ທ່ານ ກາວກັວກຮືງ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຫວຽດນາມກ່າວຄຳເຫັນທີ່ກອງປະຊຸມ

(ພາບ: Minh Hung, Chanh Da/TTXVN) 

ນີ້ແມ່ນຄັ້ງທຳອິດ ທີ່ກອງປະຊຸມໃຫຍ່ການຄ້າອິນເດຍ ແລະ ບັນດາປະເທດ CLMV ຖືກຈັດຕັ້ງຢູ່ຕ່າງປະເທດ, ກອງປະຊຸມໃຫຍ່ປີນີ້ ມີຫົວຂໍ້ວ່າ “ພັດທະນາເສດຖະກິດອິນເດຍ - CLMV: ຮ່ວມມືເພື່ອເຊື່ອມໂຍງເຂົ້າກັບພາກພື້ນ” ໂດຍມີການເຂົ້າຮ່ວມຂອງທ່ານຮອງນາຍົກລັດຖະມົນຕີກໍາປູເຈຍ Hor Namhong ພ້ອມກັບການນຳຈາກບັນດາກະຊວງ, ຂະແໜງການ, ທ້ອງຖິ່ນຕ່າງໆ ແລະ ຜູ້ຕາງໜ້າວິສາຫະກິດໃຫຍ່ຫຼາຍແຫ່ງຂອງບັນດາປະເທດສະມາຊິກ. ຄະນະຜູ້ແທນຫວຽດນາມ ໂດຍທ່ານ ກາວກັວກຮືງ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຫວຽດນາມ ນຳໜ້າເຂົ້າຮ່ວມກອງປະຊຸມ.

        ກ່າວຄໍາເຫັນທີ່ກອງປະຊຸມ, ທ່ານ ກາວກັວກຮືງ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຫວຽດນາມ ໄດ້ຕີລາຄາສູງຕໍ່ຄວາມເອົາໃຈໃສ່, ການໃຫ້ບຸລິມະສິດຂອງລັດຖະບານອິນເດຍ ສຳລັບບັນດາປະເທດສະມາຊິກ CLMV ໃນຊຸມປີມໍ່ໆມານີ້.  ພິເສດ ແມ່ນການພົວພັນຮ່ວມມືດ້ານເສດຖະກິດ, ການຄ້າ ລະຫວ່າງອິນເດຍ - CLMV ບັນລຸໄດ້ບັນດາຜົນງານທີ່ດີພໍສົມຄວນ.

        “ທັງອິນເດຍ, ກຳປູເຈຍ, ລາວ, ມຽນມາ ແລະຫວຽດນາມ ລ້ວນແຕ່ອາດຈະຊົມໃຊ້ຕະຫຼາດຂອງແຕ່ລະຝ່າຍ ເພື່ອແຊກຊຶມເຂົ້າໃນບັນດາຕະຫຼາດໃຫຍ່ກວ່າ. ຖ້າຫາກວ່າ ອິນເດຍເລືອກເອົາ ກຳປູເຈຍ, ລາວ, ມຽນມາ ແລະ ຫວຽດນາມ ແມ່ນສະຖານທີ່ລົງທຶນ ແລະ ສົ່ງອອກສິນຄ້າ, ການບໍລິການນັ້ນ ຈະສ້າງກາລະໂອກາດ ໃຫ້ອິນເດຍແຊກຊຶມເຂົ້າບັນດາຕະຫຼາດຢູ່ພາກພື້ນອາຊຽນ ຫຼືບັນດາຕະຫຼາດ FTA ອື່ນ ທີ່ບັນດາປະເທດ CLMV  ແມ່ນສະມາຊິກ”.

        ກອງປະຊຸມໃຫຍ່ການຄ້າອິນເດຍ  - CLMV ຄັ້ງທີ V ຖືກດຳເນີນເປັນເວລາ 02 ວັນ ແຕ່ວັນທີ 21 – 22 ພຶດສະພາ 2018. ນອກຈາກບັນດາວາລະປຶກສາຫາລືທີ່ສຳຄັນແລ້ວ, ຢູ່ນອກ ກອງປະຊຸມ, ຍັງມີບັນດາການປຶກສາຫາລືສອງຝ່າຍ ລະຫວ່າງ ອິນເດຍກັບບັນດາປະເທດສະມາຊິກ CLMV ຕາມລຳດັບອີກດ້ວຍ.

        ໃນຊຸມປີຜ່ານມາ, ວົງເງິນການຄ້າລະຫວ່າງອິນເດຍ ແລະ ບັນດາປະເທດ CLMV ໄດ້ເພີ່ມທະວີຢ່າງໄວວາ. ວົງເງິນການຄ້າ ລະຫວ່າງອິນເດຍ ແລະ ກຸ່ມ CLMV ກໍມີການເຕີບໂຕຢ່າງແຮງ, ບັນລຸເຖິງລະດັບ 14, 5 ຕື້ USD ໃນປີ 2017.

(ແຫຼ່ງຄັດຈາກ VOV)