ຂ່າວສານ
ຫວຽດນາມ ຮຽກຮ້ອງໃຫ້ ອາເມລິກາປະຕິບັດມະຕິຂອງກອງປະຊຸມໃຫຍ່ ສປຊ, ຢຸດຕິຄຳສັ່ງຂວ້ຳບາດແບບພຽງລຳພັງຝ່າຍດຽວຕໍ່ກູບາ
ຄະນະກຳມະການປະສານງານຂອງ ຂະບວນການບໍ່ຮ່ວມກຸ່ມ (CoB-NAM) ຢູ່ ສປຊ ຈັດກອງປະຊຸມໃນວັນທີ 21 ກໍລະກົດ ເພື່ອຮັບຟັງ ກູບາ ແຈ້ງໃຫ້ຊາບກ່ຽວກັບບັນດາການຜັນແປຫວ່າງມໍ່ມານີ້ຢູ່ປະເທດນີ້. ກອງປະຊຸມໄດ້ດຶງດູດການເຂົ້າຮ່ວມຂອງ ຜູ້ຕາງໜ້າ ກ່ວາ 100 ທ່ານ ທີ່ມາຈາກບັນດາປະເທດສະມາຊິກ ຂະບວນການບໍ່ຮ່ວມກຸ່ມ.
ກ່າວຄຳເຫັນທີ່ກອງປະຊຸມ, ທ່ານເອກອັກຄະລັດຖະທູດ ດັ້ງດິ່ງກຸ໊ຍ, ຫົວໜ້າຄະນະຜູ້ຕາງໜ້າຫວຽດນາມ ປະຈຳ ສປຊ, ໃຫ້ຮູ້ວ່າ ຫວຽດນາມ ຕິດຕາມສະພາບການທີ່ພວມເກີດຂຶ້ນຢູ່ກູບາ ແລະ ເຊື່ອໝັ້ນວ່າ ປະຊາຊົນ ກູບາຈະຜ່ານຜ່າບັນດາຄວາມຫຍຸ້ງຍາກດ້ານເສດຖະກິດ ແລະ ບັນດາຜົນກະທົບຈາກໂລກລະບາດໂຄວິດ - 19 ໂດຍໄວ. ຫວຽດນາມ ຄັດຄ້ານເລື່ອງຈັດວາງບັນດາຄຳສັ່ງຂວ້ຳບາດແບບພຽງລຳພັງຝ່າຍດຽວ ແລະ ບັນດາມາດຕະການບັງຄັບຕໍ່ປະເທດທີ່ມີອະທິປະໄຕ. ທ່ານເອກອັກຄະລັດຖະທູດ ເນັ້ນໜັກວ່າ ເລື່ອງສືບຕໍ່ຮັກສາຄຳສັ່ງຂວ້ຳບາດຕໍ່ ກູບາ ແມ່ນບໍ່ຊອບທຳ ແລະ ໄດ້ສ້າງບັນດາຜົນເສຍຫາຍຢ່າງຍິ່ງຕໍ່ທຸກດ້ານສຳລັບພື້ນຖານເສດຖະກິດກູບາ, ໃນນັ້ນມີບັນດາຄວາມຫຍຸ້ງຍາກທີ່ພາໄປເຖິງສະພາບການຄືໃນປັດຈຸບັນ.
ຫວຽດນາມ ຮຽກຮ້ອງໃຫ້ ອາເມລິກາປະຕິບັດມະຕິເລກທີ 289 ຂອງ ສະມັດຊາໃຫຍ່ ສປຊ ທີ່ໄດ້ຮັບການຮັບຮອງເອົາໃນວັນທີ 23 ມິຖຸນາ 2021 ເພື່ອແນໃສ່ຢຸດຕິຄຳສັ່ງຂວ້ຳບາດແບບພຽງລຳພັງຝ່າຍດຽວສຳລັບກູບາ, ຊ່ວຍໃຫ້ກູບາສາມາດ ມີຄວາມເສລີໃນການເຂົ້າຮ່ວມ ໃນບັນດາການພົວພັນເສດຖະກິດ ແລະ ການຄ້າ ທີ່ສອດຄ່ອງກັບກົດໝາຍສາກົນຢ່າງສະເໝີພາບ ແລະ ຍຸຕິທຳ. ຫວຽດນາມ ຮຽກຮ້ອງໃຫ້ ອາເມລິກາປ່ຽນແປງທ່າອ່ຽງນະໂຍບາຍ ໃນປັດຈຸບັນສຳລັບກູບາ, ບໍ່ພຽງແຕ່ເພື່ອຜົນປະໂຫຍດຂອງ ປະຊາຊົນສອງປະເທດເທົ່ານັັ້ນ ຫາກຍັງເພື່ອສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ແລະ ທົ່ວໂລກເວົ້າລວມ.
(ແຫຼ່ງຄັດຈາກ VOV)
