ນັບແຕ່ເວລາ 6 ໂມງ ຫາເວລາ 12 ໂມງຂອງວັນທີ 15 ພຶດສະພາ, ຫວຽດນາມ ໄດ້ຢັ້ງຢືນມີຜູ້ຕິດເຊື້ອພະຍາດໂຄວິດ - 19 ລາຍໃໝ່ຕື່ມອີກ 18 ຄົນ, ໃນນັ້ນມີຜູ້ເຂົ້າເມືອງ 2 ຄົນທີ່ໄດ້ແຍກຕົວຢູ່ແຂວງ ບ່າເຣຍ - ວຸງເຕົ່າ ແລະ ນະຄອນດ່ານັ້ງ 16 ຄົນຕິດເຊື້ອພາຍໃນປະເທດລ້ວນແຕ່ໄດ້ຮັບການແຍກຕົວແລ້ວ.
ດັ່ງນັ້ນ, ປັດຈຸບັນ, ຫວຽດນາມມີຜູ້ຕິດເຊື້ອພະຍາດໂຄວິດ - 19 ສະສົມທັງໝົດ 3.854 ຄົນ, ໃນນັ້ນມີ ຜູ້ໄດ້ຮັບການປິ່ນປົວຫາຍດີເປັນປົກກະຕິ 2.657 ຄົນ ແລະ 35 ຄົນເສຍຊີວິດ.
ກ່ຽວຂ້ອງເຖິງການສັກວັກຊິນກັນໂຄວິດ -19, ມາຮອດປັດຈຸບັນ, ຫວຽດນາມມີຜູ້ໄດ້ຮັບການສັກວັກຊິນກັນໂຄວິດ - 19 ປະມານ 960.000 ຄົນ.
ສ່ວນຢູ່ໃນໂລກ, ຕາມເວັບໄຊສະຖິຕິ worldomerter.info ແລ້ວ, ໄລ່ຮອດເວລາ 1ໂມງ 30 ນາທີຂອງວັນທີ 15 ພຶດສະພາ (ຕາມເວລາ UTC), ໂລກໄດ້ຢັ້ງຢືນມີຜູ້ຕິດເຊື້ອພະຍາດໂຄວິດ - 19 ກ່ວາ 162,5 ລ້ານຄົນ, ໃນນັ້ນມີຜູ້ເສຍຊີວິດ ກ່ວາ 3,37 ລ້ານຄົນ. ປະເທດຖືກຜົນກະທົບຢ່າງຮ້າຍແຮງທີ່ສຸດຍັງຄົງແມ່ນ ອາເມລິກາ ດ້ວຍຈຳນວນຜູ້ຕິດເຊື້ອ ກ່ວາ 33 ລ້ານຄົນ ໃນນັ້ນມີຜູ້ເສຍຊີວິດ ກ່ວາ 599.000 ຄົນ. ຖັດຈາກນັ້ນ ແມ່ນ ອິນເດຍ ແລະ ບຣາຊິນ.
(ແຫຼ່ງຄັດຈາກ VOV)
