ດີໂອຊີນ ແມ່ນທາດຕົ້ນຕໍ່ເຮັດໃຫ້ໃບໄມ້ຫລົ່ນ ໂດຍ ອາເມລິການຳໃຊ້ໃນສົງຄາມຫວຽດນາມ ເຮັດໃຫ້ຫລາຍເຂດຢູ່ຫວຽດນາມ ຖືກຕິດທາດພິດຢ່າງຫນັກຫນ່ວງ.
ນັບແຕ່ເມື່ອສອງປະເທດສ້າງການພົວພັນເປັນປົກກະຕິ ແລະ ສ້າງການພົວພັນຄູ່ຮ່ວມມືຮອບດ້ານ, ຫວຽດນາມ ແລະ ອາເມລິກາ ມານະພະຍາຍາມຢ່າງບໍ່ຢຸດຢັ້ງເພື່ອຊຸກຍູ້ເລື່ອງດັດແປງ, ລ້າງທາດພິດຢູ່ບັນດາສະຖານທີ່ຖືກມົນລະພິດຢ່າງຫນັກຫນ່ວງ, ຫນູນຊ່ວຍສ້າງເນື້ອທີ່ດິນສະອາດປອດໃສໃຫ້ແກ່ປະຊາຊົນ, ຫລຸດຜ່ອນຄວາມສ່ຽງຖືກມົນລະພິດ. ການຮ່ວມມືເພື່ອແກ້ໄຂຜົນຮ້າຍຢ້ອນຫລັງຈາກສົງຄາມລະຫວ່າງສອງປະເທດໃນອະດີດຕະການ ໄດ້ເປີດປະຕູໃຫ້ແກ່ການພົວພັນມຸ່ງໄປເຖິງອະນາຄົດ.
ທ່ານ Patrick Leahy ສະມາຊິກສະພາສູງ ພັກປະຊາທິປະໄຕ ອາເມລິກາ ແລະ ທ່ານຮອງນາຍົກລັດຖະມົນຕີຜູ້ປະຈຳການລັດຖະບານຫວຽດນາມ ເຈືອງຮວ່າບິ່ງ ເປັນປະທານຮ່ວມພິທີເລີ່ມຜັນຂະຫຍາຍໂຄງການ (ພາບ: nhandan.com.vn)
ພ້ອມກັນຜ່ານຜ່າບັນດາສິ່ງທ້າທາຍ
ສອງຝ່າຍມານະພະຍາຍາມຜັນຂະຫຍາຍວິວັດການແກ້ໄຂຜົນຮ້າຍຢ້ອນຫລັງຈາກສົງຄາມໂດຍໄວ. ບັນດາການເຄື່ອນໄຫວນີ້ໄດ້ສຸມໃສ່ເຂົ້າໃນການກວດມ້າງ, ເກັບກູ້ລະເບີດບໍ່ທັນແຕກ, ຊອກຫາພົນທະຫານຖືກຫາຍສາບສູນ, ຫນູນຊ່ວຍຄົນພິການຜ່ານບັນດາໂຄງການປັບປຸງຊີວິດການເປັນຢູ່, ການທຳມາຫາກິນລ້ຽງຊີບ… ໃນຂະນະນັ້ນ ບັນດາສະຫນາມບິນໂດຍກອງທັບ ອາເມລິກາ ນຳໃຊ້ໃນສົງຄາມຫວຽດນາມ ຊື່ງແມ່ນບ່ອນຕິດທາດພິດ ດີໂອຊີນ ຢ່າງຫນັກຫນ່ວງ ຍັງບໍ່ທັນໄດ້ຮັບການແກ້ໄຂ ເພາະວ່າ ວຽກງານນີ້ຕ້ອງການຄວາມມານະພະຍາຍາມຈາກສອງຝ່າຍ ພິເສດ ແມ່ນອຳນາດການປົກຄອງ ອາເມລິກາ, ໃນນັ້ນ ມີການຫນູນຊ່ວຍສະຫນັບສະຫນູນອັນໃຫຍ່ຫລວງຈາກບັນດາເພື່ອນມິດ ອາເມລິກາ ທີ່ມີຄວາມຮັກຕໍ່ຫວຽດນາມ. ທ່ານ Patrick Leahy ສະມາຊິກສະພາສູງ ພັກປະຊາທິປະໄຕ ອາເມລິກາ ໃຫ້ຮູ້ວ່າ:“ຂ້າພະເຈົ້າ ຍາມໃດກໍ່ລະດົມ, ຂົນຂວາຍການເຂົ້າຮ່ວມຂອງບັນດາສະມາຊິກສະພາສູງຊື່ງເປັນຜູ້ຮ່ວມງານຂອງຂ້າພະເຈົ້າ ຈາກ ສອງພັກ ໃນສະພາແຫ່ງຊາດ ອາເມລິກາ. ແລະ ຫລັງຈາກນີ້ ຖ້າຂ້າພະເຈົ້າບໍ່ຮັບດຳລົງຕຳແຫນ່ງນີ້ ບັນດາຜູ້ຮ່ວມງານຂອງຂ້າພະເຈົ້າຈະສືບຕໍ່ວຽກງານທີ່ເຕັມໄປດ້ວຍຄວາມໝາຍນີ້.”
ແຕ່ເດືອນສິງຫາປີ 2012, ກະຊວງປ້ອງກັນປະເທດຂອງສອງປະເທດ ເລີ່ມຜັນຂະຫຍາຍໂຄງການແກ້ໄຂສິ່ງແວດລ້ອມຖືກມົນລະພິດດີໂອຊີນ ຢູ່ ສະຫນາມບິນ ດາຫນັງ ແລະ ໂຄງການນີ້ ໄດ້ສຳເລັດໃນທ້າຍປີ 2016.ໂຄງການນີ້ ໄດ້ລ້າງທາດພິດທີ່ດິນກວ່າ 90.000 ແມັດກ້ອນ. ນີ້ໄດ້ຮັບຖືວ່າ ແມ່ນຂີດໝາຍສຳຄັນໃນການພົວພັນສອງຝ່າຍລະຫວ່າງຫວຽດນາມ ແລະ ອາເມລິກາ. ເລື່ອງລ້າງທາດພິດດີໂອຊີນ ຢູ່ ສະຫນາມບິນ ດາຫນັງ ເປັນການພິສູດໃຫ້ເຫັນວ່າ ສອງປະເທດ ໄດ້ພ້ອມກັນແກ້ໄຂບັນດາບັນຫາຕົກຄ້າງຫລັງສົງຄາມຢ່າງມີຄວາມຮັບຜິດຊອບ ແລະ ຫັນເນື້ອໃນກໍ່ຄວາມບໍ່ລົງລອຍກັນເປັນເນື້ອໃນເພື່ອຮ່ວມວຽກຮ່ວມງານ, ເປີດແງ່ຫວັງແຫ່ງການຮ່ວມມືໃນຂົງເຂດນີ້ຢູ່ບັນດາໂຄງການຕໍ່ໄປ.
ມຸ່ງໄປເຖິງອະນາຄົດຫລາຍກວ່າອີກ
ພາຍຫລັງປະຕິບັດການລ້າງພິດດີໂອຊີນ ຢູ່ ສະຫນາມບິນ ດາຫນັງ ສຳເລັດຜົນ, ໂຄງການລ້າງພິດດີໂອຊີນ ຢູ່ ສະຫນາມບິນ ບຽນຮ່ວາ ສືບຕໍ່ໄດ້ຮັບການຜັນຂະຫຍາຍ. ສະຫນາມບິນແຫ່ງນີ້ແມ່ນເຂດຖືກຕິດທາດດີໂອຊີນຫນັກຫນ່ວງກວ່າໝູ່ຢູ່ຫວຽດນາມ, ດ້ວຍ ທີ່ດິນ 500.000 ແມັດກ້ອນຖືກມົນລະພິດ. ຕົວເລກນີ້ແມ່ນສູງກວ່າທົບ 5 ເທົ່າ ເມື່ອທຽບໃສ່ສະຫນາມບິນ ດາຫນັງ. ຕາມການຄາດຄະເນແລ້ວ, ວິວັດການລ້າງທາດພິດຢູ່ ສະຫນາມບິນ ບຽນຮ່ວາ ຈະຕ້ອງໃຊ້ເວລາຢ່າງຫນ້ອຍສຸດແມ່ນ 10 ປີ ແລະ ໃຊ້ງົບປະມານ 390 ລ້ານ USD. ໂຄງການລ້າງທາດພິດດີໂອຊີນຢູ່ເຂດສະຫນາມບິນ ບຽນຮ່ວາ ສະແດງໃຫ້ເຫັນຄວາມສຳຄັນຂອງບັນດາຄວາມມານະພະຍາຍາມລວມລະຫວ່າງຫວຽດນາມ ແລະ ອາເມລິກາ ໃນເລື່ອງເຮັດໃຫ້ການພົວພັນຄູ່ຮ່ວມມືຮອບດ້ານເລິກເຊິ່ງກວ່າຜ່ານການແກ້ໄຂຜົນຮ້າຍຢ້ອນຫລັງຈາກສົງຄາມ. ທີ່ພິທີເລີ່ມປະຕິບັດໂຄງການລ້າງທາດພິດດີໂອຊີນ ຢູ່ສະຫນາມບິນ ບຽນຮ່ວາ ໃນວັນທີ 20 ເມສາ ຜ່ານມາ, ທ່ານ Patrick Leahy ສະມາຊິກສະພາສູງ ອາເມລິກາ ພ້ອມກັບສະມາຊິກສະພາສູງອື່ນ 8 ທ່ານ ສັງກັດ 8 ລັດຂອງ ອາເມລິກາ ໄດ້ມີຫນ້າຢູ່ຫວຽດນາມ ເພື່ອເລີ່ມປະຕິບັດໂຄງການນີ້. ຕີລາຄາສູງການຮ່ວມມືຈາກ ຝ່າຍ ອາເມລິກາ, ພົນໂທ ຫງວຽນຈີວິ້ງ ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ຢືນຢັນວ່າ:
“ຂ້າພະເຈົ້າຖືບົດບາດຂອງທ່ານສະມາຊິກສະພາສູງ ອາເມລິກາ Patrick Leahy ເປັນສຳຄັນ. ຄຽງຂ້າງທ່ານ ຍັງມີຜູ້ຊ່ວຍວຽກ, ຜູ້ຮ່ວມງານ ແລະ ພ້ອມກັບສະມາຊິກສະພາສູງອື່ນ 8 ທ່ານ ສັງກັດ 8 ລັດຂອງ ອາເມລິກາ. ຄຳເຫັນຂອງພວກທ່ານແມ່ນມີຄວາມສຳຄັນຢູ່ເວທີການເມືອງ ອາເມລິກາ. ເພາະສະນັ້ນ ຂ້າພະເຈົ້າມີຄວາມເຊື່ອໝັ້ນວ່າ ໃນອະນາຄົດການຮ່ວມມືແກ້ໄຂຜົນຮ້າຍຢ້ອນຫລັງຈາກສົງຄາມລະຫວ່າງ ຫວຽດນາມ ແລະ ອາເມລິກາ ຈະສືບຕໍ່ພັດທະນາ.”
ຫວຽດນາມ ແລະ ອາເມລິກາ ບໍ່ມີເວລາຫລາຍເພື່ອທົດສອບຄວາມເຊື່ອໝັ້ນເຊິ່ງກັນ ແລະກັນ ຜ່ານການເຄື່ອນໄຫວແກ້ໄຂຜົນຮ້າຍຢ້ອນຫລັງຈາກສົງຄາມ. ຄວາມໄວ້ເນື້ອເຊື່ອໃຈລະຫວ່າງສອງລັດຖະບານ ຫວຽດນາມ ແລະ ອາເມລິກາ ໄດ້ນຳມາໃຫ້ການພົວພັນອັນດີງາມລະຫວ່າງສອງປະເທດປະຈຸບັນ ພ້ອມກັນນັ້ນ ຄວາມຈິງໄດ້ພິສູດໃຫ້ເຫັນຄວາມຫຍຸ້ງຍາກທີ່ສຸດໃນອະດີດຕະການ ປະຈຸບັນ ໄດ້ກາຍເປັນພື້ນຖານທີ່ດີໃຫ້ແກ່ການຮ່ວມມືໃນອະນາຄົດ. ບົນຈິດໃຈຮ່ວມວຽກຮ່ວມງານ ແລະ ມີຄວາມເຂົ້າໃຈເຊິ່ງກັນ ແລະກັນ, ລັດຖະບານສອງປະເທດ ໄດ້ ແລະ ພວມມານະພະຍາຍາມແກ້ໄຂຜົນຮ້າຍຢ້ອນຫລັງຈາກສົງຄາມ ບັນເທົາຄວາມເຈັບປວດ ແລະ ເປັນການລະດົມກຳລັງໃຈໃຫ້ແກ່ປະຊາຊົນສອງປະເທດ ເພື່ອສຸມໃສ່ໃຫ້ອະນາຄົດອັນສົດໃສກວ່າ.
(ແຫຼ່ງຄັດຈາກ VOV)
