຶ້ນໄວທີ່ສຸດໃນຮອບເວລາ 20 ປີຜ່ານມາ.
ການຈໍລະຈອນການຄ້າທົ່ວໂລກ ເລີ່ມໄດ້ຮັບການຟື້ນຟູຢ່າງແຮງໃນໄລຍະກາງປີນີ້ ເມື່ອໄດ້ເປີດກໍລິການການຂົນສົ່ງທາງທະເລ ແລະ ທາງການບິນຄືນໃໝ່, ໃນຂະນະທີ່ຄວາມຕ້ອງການຂອງສິນຄ້າປະເພດເຄື່ອງໃຊ້ສອຍກໍເພີ່ມຂຶ້ນຢ່າງໄວວາ. ການເຄື່ອນໄຫວການຄ້າ ສືບຕໍ່ໄດ້ຮັບການປົວແປງດີຂຶ້ນ ນັບແຕ່ທ້າຍໄຕມາດທີ III ເປັນຕົ້ນມາ. ບັນດາການສຳຫຼວດ ຜູ້ອຳນວຍການຊື້ສິນຄ້າຢູ່ໂຮງຈັກໂຮງງານຫຼາຍແຫ່ງໃນທົ່ວໂລກ ໄດ້ສະແດງໃຫ້ເຫັນວ່າ ຈຳນວນໃບບິນສັ່ງສິນຄ້າສົ່ງອອກສືບຕໍ່ເພີ່ມຂຶ້ນໃນເດືອນສຸດທ້າຍຂອງໄຕມາດນີ້. ໃນຂະນະນັ້ນ, ການວັດແທກປະລິມານລົດຕູ້ container ຂອງ ສະຖາບັນຄົ້ນຄວ້າເສດຖະກິດ Leibniz ຂອງ ເຢຍລະມັນ ແລະ ສະຖາບັນເສດຖະກິດຂົນສົ່ງ ແລະ Logistics ກໍເພີ່ມຂຶ້ນບັນລຸລະດັບສະຖິຕິໃນເດືອນຕຸລາຜ່ານມາ.
ໃນບົດລາຍງານຫວ່າງມໍ່ໆມານີ້, ອົງການການຄ້າໂລກ (WTO) ກໍໃຫ້ຂໍ້ສັງເກດວ່າ ການຈໍລະຈອນສິນຄ້າໄດ້ກັບຄືນສູ່ລະດັບປານກາງ, ໃນໄລຍະຍາວ ເປັນການສະແດງໃຫ້ເຫັນວ່າການຟື້ນຟູ ມີຄວາມເປັນໄປໄດ້.
ຕາມບັນດານັກຊ່ຽວຊານແລ້ວ, ການຟື້ນຟູການເຄື່ອນໄຫວການຄ້າທົ່ວໂລກ ໄດ້ມີການປະກອບສ່ວນສຳຄັນຂອງ ຈີນ, ເຊິ່ງເປັນພື້ນຖານເສດຖະກິດໃຫຍ່ອັນດັບທີ 2 ໃນໂລກ ແລະ ໄດ້ຮັບຖືວ່າແມ່ນໂຮງງານຜະລິດຂອງໂລກ. ຍ້ອນໂລກລະບາດໄດ້ຮັບການຄຸມຄຸມໂດຍໄວ, ຈີນ ຈຶ່ງຟື້ນຟູການເຄື່ອນໄຫວຜະລິດ ແລະ ຊຸກຍູ້ການສົ່ງອອກໄດ້ຢ່າງວ່ອງໄວ. ຕາມບັນດາຕົວເລກທີ່ໄດ້ອັບເດດ, ເສດຖະກິດ ຈີນ ບັນລຸໄດ້ລະດັບການເຕີບໂຕ GDP 0,7% ໃນໄລຍະແຕ່ເດືອນມັງກອນ ຫາເດືອນກັນຍາ ເມື່ອທຽບໃສ່ໄລຍະດຽວກັນຂອງປີກາຍ, ໃນຂະນະ GDP ຂອງ ໄຕມາດທີ 3 ໄດ້ເພີ່ມຂຶ້ນ 4,9%, ເຊິ່ງແມ່ນໜຶ່ງໃນຈຳນວນໜ້ອຍພື້ນຖານເສດຖະກິດທີ່ບັນລຸລະດັບເຕີບໂຕເປັນບວກ.
ທ່ານນາງຜູ້ອຳນວຍການໃຫຍ່ກອງທຶນເງິນຕາສາກົນ (IMF) Kristalina Georgieva (ພາບ: AFP/TTXVN)
ຍັງມີຄວາມສ່ຽງຫຼາຍຢ່າງ
ວັນທີ 19 ພະຈິກ, ທ່ານນາງຜູ້ອຳນວຍການໃຫຍ່ກອງທຶນເງິນຕາສາກົນ (IMF) Kristalina Georgieva ໃຫ້ຂໍ້ສັງເກດວ່າ ເສດຖະກິດທົ່ວໂລກພວມຄ່ອຍໆໄດ້ຮັບການຟື້ນຟູຈາກວິກິດການຈາກໂລກລະບາດໂຄວິດ - 19, ແຕ່ກໍມີສັນຍານສະແດງໃຫ້ເຫັນວ່າ ທ່າຟື້ນຟູຖືກຊັກຊ້າລົງ ຍ້ອນຈຳນວນຜູ້ຕິດເຊື້ອພວມເພີ່ມຂຶ້ນຢູ່ບາງປະເທດ. ຕາມທ່ານນາງ Georgieva ແລ້ວ, ເລື່ອງໂລກລະບາດໄດ້ລະເບີດຂຶ້ນຢ່າງແຮງໃນຮອບໃໝ່ນັ້ນ ເປັນການຕັກເຕືອນທີ່ມີຄວາມສຳຄັນວ່າ ການຟື້ນຟູເສດຖະກິດແບບຍືນຍົງ ຈະບໍ່ອາດບັນລຸໄດ້ ຈົນຮອດຈຸດເວລາທີ່ບັນດາປະເທດມີວິທີການປ້ອງກັນ ແລະ ການແຜ່ລະບາດໄດ້ຫຼຸດລົງຢູ່ທົ່ວທຸກບ່ອນ. ໃນຕົວຈິງ, ໂລກລະບາດພວມມີການຜັນແປຢ່າງສັບສົນທີ່ສຸດໃນຂອບເຂດທົ່ວໂລກ ດ້ວຍຈຳນວນຜູ້ຕິດເຊື້ອ ແລະ ຜູ້ເສຍຊີວິດ ລ້ວນແຕ່ເພີ່ມຂຶ້ນບັນລຸລະດັບສູງສະຖິຕິ.ມີຕົວຢ່າງໜຶ່ງໄດ້ສະແດງໃຫ້ເຫັນຢ່າງຈະແຈ້ງພໍສົມຄວນ ນັ້ນແມ່ນ ໃນທ່າຟື້ນຟູຂອງການເຄື່ອນໄຫວການຄ້າທົ່ວໂລກ ກໍມີຄວາມແຕກຕ່າງກັນຫຼາຍທີ່ສຸດ ລະຫວ່າງບັນດາພາກພື້ນພູມປະເທດ. ຕາມນັ້ນແລ້ວ, ກຳລັງແຮງຟື້ນຟູການຄ້າຂອງ ຈີນ ແລະ ບັນດາປະເທດພວມພັດທະນາຢູ່ ອາຊີ ແມ່ນດີທີ່ສຸດ, ໃນຂະນະທີ່ ອາເມລິກາ ແລະ ເອີຣົບ ພັດຫຼຸດໜ້ອຍຖອຍລົງ. ໄປຄຽງຄູ່ກັນນັ້ນ, ຕາມອົງການ WTO ແລ້ວ, ລະດັບເຕີບໂຕການຄ້າທົ່ວໂລກ ອາດຈະຊ້າລົງເມື່ອໝົດ ປີ 2020, ຍ້ອນວ່າ ຄວາມຕ້ອງການສຳລັບສິນຄ້າສະສົມໄວ້ໃນໄລຍະປິດເມືອງໃນລະດູບານໃໝ່ ແມ່ນໄດ້ຮັບການຕອບສະໜອງເປັນສ່ວນຫຼາຍແລ້ວ ພ້ອມກັບເລື່ອງເບິ່ງຄືວ່າ ວິສາຫະກິດເກືອບທຸກແຫ່ງ ຕ່າງກໍສະສົມສິນຄ້າໄວ້ແລ້ວ.
ບາງດັດຊະນີທີ່ເປັນໜ້າວິຕົກກັງວົນຕື່ມອີກ ນັ້ນແມ່ນ ຢູ່ພື້ນຖານເສດຖະກິດໃຫຍ່ທີ່ສຸດໃນໂລກ ຄື ອາເມລິກາ, ໝາກຜົນການສຳຫຼວດຂອງອົງການຄົ້ນຄວ້າ Conference Board ໄດ້ຊີ້ໃຫ້ເຫັນວ່າ ຄວາມໄວ້ໃຈໃນການບໍລິໂພກຢູ່ ອາເມລິກາ ໃນເດືອນ ພະຈິກ 2020 ໄດ້ຫຼຸດລົງກວ່າການຄາດຄະເນ ແລະ ຄວາມຈິງດັ່ງກ່າວເປັນການປັບປຸງໃຫ້ແກ່ການຄາດຄະເນການເຕີບໂຕເສດຖະກິດ ອາເມລິກາ ທີ່ຫຼຸດລົງຢ່າງແຮງໃນໄຕມາດທີ 4 ປີ 2020. ໃນໄຕມາດທີ 4 ນີ້, ເສດຖະກິດ ອາເມລິກາ ໄດ້ຮັບການຄາດຄະເນວ່າຈະມີການເຕີບໂຕຕ່ຳກວ່າ 5%. ກ່ອນໜ້ານັ້ນ, ເສດຖະກິດ ອາເມລິກາ ໄດ້ຫຼຸດລົງເຖິງ 31,4% ໃນໄຕມາດທີ 2, ເຊິ່ງເປັນຕົວເລກທີ່ຫຼຸດລົງຫຼາຍທີ່ສຸດນັບແຕ່ປີ 1947 ມານີ້, ແລ້ວໄດ້ເພີ່ມຂຶ້ນຄືນໃໝ່ຢູ່ໃນລະດັບ 33,1% ໃນໄຕມາດທີ 3. ສິ່ງທີ່ເປັນໜ້າເວົ້າເຖິງນັ້ນແມ່ນ ເສດຖະກິດ ອາເມລິກາ ພວມຫຼຸດລະດັບຄວາມໄວລົງໃນສະພາບທີ່ບ້ວງເງິນໜູນຊ່ວຍເມື່ອຕົ້ນປີ ທີ່ມີມູນຄ່າກວ່າ 3.000 ຕື້ USD ຂອງ ລັດຖະບານ ໄດ້ໝົດຜົນສັກສິດ, ໃນຂະນະທີ່ ບ້ວງເງິນໜູນຊ່ວຍໃໝ່ ຈະໄດ້ຮັບການປະຕິບັດພາຍຫຼັງທີ່ທ່ານປະທານາທິບໍດີຄົນໃໝ່ ເຂົ້າດຳລົງຕຳແໜ່ງໃນວັນທີ 20 ມັງກອນ 2021. ຍິ່ງໄປກວ່ານັ້ນ, ພື້ນຖານເສດຖະກິດໃຫຍ່ທີ່ສຸດນີ້ ກໍພວມແມ່ນປະເທດທີ່ໄດ້ຮັບຜົນສະທ້ອນຢ່າງໜັກໜ່ວງທີ່ສຸດຈາກໂລກລະບາດ ເມື່ອມີຈຳນວນຜູ້ຕິດເຊື້ອ ແລະ ຈຳນວນຜູ້ເສຍຊີວິດຫຼາຍກວ່າໝູ່ໃນໂລກອີກດ້ວຍ./.
(ແຫຼ່ງຄັດຈາກ VOV)