ໃນການຕ້ອນຮັບທ່ານ ແຫຼງຂວາ ປະທານກຸ່ມບໍລິສັດ ຫົວເຫວີຍ, ທ່ານປະທານປະເທດ ຫວຽດນາມ ຫວໍວັນເຖືອງ ໄດ້ເນັ້ນໜັກວ່າ ຫວຽດນາມ ຖືເປັນສຳຄັນ ແລະ ສຸມໃສ່ການຫັນເປັນດີຈີຕອນ, ສ້າງພື້ນຖານເສດຖະກິດດີີຈີຕອນ ແລະ ສັງຄົມດີຈີຕອນ. ຫວຽດນາມ ປາດຖະໜາວ່າ ຫົວເຫວີຍ ຈະສືບຕໍ່ຮ່ວມມືກັບບັນດາອົງການຂອງ ຫວຽດນາມ ຢ່າງຕັ້ງໜ້າກວ່າອີກ ເພື່ອຮ່ວມມືສ້າງພື້ນຖານດີຈີຕອນ, ພັດທະນາອິນເຕີເນັດ 5G ຢ່າງກວ້າງຂວາງ ແລະ ໂດຍສະເພາະແມ່ນການສົມທົບກັນບຳລຸງສ້າງບຸກຄະລາກອນດີຈີຕອນ. ທ່ານ ແຫຼງຂວາ ປະທານກຸ່ມບໍລິສັດ ຫົວເຫວີຍ ໃຫ້ຮູ້ວ່າ ກຸ່ມບໍລິສັດ ປາດຖະໜາຢາກປະກອບສ່ວນເຂົ້າໃນວິວັດທະນາການພັດທະນາເສດຖະກິດດີຈີຕອນ, ສັງຄົມດີຈີຕອນ ແລະ ການຫັນປ່ຽນພະລັງງານຂອງ ຫວຽດນາມ ຫຼາຍກວ່າອີກ.
ສ່ວນໃນການຕ້ອນຮັບທ່ານ ຫຼີຕື້ເສວ, ປະທານສະພາບໍລິຫານກຸ່ມບໍລິສັດ ZTE ເຊິ່ງເປັນກຸ່ມບໍລິສັດຜະລິດອຸປະກອນໂທລະຄົມມະນາຄົມນາໆຊາດຂອງ ຈີນ, ທ່ານປະທານປະເທດ ຫວໍວັນເຖືອງ ເນັ້ນໜັກວ່າ ຫວຽດນາມ ປາດຖະໜາຢາກໃຫ້ບັນດາວິສາຫະກິດຂອງ ຈີນ, ໂດຍສະເພາະແມ່ນວິສາຫະກິດຂະໜາດໃຫຍ່, ມີລະດັບວິທະຍາສາດເຕັກໂນໂລຢີສູງ, ທັນສະໄໝ ລົງທຶນ ແລະ ເປີດກວ້າງການລົງທຶນຢູ່ ຫວຽດນາມ. ທ່ານເຊື່ອໝັ້ນວ່າ ZTE ຈະມີການຮ່ວມມືຢ່າງແໜ້ນແຟ້ນ, ມີປະສິດທິຜົນກວ່າກັບບັນດາວິສາຫະກິດ ຫວຽດນາມ ໃນອະນາຄົດ; ປະກອບສ່ວນເຂົ້າໃນການພັດທະນາລວມຂອງການພົວພັນຮ່ວມມື ລະຫວ່າງ ຫວຽດນາມ - ຈີນ.
