ຂ່າວສານ
ເລຂາທິການໃຫຍ່, ປະທານປະເທດ ໂຕເລີມ ເຂົ້າຮ່ວມພິທີສະເຫຼີມສະຫຼອງ 90 ປີແຫ່ງວັນມູນເຊື້ອກຳມະກອນເຂດບໍ່ແຮ່ - ມູນເຊື້ອຂະແໜງຖ່ານຫີນ
ເສີມຂະຫຍາຍມູນເຊື້ອ "ລະບຽບວິໄນ ແລະ ເປັນຈິດໜຶ່ງໃຈດຽວ", ພ້ອມກັນເພື່ອຊອກຫາວິທີເຮັດທີ່ດີກວ່າ, ແກ້ໄຂບັນດາຄວາມຫຍຸ້ງຍາກໃນການຜະລິດ ແລະ ຊີວິດການເປັນຢູ່ຂອງຜູ້ອອກແຮງງານຢ່າງທັນການ. ນັ້ນແມ່ນຄຳຮ້ອງຂອງ ທ່ານ ໂຕເລີມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ທີ່ພິທີສະເຫຼີມສະຫຼອງ 90 ປີແຫ່ງວັນມູນເຊື້ອກຳມະກອນເຂດບໍ່ແຮ່ - ມູນເຊື້ອຂະແໜງຖ່ານຫີນ (12 ພະຈິກ 1936 - 12 ພະຈິກ 2026) ແລະ ພິທີຮັບຫຼຽນໄຊແຮງງານຊັ້ນສາມ ຂອງກຸ່ມບໍລິສັດອຸດສາຫະກຳຖ່ານຫີນ ແລະ ແຮ່ທາດ ຫວຽດນາມ ເຊິ່ງໄດ້ຈັດຂຶ້ນໃນຕອນຄ່ຳວັນທີ 07 ພະຈິກ, ຢູ່ນະຄອນ ກວາງນິງ.
ກ່າວຄຳເຫັນພິທີ, ທ່ານເລຂາທິການໃຫຍ່, ປະທານປະເທດ ໂຕເລີມ ຖືວ່າ ທົ່ວຂະແໜງຕ້ອງຍົກສູງກຳລັງຄວາມສາມາດໃນການຄາດຄະເນ, ຈັດຕັ້ງການຜະລິດ ແລະ ສະໜອງຖ່ານຫີນໃຫ້ເປັນປົກກະຕິ, ໂດຍສະເພາະແມ່ນໃຫ້ແກ່ການຜະລິດໄຟຟ້າ; ສົມທົບກັບການຂຸດຄົ້ນຢູ່ພາຍໃນປະເທດກັບການນຳເຂົ້າ ແລະ ສຳຮອງໄວ້ຢ່າງສົມເຫດສົມຜົນ. ເປັນເຈົ້າການສ້າງແຜນການຮັບມືກັບການຜັນຜວນຂອງຕະຫຼາດ, ລະບົບສະໜອງ, ໄພພິບັດທຳມະຊາດເພື່ອປະກອບສ່ວນເຂົ້າໃນການຮັບປະກັນການເຄື່ອນໄຫວພື້ນຖານເສດຖະກິດຢ່າງໝັ້ນຄົງ. ຂະແໜງຖ່ານຫີນຕ້ອງຮັບປະກັນການສະໜອງໃນປະຈຸບັນ, ພ້ອມກັນນັ້ນ ກໍ່ກະກຽມໃຫ້ແກ່ວິວັດການຫັນປ່ຽນພະລັງງານໃນໄລຍະຍາວ. ທ່ານກໍ່ສະເໜີໃຫ້ທົ່ວຂະແໜງຍູ້ແຮງການຫັນເປັນກົນຈັກ, ຫັນເປັນອັດຕະໂນມັດ, ຂຸດຄົ້ນ, ປຸງແຕ່ງ, ການຂົນສົ່ງ ແລະ ບໍລິຫານ; ຂຸດຄົ້ນຢ່າງມີຄວາມຮັບຜິດຊອບ, ຕິດພັນການພັດທະນາຂະແໜງຖ່ານຫີນກັບການປົກປັກຮັກສາສິ່ງແວດລ້ອມ ແລະ ອະນາຄົດຂອງແຂວງ ກວາງນິງ.
