ໃນການໄປປະຕິບັດງານຢູ່ ອາເມລິກາ, ວັນທີ 10 ສິງຫາ (ຕາມເວລາທ້ອງຖິ່ນ), ຄະນະປະຕິບັດງານຄະນະຊີ້ນຳແຫ່ງຊາດ ຫວຽດນາມ ກ່ຽວກັບການຄົ້ນຫາ, ທ້ອນໂຮມ ແລະ ຢັ້ງຢືນຊື່ ແລະ ນາມສະກຸນອັດຖິນັກຮົບເສຍສະຫຼະຊີວິດເພື່ອຊາດ ໂດຍທ່ານພົນໂທ ຫງວຽນວັນເກົ໊າ, ຮອງລັດຖະມົນຕີກະຊວງປ້ອງກັນປະເທດ ຫວຽດນາມ, ຮອງຫົວໜ້າຜູ້ປະຈຳການຄະນະຊີ້ນຳເປັນຫົວໜ້າຄະນະ, ໄດ້ເຮັດວຽກກັບກຸ່ມຄົ້ນຄ້ວາຂຶ້ນກັບຂໍ້ລິເລີ່ມການຄົ້ນຫາຊາວ ຫວຽດນາມ ທີ່ຫາຍສາບສູນໃນສົງຄາມ (VWAI). ການເຮັດວຽກແມ່ນເພື່ອແນໃສ່ຍູ້ໄວຄວາມຄືບໜ້າການຮ່ວມມືກັບຝ່າຍ ອາເມລິກາ ໃນການຮັບເອົາຂໍ້ມູນ ແລະ ຂົນຂວາຍບັນດາແຫຼ່ງກຳລັງຮັບໃຊ້ວຽກງານຄົ້ນຫາ, ທ້ອນໂຮມອັດຖິນັກຮົບເສຍສະຫຼະຊີວິດເພື່ອຊາດໃນບັ້ນເຄື່ອນໄຫວ 500 ວັນ ແລະ ຄືນ.
ໃນການເຮັດວຽກ, ກຸ່ມຄົ້ນຄ້ວາ VWAI ໄດ້ມອບເອກະສານຈຳນວນໜຶ່ງໃຫ້ຄະນະປະຕິບັດງານ ກ່ຽວກັບເຂດຂຸມຝັງສົບທະຫານ ຫວຽດນາມ ລວມຢູ່ເຂດ ກົ່ນຕຽນ, ແຂວງ ກວາງຈິ ໃນບັ້ນບຸກໂຈມຕີປີ 1967, ຢູ່ຖານທີ່ໝັ້ນການທະຫານ Blue ປີ 1971. ຜູ້ຕາງໜ້າກຸ່ມ VWAI ໄດ້ສະເໜີຄະນະຊີ້ນຳ 515 ແຫ່ງຊາດສືບຕໍ່ໜູນຊ່ວຍ, ເປັນຂົວເຊື່ອມຕໍ່, ສ້າງເງື່ອນໄຂສະດວກທີ່ສຸດໃຫ້ແກ່ຄະນະນັກຮົບເກົ່າ ອາເມລິກາ ເຊິ່ງຄາດວ່າຈະເດີນທາງກັບມາຢາມສະໜາມຮົບເກົ່າຢູ່ ຫວຽດນາມ, ນຳເອົາຂໍ້ມູນ, ວັດຖຸພັນອັນລ້ຳຄ່າມາ ຫວຽດນາມ ໃນທ້າຍປີນີ້.
ໂດຍຕາງໜ້າຄະນະຊີ້ນຳແຫ່ງຊາດ 515 ແລະ ກະຊວງປ້ອງກັນປະເທດ ຫວຽດນາມ, ທ່ານພົນໂທ ຫງວຽນວັນເກົ໊າ ສະເໜີໃຫ້ ອາເມລິກາ ສືບຕໍ່ເພີ່ມທະວີແຫຼ່ງກຳລັງແກ້ໄຂມົນລະພິດດີໂອຊິນຢູ່ ບຽນຮວ່າ, ຝູກາດ; ເປີດກວ້າງໂຄງການໜູນຊ່ວຍຄົນພິການ; ເພີ່ມທະວີການແບ່ງປັນຂໍ້ມູນປະຫວັດສາດ, ໜູນຊ່ວຍເຕັກໂນໂລຢີ ADN ແລະ ສືບຕໍ່ປະສານສົມທົບຢ່າງແໜ້ນແຟ້ນໃນການເຄື່ອນໄຫວຄົ້ນຫານາຍທະຫານ ອາເມລິກາ ແລະ ທະຫານ ຫວຽດນາມ ທີ່ຖືກຫາຍສາບສູນ.
