ທ່ານ ຮ່າກີມງ້ອກ ລັດຖະມົນຕີຊ່ວຍ
ວ່າການກະຊວງການຕ່າງປະເທດ
(ພາບ: ອິນເຕີແນັດ)
ຫວຽດນາມ ສາມາດໂຄສະນາຜົນງານດ້ານສິດທິມະນຸດຂອງປະເທດຊາດໄດ້ ນັ້ນແມ່ນຄຳຢືນຢັນຂອງທ່ານ ຮ່າກີມງ້ອກ ລັດຖະມົນຕີຊ່ວຍວ່າການກະຊວງການຕ່າງປະເທດ ເມື່ອຕອບສຳພາດຕໍ່ນັກຂ່າວສຳນັກຂ່າວສານ ຫວຽດນາມ ປະຈຳ ເຊີແນວ ເນື່ອງໃນໂອກາດເຂົ້າຮ່ວມກອງປະຊຸມຂັ້ນສູງຊຸດທີ 31 ສະພາສິດທິມະນຸດສະຫະປະຊາຊາດໃນລະຫວ່າງວັນທີ 29/02 – 02/03 ຢູ່ ເຊີແນວ ປະເທດ ສະວິດ. ທ່ານ ຮ່າກີມງ້ອກ ຊີ້ແຈ້ງວ່າ: ໃນ 2 ປີຜ່ານມາ, ຫວຽດນາມ ໄດ້ປະຕິບັດບົດບາດເປັນສະມາຊິກສະພາສິດທິມະນຸດເປັນຢ່າງດີ, ສຳເລັດຄາດໝາຍທີ່ໄດ້ວາງອອກໃນ 3 ດ້ານ. ກ່ອນອື່ນໝົດ, ຫວຽດນາມ ໄດ້ຮ່ວມແຮງຮ່ວມໃຈກັບປະຊາຄົມສາກົນ, ບັນດາສະມາຊິກສະພາສິດທິມະນຸດຕ່າງໆ ມານະພະຍາຍາມແກ້ໄຂບັນດາສິ່ງທ້າທາຍສຳລັບສິດທິມະນຸດໃນທົ່ວໂລກ. ຄຽງຂ້າງນັ້ນ, ຫວຽດນາມ ໄດ້ປົກປັກຮັກສາຜົນປະໂຫຍດຂອງປະເທດຊາດທີ່ເວທີປາໄສສຳຄັນນີ້ຂອງສະຫະປະຊາຊາດ. ປີ 2016 ແມ່ນປີສຸດທ້າຍ ທີ່ຫວຽດນາມ ເປັນສະມາຊິກສະພາສິດທິມະນຸດ. ຄຽງຄູ່ກັບເລື່ອງສືບຕໍ່ເສີມຂະຫຍາຍບັນດາດ້ານຕັ້ງໜ້າຂອງ 2 ປີຜ່ານມາ, ຫວຽດນາມ ຈະສຸມໃສ່ສ້າງຄວາມປະທັບໃຈໃນບັນດາບັນຫາທີ່ມີຄວາມສົນໃຈແຖວໜ້າຂອງປະເທດໃຫ້ລະອຽດຄື: ຜົນກະທົບຈາກການປ່ຽນແປງຂອງດິນຟ້າອາກາດສຳລັບສິດທິມະນຸດ, ສິດຂອງຄົນພິການ. ທ່ານ ຮ່າກີມງ້ອກ ກໍ່ຢືນຢັນວ່າ: ເລື່ອງປະຕິບັດບົດບາດເປັນສະມາຊິກສະພາສິດທິມະນຸດເປັນຢ່າງດີແມ່ນຂີດໝາຍສຳຄັນ, ໃນການເຕີບໃຫຍ່ຂະຫຍາຍຕົວຂອງ ຫວຽດນາມ ບົນເສັ້ນທາງພ້ອມກັບມວນມະນຸດຊຸກຍູ້ ແລະ ຮັບປະກັນສິດທິມະນຸດ.
(ແຫຼ່ງຄັດຈາກ VOV)
